هاوپەیمانیی هێزە سیاسییەكانی كوردستانی ئێران: لەمساڵدا 850 كەس لە سێدارە دراون

زاری كرمانجی :

هاوپەیمانیی هێزە سیاسییەكانی كوردستانی ئێران، لە راگەیاندراوێكدا ئاشكرای دەكات كە كۆماری ئیسلامی ئێران لە سێدارەدانی بەندكراوانی خێراتر كردووە و ڕایدەگەیەنێت”تەنیا لەمساڵدا 850 كەسی لە سێدارە داوە و دەشڵێت “لە سێدارەدان بێ گوێدانە هەر پاساوێك، پێشێلكاریی ئاشكرای مافی ژیانە و بەرپرسیارێتیی كۆمەڵگەی نێودەوڵەتی، دامەزراوەكانی مافی مرۆڤ و ڕای گشتی، نابێت تەنیا دەربڕینی نیگەرانی بێت و پێویستی بە گرتنەبەری ڕێوشوێنی خێرایە.
ئەمەی خوارەوە دەقی راگەیاندراوی هاوپەیمانیی هێزە سیاسییەكانی كوردستانی ئێران :
“ڕاپۆرتی ناوەندەكانی مافی مرۆڤ ئاماژە بە پەرەسەندنی كەموێنەی سەپاندن و جێبەجێكردنی سزای لەسێدارەدان لەلایەن كۆماری ئیسلامیی ئێران دەكەن، لەسێدارەدانی زیاتر لە ٨٥٠ گیراو لە دەستپێكی ساڵی ٢٠٢٦ـەوە تا ئێستە و لەناویدا بەرزبوونەوەی بەرچاوی لە سێدارەدانی چالاكانی سیاسی و ژنان، ئاماژەیە بۆ خێراكردنی ئەو ڕەوتە مەترسیدارەی كە دەتوانێت كوشتارێكی تری بێ وێنەی حكوومەت لە مێژووی ئێراندا تۆمار بكات.
هاوكات لەگەڵ زیادبوونی ململانێ و گرژییەكانی ڕژێم لە ناوچەكەدا، بەڵگەكان دەریدەخەن سزای لەسێدارەدان زیاتر لە جاران وەك دەزگایەكی كوشتار بۆ دروستكردنی ترس لەناو كۆمەڵگە و پاشەكشە بە داواكارییەكانی خەڵك، هەروەها بۆ ڕێگریكردن لە سەرهەڵدانەوەی ناڕەزایەتییەكان بەكار دەهێنرێت.
لەم چوارچێوەیەشدا سەركوت و بێدادیی دەزگا پۆلیسییەكان و دەسەڵاتی دادوەری حكوومەتی ئێران لە بەرانبەر خۆپێشاندەران و چالاكانی سیاسی و مەدەنی، لایەنی فراوانتری بە خۆوە بینیوە، دوای ڕاپەڕینەكانی مانگی بەفرانباری ڕابردوو، سزای لەسێدارەدانی دەیان كەس لە خۆپێشاندەران بە ڕێكاری نایاسایی و پێشێلكردنی بنەماكانی دادگاییكردنی دادپەروەرانە، بە پشتبەستن بە ددانپێدانانی زۆرەملێ و سنوورداركردنی دەستڕاگەیشتن بە پارێزەر جێبەجێ كراوە.
لەو ناوەشدا كوردستان یەكێكە لە سەرەكیترین ناوەندەكانی سەركوتكردنی سیستماتیك لە ئێران، بە تۆمەتەكانی وەك بەغی و ئەندامبوون لە حزبەكان و چالاكوانانی كورد لەسێدارە دەدرێن و هەڕەشەی مەرگیان لێ دەكرێت.
هەروەها ژمارەیەكی بەرچاو لە دەستبەسەركراوانی ناڕەزایەتییەكان و گیراوانی سیاسی بەتایبەتی گیراوانی سیاسیی ژن، كە سزای سێدارەیان بەسەردا سەپاوە، ڕووبەڕووی مەترسیی رژد بوونەتەوە، بۆیە پێویستە ڕێكخراوەكانی مافی مرۆڤ و دامەزراوە نێودەوڵەتییەكان بۆ پاراستنی مافی ژیانی ئەو گیراوانە لە هەموو توانا یاسایی و دیپلۆماسییەكانیان، بۆ ڕێگریكردن لە جێبەجێكردنی ئەو سزایانە كەڵك وەربگرن، بێگومان وەلانان یان پەراوێزخستنی پرسی مافی مرۆڤ لە ئێران، دەرفەت بۆ بەردەوامبوونی ڕەوتی كوشتار خۆش دەكات.
هاوكات پێویستە میكانیزمە یاساییەكانی وەك كۆكردنەوەی سیستماتیكی بەڵگەكان و بەدواداچوون بۆ پێشێلكارییەكانی مافی مرۆڤ، لە ناوەندە نێودەوڵەتییەكان و گوشار بۆ دامەزراوە پێوەندیدارەكانی نەتەوە یەكگرتووەكان، لەلایەن ڕێكخراوە مرۆییەكانەوە بە پەلە بەدواداچوونیان بۆ بكرێت.
لە بەرانبەر ئەو ستراتیجەی ڕژیم كە لەسەر بنەمای ترس و تۆقاندن بەڕێوە دەچێت گرنگیی ڕۆڵی بنەماڵەی زیندانییان، كۆمەڵگەی مەدەنی، میدیاكان و ڕای گشتی زیاتر لە هەموو كاتێك دەردەكەوێت، بڵاوكردنەوەی زانیاری و پشتیوانیی كۆمەڵایەتی دەتوانێت ڕێگر بێت لە پەراوێزخستنی دۆسیەكان و جێبەجێبوونی ئەم تاوانانە، پێویستە بە زیادكردنی تێچووی سیاسی و نێودەوڵەتی لەسەر ڕژێم، پێش بە پەرەسەندنی ڕەوتی سەركوت و جێبەجێكردنی سزاكانی لە سێدارەدان بگیرێت و كۆتاییان پێ بهێنرێت.
لە سێدارەدان بێ گوێدانە هەر پاساوێك، پێشێلكاریی ئاشكرای مافی ژیانە و بەرپرسیارێتیی كۆمەڵگەی نێودەوڵەتی، دامەزراوەكانی مافی مرۆڤ و ڕای گشتی، نابێ تەنیا دەربڕینی نیگەرانی بێت و پێویستی بە گرتنەبەری ڕێوشوێنی خێرا، هاوئاهەنگ و كاریگەر هەیە بۆ وەستاندنی دەستبەجێی جێبەجێكردنی سزاكانی لە سێدارەدان، هەروەها لێپرسینەوە لە ئەنجامدەرانی ئەو تاوانە دژەمرۆییە.”