بەڕێوەبەری ناحیەی بەرمیزە دیاری دەكرێت

موڕشید برادۆستی– سیدەكان:
كابینەی نۆیەمی حكوومەتی هەرێمی كوردستان، بە مەبەستی ئاسانكاری بۆ هاووڵاتییان و شۆڕكردنەوی دەسەڵاتە كارگێڕییەكان، ژمارەیەك ئیدارەی سەربەخۆ و قەزا و ناحیەی نوێی هێنایە كایەوە، لەم دووایانەشدا، هەریەك لە سیدەكان و بەرمیزە كران بە قەزا و ناحیە.
لەو بارەوە، ئیحسان چەلەبی قائیمقامی قەزای سیدەكان بە وەكالەت، بە زاری كرمانجی راگەیاند:” لە مانگی رابردوو، بە قەزا بوونی سیدەكان و بە ناحیە بوونی بەرمیزە دەرچووە، بەڵام بەهۆی نەبوونی باڵەخانەی پێویست هێشتا بەڕێوەبەرایەتی ناحیە لە بەرمیزە نەكراوەتەوە.
قائیمقامی قەزای سیدەكان بە وەكالەت، دەڵێت:” لە قۆناخی یەكەم دەبێ لە رووی بینا و باڵەخانە رێكخستن بۆ ناحیەی بەرمیزە بكرێت، ئەوكات بەڕێوەبەرایەتی ناحیە و پۆلیس و ئاسایش و فەرمانگەكانی دیكەی لێ بكرێنەوە.
گووتیشی:” تا ئێستا بەڕێوەبەری ناحیە دیاری نەكراوە، كردنەوەی بەڕێوەبەرایەتی ناحیە و فەرمانگەكان و دیاری كردنی بەڕێوەبەری ناحیەی بەرمیزە دەكەوێتە دووای سەری ساڵ .
بەپێی زانیارییەكانی دەست زاری كرمانجی كەوتووە، چەند كەسێكی خەڵكی دەڤەری برادۆست و ئیدارەی سۆرانیش هەوڵ دەدەن بكرێنە بەڕێوەبەری ناحیە و بۆ ئەم مەبەستە سیڤیان پێشكەش كردووە و لە داهاتوودا كەسێك وەك بەڕێوەبەری ناحیەكە دیاری دەكرێت .
قەزای سیدەكان لە رووی كارگێڕیەوە سەر بە ئیدارەی سەربەخۆی سۆرانە، خاوەنی 266 گوندە و نزیكەی 20 هەزار دانیشتووی هەیە، لە رێكەوتی 2 – 11 – 2022 بە فەرمانی هەرێمی و سەرۆكی ئەنجوومەنی وەزیران، سیدەكان و بەرمیزە بەشێ,ەیەكی فەرمی كرانە قەزا و ناحیە .