محەمەد ئامۆكەیی – زاری كرمانجی:
خانمە شاعیر و نووسەر چنوور نامیق، لە دیدارێكی زاری كرمانجی لاپەڕەی ژیانی خۆ هەڵدەداتەوە و باس لە دونیای شیعر نووسین دەكات و دەستپێكی قسەكانی دەگەڕێتەوە بۆ سەردمی منداڵی خۆی و هێما بۆ ئەوە دەكات” مناڵییەكی بێدەنگم بەسەر برد، دڵناسك بووم، لەهەموو شـتێك تێڕائەمام، سەرەتای دەستپێكردنم بەنوسینی شیعر، دەگەڕێتەوە بۆ تاسەم بۆ زمانی شیرینی كوردی و ئەو بەهرەیەی كە لە خۆمدا دۆزیمەوە، چوون ئەگەر ئەو بەهرەیەم تیا نەبوایە هەرگیز نەمدەتوانی تا ئێستاكە لە نووسینی دەقی شیعری بەردەوامبم، نەوەی دوای راپەڕینم، خاوەنی چەندین كتێبی جۆراوجۆرم لە شیعر و خوێندنەوەی شاكاری جیهانی و نۆڤلێت و چیرۆك، كە زادەی تێڕامانی بەردەواممە لە جوانی و دزێوییەكانی ژیان، خاوەنی بڕوانامەی ماستەرم لە زمانی ئینگلیزی و ئێستا راوێژكارم لەوەزارەتی رۆشنبیری و لاوان.
ئەم خانمە شاعیرە پێی وایە” شیعر دونیا دزێوی و جوانی تێدایە، دیاردەی ناشیرین و دیاردەی روخێنەر، هەر چۆن سروشت لە چوار وەرز پێكدێ، و زۆر جار مرۆڤ وەرزێكی وەكو پایز بە ناخۆش ناو دەبات، كەچی سروشتی پایزانە دزێو نییە، تەماشای گەڵاڕێزان بكەین دەبینین پایزیش تابلۆیەكی جوانمان پیشان ئەدات، سوهراب وتەنی ” كێ دەڵێ كرم ناشیرینە… ئەگەر كرم نەبێت ئەوە دنیا شتێكی نوقسانە كە كرمە، واتە ئەوە تێڕوانینی ئێمەیە، بینینی ئێمەیە بارودۆخی شتەكان بەرجەستە دەكات، زۆربەی كێشە واقیعیەكان بوونەتە خەیاڵ لەلای چنوور و زۆر جار ساتژمێرێكی دواكەوتوو، كراسێكی رەش، هەڵوێستێكی رۆژانە بووەتە هەوێن و خولقاندنی دەقێكی شیعری جوان، كەواتە، بۆ شاعیر دزێوی و جوانی و خەوشەكان دەبنە خولقێنەری دەقی خومار و سەرمەست لەسەر ریتمی سۆفیگەرانە سەما دەكەن”.
ئەو ژنە شاعیرە دەیەوێت لە رێگەی شیعرەكانیەوە بە خوێنەرانی بڵێت” كە دەنووسم خۆم بە عاشقێكی سەركێش و یاخی دەبینم، زۆر جار خۆم لە دەرەوەی هێڵە دەسكردەكانی كۆمەڵگە دەبینمەوە، چونكە دەبێ شاعیر دوو باڵی مەجازی هەبێ و ئەو دیوی شتەكان ببینێت، سنوور ە دەسكردەكان تێپەڕێنێ، بە باڵی خەیاڵ تێفكرین لە جوانی و دزێوییەكان بكات، گرنگترین شت لەنووسینی شیعردا هاوكێشە مرۆڤانەكەیە، خۆشویستنی مرۆڤ و ئاژەڵ و سروشت و رووەك ئیلهامبەخشێكی تری نوسینن، واتە مەسەلە ویژدانییەكە و هەستی خۆشویستن، نەك تەنیا خەمە كەسییەكان، ئا لەوێوە مەسەلەی كێشەكانی كۆمەڵگە بەتایبەتی كەسە ستەم لێكراوەكان، بەرجەستەكردنی حاڵەتە مرۆڤانەكەیەو هەموو ئەمانە كە لە راستیدا بوونیان هەیە و ئەگوزەرێن لەدەقە ئەدەبییەكاندا وەكو خەیاڵ لەناو نیشتیمانی شیعردا هەمان موعاناتیان هەیە، بەڵام بەشێوەیەكی مەجازی و لەفەزا و كەشێكی خەیاڵیدا، من تەنیا بۆ لایەنی سۆزداری و پڕكردنەوەی بۆشایی روحی شیعر نانوسم، لە قۆناغی سەرەتای نووسینم، شیعرەكانم لە( مەركانە شكاوەكانی جەنگ)ەوە ، كە باس لە نەهامەتێكانی سەردەمی شەڕی ناوخۆ دەكەن، بەپێی پێداویستی قۆناغ و سەردەم بەرە بەرە گۆڕانیان بەسەردا هات، هەر لەناونیشانەكانیانەوە ئەوە بەدەر دەكەوێ،( تەیمانێكم لە گوڵ جێهێشت)، باس لەو خۆشەویستانەم دەكەم، كە جگە لەتەیمانێكی گوڵاوی هیچم بۆ بەجێنەهێشتن، لە قۆناغێكی تردا ( ئێواران بۆنی خەوم لێدێ) شێوازێكی عاشقانە و رۆمانسیانە بوو، بەڵام لە (ئەو هەورانەی نەبوون بەماچ) گلەییەكی زۆرم لە ئادەم هەبوو، لە كاتێكدا لە دیوانی ( خەتام كرد دوای ئادەم كەوتم) هەر لەناونیشانەكەیەوە هەست بە گۆڕانی دونیا بینی نووسەر دەكرێت، لە دوا دیوانم دەڵێم نایەمەوە بۆ ماڵی دڵ.
