زیاد حمدامین حمد
لەوڵاتان سیستەمی پەروەردە لە ڕەوزە و باخچەی مناڵاندا سوودی لێ دەبینرێت، هەوڵ دەدرێت تاك بە تاكی كۆمەڵگە فێری پەروەردە و ڕەوشت و كولتوور و بەها باڵاكانی ئەم كۆمەڵگایە بكرێ كە تێیدا دەژی.
لەكاتێكدا ئێمە لە كوردستان دەبێت لە كۆتا قۆناخی خوێندندا فێری بەشێك لەو ئامراز و پێویستیانە ببین كە پێویستی كۆمەڵگە و پێشكەوتنی كۆمەڵگە ڕێك دەخەن”لەوانەیە زۆرێكمان ڕۆژانە ببینین لە سوشیال میدیا یان لەناوەندەكانی خوێندن دا كە كێشەی زۆربەی قوتابیان و تەنانەت مامۆستاكانیش خۆیان نەبوونی سیستەمێكی ڕێكخرا و جێگرە بۆ ناوەندەكانی خوێندن لە هەموو ڕووێكەوە.
زۆربەمان هەستمان بەوە كردووەقوتابی لەجیاتی فێربوون، زیاتر جەنگ لەپێناو نمرە دەكات.
هەر لە قۆناخی ئامادەیی، قوتابی وا ڕادەهێنرێت تا كۆلێژ تەواو دەكات تاكە ئامانجی ئەوەیە دەربچێت، فێر دەبێت یان نا كێشه نییە، تەنها دەربچێت دواتر فێر دەبێت كە كۆلێژی تەواوكرد ئەوكات هەوڵ دەدات فێر ببێت چونكە ئەوكات ناچارە هیچ زانستێكی پێ نیە بیگەیەنێ و تەمەنیش ڕێگەی نادات و كاتیش لەو لاوە خەریكی ئەكات بە ژیانی خۆی، بۆیە ناچارە بەو زانستە شێواو و كەمەی هەیەتی، بچێت ببێت بە مامۆستا یان دكتۆر یانیش فەرمانبەر…هتد.
لایەنی پەیوەندیدار (وەزارەتی پەروەردە) ئەوەندەی خەریكی هەڵسەگاندنی سیستەم و تاقیكردنەوەی سیستەمی وڵاتانی ترە بەسەر ناوەندەكانی خوێندن، بێ ئاگا لەوەی چی ئەگوزەرێ و ئاستی پێگەیاندن و بەرەوپێشچوون چۆن بووە لای قوتابیان (فێرخواز) بەگشتی.
هۆكارەكان زۆرن كە وایان كردوە فێرخواز گوێ بە فێر بوون نەدات، بەڵكو زیاتر نمرە و دەرچوونی بەلاوە گرنگ بێت:
یەكەم: فێرخواز ئەبینی سیستەمی پەروەردە هەموو گرنگی پەروەردە و فێربونی خستۆتە سەر بەدەستهێانی نمرەی بەرز.
دووەم: بناغەی سیستەمی پەروەردە بەهیچ شێوەیەك لەسەر فێربون و گرنگی فێربون بابەتێكی دیاری كراوی نیە لەناوەندەكانی خوێندن .
زۆر هۆكاری تر هەن بەڵام ئەم دووانە بەهێزترین هۆكارن كەوایانكردوە فێرخواز تا تەواوبوونی لەكۆلێژ و تەخەروجیش ئەكات هێشتا نازانێ ئامانجی چیە و دەوێت ببێ بە چی لەداهاتوودا !
یەكێكی تر لە كێشەكانی فێرخواز (قوتابی) لە قۆناخی ئامادەیی و بگرە زانكۆكانیش هێشتا ئامادە نییە بتوانێ وتارێك یان سمینارێك پێشكەش بكات، بۆچی ؟ چونكە ئامادە نەكراوەو فێری گفتوگۆ نەبووە لە ڕووی زانستی یەوە.
بەهەمان شێوە قوتابی هەیە لە قۆناخی چوارەمی زانكۆیە هێشتا كێشەی ئیملا و نوسین و دەست خەتی هەیە.
ئاخر ئەمانە كێشە نەبن بۆ سیستەمی پەروەردە ئەی چی كێشەیە ؟
