محەمەد ئامۆكەیی – زاری كرمانجی:
روكاڵ حسێن، چالاكوانی كۆمەڵگەی مەدەنی و ئەندامی ناوەندی بێترمەی سەر بە یەكێتی ئافرەتانی كوردستان، لە هەڤپەیڤینێكی زاری كرمانجی تیشك دەخاتە سەر رۆڵ و كاریگەریەكانی رێكخراوەكەی و جەخت دەكاتەوە، رێكخراوی یەكێتی ئافرەتانی كوردستان توانیویەتی گۆڕانكاری راستەقینە لە دونیا بینینی ئافرەتی كورد بكات و مێژووی ئەم ڕێكخراوەش شاهێدی ئەم دونیا بینینەیە.
*ئایا ئێستا ئەم رێكخراوە لە ئاست ئەو گۆڕانكارییانەیە كە لە كۆمەڵگەدا هەیە؟
ئەم ڕێكخراوە لە مێژووی دروستبوونییەوە هەمیشە هەوڵی داوە لەگەڵ گۆرانكاڕییەكانی كۆمەڵگە خۆی بگونجێنی و بتوانێ بە شێوازێك هاوسەنگی دروستبكات لەگەڵ گۆرانكارییەكان و بتوانێت سودیان لێ ببینێت بۆ خزمەتی ئافرەتان، بەڵام گۆڕانكارییە هەنووكەییەكانی كۆمەڵگەی كوردستانی بە هۆی شەپۆلەكانی جیهانگیرییەوە زۆر خێراو بەپەلەن، بۆیە ڕەنگە قورس بێت كە بە ئاسانی لەئاست ئەو گۆڕانكاریانە بووەستین، بەڵام بێگومان ئەم رێكخراوە بەردەوام چۆكی دانەداوە هەمیشە نوێخوازو نوێ گەرابووە لە ئاست گۆڕانكارییەكان.
* رێكخراوی یەكێتی ئافرەتانی كوردستان چەند توانیویەتی گۆڕانكاری راستەقینە لە دونیا بینینی ئافرەتی كورد بكات؟
بێگومان رێكخراوی یەكێتی ئافرەتانی كوردستان، توانیویەتی گۆڕانكاری راستەقینە لە دونیا بینینی ئافرەتی كورد بكات و مێژووی ئەم ڕێكخراوە شاهێدی ئەم دونیا بینینەیە، كارو چالاكییەكانی چ لە ڕابردوو چ لە ئێستاشدا بۆ داهاتوو هەنگاوی جدی هاویشتووە، ئەم ڕێكخراوە ناوەندێكی گەورەی پێگەیاندنی سەركردەی ئافرەتان بووە، ڕۆڵی هەبووە لە پێناوی دەستەبەر كردنی مافی ئافرەت لە پشك و بەشداری پێكردنیان لە كایە سیاسییە جۆراو جۆرەكاندا، پارێزگاری كردنی لە شكۆی خانمان لە دیدی ئەم ڕیكخراوەوە بۆتە هۆی هاتنە كایەوەی دروستكردنی ژن بە باوەرێكی پۆڵایینەوە.
*ئەم رێكخراوە چەند توانیویەتی كادیری لێهاتووی نەترس بەرهەم بێنێت تا رووبەڕووی ئاستەنگەكانی كۆمەڵگە لە ئاست مێینە ببێتەوە ؟
بەڵی وەكو لە وەڵامی پرسیارەكانی پێشوو تیشكم خستۆتە سەر ئەوەی ئەم ڕێكخراوە قوتابخانەی پێگەیاندی ئافرەتی سەركردە و لێهاتوو بووە كە لەم مێژووی ئەم ڕێكخراوەدا لە شۆڕش و ڕاپەرین و بزوتنەوە كۆمەڵایەتییەكانی كۆمەڵگەدا، ئافرەتان هاوشێوەی پیاوان بەشدارییان كردووە، ئەمەش دەرخەری بوێری ئافرەتان پشت ڕاست دەكاتەوە، بۆیە هەمیشە ئەو ئافرەتانەی دەرچووی ئەم ڕێكخراوەن هەمیشە پاڵپشت و پشتیوانی شكاندنی ئاستەنگەكانی بەردەم ڕەگەزی مێینەن”.
