ئەژین غەفار – زاری کرمانجی
هێرشی درۆنی ئێران بۆ سەر نووسینگەی سەرۆکوەزیرانی هەرێمی کوردستان مەسرور بارزانی و شوێنی حەوانەوەی بەڕێوەبەری ئاژانسی پاراستن، نەک لەسەر ئاستی ناوخۆیی و وڵاتانی ناوچەکە، بەڵکو لەسەر ئاستی نێودەڵەتیش کاردانەوەی فراوانی لێکەوتەوە. وڵاتانی ڕۆژئاوا و ئەوروپا، ڕۆژهەڵاتی ناوەڕاست و کەساتییە سیاسی و سەربازییەکان نیگەرانی خۆیان دەربڕی و بە پەرۆشەوە پاڵپشتی خۆیان بۆ سەرۆکوەزیران و ئاسایشی هەرێمی کوردستان دووپات کردەوە.
لە ڕاگەیاندراوێکدا، شاندی یەکێتیی ئەوروپا لە عێراق و باڵیۆزخانەکانی وڵاتانی ئەندام، هێرشەکانی سەر نووسینگەی سەرۆکی حکوومەتی هەرێمی کوردستان و شوێنی نیشتەجێبوونی سەرۆکی ئاژانسی پاراستن لە پیرمام بە توندی سەرکۆنە کرد. یەکێتیی ئەوروپا جەختی کردەوە کە ئامانجگرتنی دامەزراوە فەرمییەکان، بەرپرسانی حکوومی و نێردە دیپلۆماسییەکان قبوڵکراو نییە و ئەم هێرشانە هەوڵەکانی عێراق و هەرێم بۆ دوورخستنەوەی وڵات لە شەڕە ناوچەییەکان و گەیشتن بە چارەسەری دیپلۆماسی لاواز دەکەن.
لە ڕۆژهەڵاتی ناوەڕاستەوە، وەزارەتی دەرەوەی سعوودیە ئاماژەی بە مەترسی ئەم هێرشانە بۆسەر سەقامگیری ناوچەک کرد و گووتی، هێرشەکانی سەر هەرێمی کوردستان و نووسینگەی مەسروور بارزانی، سەرۆکی حکوومەتی هەرێم، بە توندی سەرکۆنە دەکەین. ئەو هێرشانەی بە پێشێلکردنی سەروەری و سەلامەتی خاکی عێراق و بنەماکانی یاسای نێودەوڵەتی ناوبرد. ڕیاز جەختی کردەوە کە هەموو کردەوە دوژمنکارییەکانی دژ بە کەسایەتی و دامەزراوەکانی دەوڵەتی عێراق ڕەت دەکاتەوە و دژی هەر هەوڵێکە بۆ تێکدانی ئاسایش و سەقامگیری عێراق و هەرێمی کوردستان.
هاوکات، بەحرەینیش ئەم هێرشانەی بە پێشێلکارییەکی زەقی یاسای نێودەوڵەتی و میساقی نەتەوە یەکگرتووەکان و هەڕەشەیەک بۆ سەر ئاسایش و سەقامگیری ناوچەکە ناوبرد. وەزارەتی دەرەوەی بەحرەین هاوسۆزیی خۆی بۆ عێراق و هەرێمی کوردستان دەربڕی و جەختی کردەوە کە پشتگیری لە هەر هەنگاوێک دەکات بۆ پاراستنی سەروەری و یەکپارچەیی خاکی عێراق و کەمکردنەوەی گرژییەکان لە ناوچەکە.
هەر لەبارەی ئەم هێرشە ناڕەوایانە، وەزارەتی دەرەوەی قەتەر هێرشەکانی سەر نووسینگەی سەرۆکی حکوومەتی هەرێمی کوردستان و شوێنی نیشتەجێبوونی بەڕێوەبەری ئاژانسی پاراستن لە هەولێر بە شەرمەزار کرد. وەزارەتەکە ئەم هێرشانەی بە پێشێلکارییەکی زەقی سەروەریی عێراق و هەرێمی کوردستان و بنەماکانی یاسای نێودەوڵەتی دانا، و جەختی لە پێویستیی کەمکردنەوەی گرژییەکان و بەردەوامبوون لە گفتوگۆ و دیپلۆماسی کردەوە. قەتەر هاوسۆزیی تەواوی خۆی بۆ عێراق و هەرێمی کوردستان دووپات کردەوە و ڕایگەیاند کە پشتگیریی هەموو ئەو هەنگاوانە دەکات کە بۆ پاراستنی سەروەری، ئاسایش و سەقامگیریی عێراق و هەرێمی کوردستان دەگیرێن.
شانشینی ئوردنیش، ئەم هێرشانەی بە دەستدرێژییەکی ڕەتکراو بۆ سەر سەروەریی عێراق ناوبرد. وەزارەتی دەرەوە و کاروباری کۆچبەرانی ئوردن، لە ڕاگەیەندراوێکی فەرمی، جەختی کردەوە کە بەئامانجگرتنی دامەزراوەکانی هەرێمی کوردستان، هەڕەشەیەکی ڕاستەوخۆ بۆ ئاسایش و سەقامگیریی عێراق دروست دەکات و پێشێلکارییەکی ئاشکرای سەروەریی وڵاتە. عەممان هاوسۆزی و پشتگیریی تەواوی خۆی بۆ کۆماری عێراق و هەرێمی کوردستان دەربڕی و رایگەیاند کە لەگەڵ هەموو هەوڵێک دەبێت کە ئامانجی پاراستنی سەروەری، سەلامەتیی خاک، ئاسایش و سەقامگیریی عێراق بێت.
لەسەر ئاستی باڵیۆزخانە و کەسایەتییە سیاسییەکانیش، ئەم هێرشانه بوونە مایەی دڵگرانی و هاوخەمی و هاوسۆزییان بەدواوە داهات. کونسولخانەی گشتی بەڕیتانیا لە هەرێمی کوردستان، تۆم باراک باڵیۆزی ئەمریکا لە تورکیا، سەرۆکی هاوپەیمانی دەوڵەتی یاسا، سەرۆکوەزیرانی عێڕاق عەلی زەیدی، لەیلا زانا سیاسەتمەداری دیاری کورد لە باکوری کوردستان، مەزڵوم عەبدی فەرماندەی گشتی هێزەکانی هەسەدە، میر حازم تەحسین سەعید، میری ئێزدیان لە عێڕاق و جیهان و هەموو ئەوانە و هاووڵاتییانی هەرێمی کوردستان، بە پەرۆشەوە پەیامی پاڵپشتی و هاوخەمییان ڕاگەیاند بۆ ئەو هێرشە ترسنۆکانەی کرایە سەر نووسینگەی سەرۆکی هەرێم و دووپاتیان کردەوە، دژی هەر هێرشێکی ناڕەوان بۆسەر ئاسایش و سەقامگیری ناوچەکە.
