نڤیسین: حازم بلەیی ( حازمێ سافیایێ)
دەمێ کۆمەلگەها دیانا د ناڤ گێژەلووکا عەڤرێت تاڕی یێت بێئومێدی و بێسەروشوینبوونێ دا نقوم ببوو، سێبەرا مرنێ وەک مژەکا ساڕ و بێبەزەیی، بێی کو چاڤ ل ڕەنگ و ناسنامەیان بگێڕیت، ل دەرگەهێ وژدانا هەمیان ددا. کریستیانێت دەڤەرا بارزان، ئەو ڕۆحێن کو سالانەک بوو ب زۆرداری ژ گوندێت خۆ یێت بەهەشتێت سەر ئاخێ هاتبوونە ڕاگوهاستن، خۆ د ناڤ خەمەکا گران و کویر دا دیت، وان هەست دکر کو جارەکا دی، وەک هەر بارزانییەکێ ڕەسەن، بەرەف چارەنڤیسەکێ تاڕی دچن. ب رەنگەکێ کو ناسنامەیا وان یا بارزانیبوونێ یا ل سەر لێڤا وێ چەندێ کو ب خوین و بێسەروشوینبوونێ بهێتە مۆرکرن.
ل سالا ١٩٨٣یێ و ل وێ ڕۆژا غەریب، هەمی ڕێ بەر ب ناڤ جەرگێ تاڕیاتیێ ڤە دچوون. سەربازێت ڕژێمێ، ب زۆرداری و ب دارێت تفەنگێت خۆ یێت ساڕ و ب کینەکا ڕەش، مێرێت جەمەدانی سووڕ بەر ب دەڤێ پاسێت مرنێ ڤە ڕادکێشان. د ناڤ وێ جەنجالا ترسێ دا، ئەفسەرەک ل سەر ناسنامەیا دوو مێران ڕاوەستا، چاڤێت وی ژ سەرسۆڕمانێ وەک چاڤێت گورگێ شەڤێ زق بوون. ئەو مەسیحی بوون! ئەفسەری ب دەنگەکێ بلند و پڕ ژ گومان هاوار کر:
— هنگ مەسیحی نە! نە بارزانی نە! هەر نوکە ژ ڤێ کاروانێ دابەزن و بچنە مالێت خۆ.
خۆشابە یوخەنا، وەک کەلهەکا دێرین کو باهۆز و بارانان لێدای و هێشتا یێ ل سەر پێیان، بێدەنگ ڕاوەستا. خاچێ ل سەر سینگێ وی، د بن سێبەرا پیرۆزا جەمەدانیا وی یا سووڕ دا، وەک مەشخەلەکێ ئارامیێ دبریسقی. بەرێ خۆ دا ئەفسەری و ب کورتی گوت:
— مە هەمیا ل سەر ڤێ ئاخێ هەناسە کێشایە. ئەم د خۆشیێ دا ئێک بووین، دێ د ڤێ تەنگاڤیێ دا ژی هەر پێکڤە بین.
هەڤالێ وی یێ مەسیحی عەودیشۆ ژی، ب نێڕینەکا تەژی باوەریێ، سەرێ خۆ هەژاند و پشتگیری ل پەیڤێت وی یێت زێڕین کر.
ئەفسەری ب کینەکا توندتر، دەبانجا خۆ ئاراستەی هەبوونا وان کر و گوت:
— بێژن ئەم نە بارزانی نە دا بژین! دێ هنگۆ ئازاد کەین.
خۆشابەی ب نێڕینەکا نەلەرزی، کو وەک ئاگرێ نەورۆزێ یێ هەلکری، بەرسڤ دا:
— ڕاستە ئەم ب ئایین مەسیحی نە، بەلێ ئەم ب دل بارزانی نە و ئەڤە ناسنامەیا مە یا هەبوونێ یە. بۆ دلۆپەکا خوینێ، ئەم حاشایێ ل بارزانیبوونا خۆ ناکەین.
ئەفسەر پتر د کینا خۆ دا خەندقی، ب پاشیا دەبانجێ ل سەری دا و پالەکا ب هێز ل وان دا و ب سەر وان دا قیژاند:
— مادەم هنگ هندە کەلەرەق و نەزانن، پا هەڕن بۆ دۆزەخا خۆ!
ل ڕەخەکێ دی، کەسەکێ شاشک زەر ب دەست و پێیێت لەرزی ڤە دگوت: ئەز نە بارزانیمە، ئەز حەجیمە و خەلکێ دەڤەرەکا دی مە! و هاتە ئازادکرن. ئەو بووە شاهدێ وی دەمی کو خۆشابە و عەودیشۆ، مرنەکا ب شکۆ و وەفاداریێ دگەل برایێت خۆ هەلبژارد.
خۆشابە و عەودیشۆ ب پێنگاڤێت جێگیر، بەرەف سەرکەفتن بۆ پاسا مرنێ ڤە دچوون. ل وێرێ، بێدەنگییەکا غەریب و پیرۆز باڵ کێشابوو سەر هەمی تشتان، بێدەنگییەک کو ژ هەر هاوارەکێ بلندتر و کاریگەرتر بوو. مێرێت جەمەدانی سووڕ وەک دارستانەکا بریندار، بێدەنگ و سەربلند ڕوینشتبوون.
خۆشابەی هێفکرە دەرڤە، بۆ جارا دویماهییێ چاڤێت وی ب قوپکێت چیای کەفتن کو وەک دایکەکا خەمگین ل وان دنێری. دەستێ وی یێ لەرزی چوو سەر خاچێ بن کراسێ وی، و ب دەستێ دی دەستێ هەڤالەکێ خۆ یێ بارزانی توند گرت. چ ئاخفتن نەکرن، چونکو ل وێرێ بتنێ دەنگێ بزوێنەرێ پاسێ دهات کو وەک مارشەکا مرنێ د ناڤ وێ بێدەنگییێ دا دەنگ ددا.
بێتاقەتییەکا گران وەک تەما چیای سینگێ هەمیان دگڤاشت. وان دزانی ئەڤە ڕێکا بێزڤڕینە، بەلێ د ناخێ خۆ دا دگوتن: ئەگەر جەستەیێ مە ل بیابانێ ژی بمینیت، دێ گیانێ مە وەک کۆترێت سپی ل سەر ڤان چیایان پێکڤە فڕن. پاس بەر ب بیابانێت تاڕی یێت بێسەروشوینبوونێ ب ڕێ کەفت و چ جاران نەزڤڕی، بەلێ چیرۆکا وان ل سەر قوپکێ چیای مایە، وەک نیشانەک کو خاچ و جەمەدانیا سووڕ د بن تریفەیا هەیڤێ دا، بوونە ئێک هەناسە، ئێک باوەری و ئێک نیشتمان.
