“22 هەزار فەرمانبەری دوو مووچەیی، مووچەكانیان راگیراوە”

محەمەد هەسنانی- سۆران:
وەیسی سەعید، ئەندامی پەرلەمانی كوردستان، لە دیدارێكی زاری كرمانجی دا دەڵێت: لەكاتی دەستبەكاربوونی كابینەی نۆیەم چاكسازی ئەركێكی قورس بوو، بەڵام رژدی و پێداگری سەرۆكی حكوومەت، لە هەموو كەرتەكان چاكسازی دەستی پێ كرد، تا ئێستا قۆناغی زۆر باشی بڕیوە و لە داهاتووشدا بەردەوام دەبێت.
وەیسی سەعید، ئەندامی لیژنەی دەسپاكی لە پەرلەمانی كوردستان، گوتی: لەگەڵ ئەوەی كابینەی نۆیەمی حكوومەتی هەرێمی كوردستان لە دۆخێكی جیاواز دەست بەكار بوو، سەرەڕای بوونی گەندەڵی، رەوشێكی سەختی ئابووریش لەئارا دابوو، بۆیە بارودۆخەكە پێویستی دەكرد كابینەی نۆیەم بەشێك بێت لە چارەسەركردنی كێشەكان، بە پشت بەستن بە كارنامە و ستراتیژیەتی مەسرور بارزانی، كە لە پەرلەمانی كوردستان خستیەڕوو، یاسای چاكسازی پەسندكرا، بۆ رووبەڕووبوونەوەی گەندەڵی و ئەنجامدانی چاكسازی، لەم رووەوە حكوومەت توانی هەنگاوی جددی بنێت بۆ بنبڕكردنی گەندەڵی، هەرچەندە دەستپێكردنی بەرنامەی چاكسازی هاوكات بووە لەگەڵ سەرهەڵدانی پەتای كۆرۆنا، بەڵام لەگەڵ ئەمەش هەنگاوی گرنگ و پێویست لەزۆربەی سێكتەرەكان نراون، ئەم چاكسازیانەش بەردەوامیان هەیە و لە بەرژەوەندی گشتین، وەڵامی هەموو ئەوانەش درایەوە كە دەیانگوت چاكسازی ناكرێت و لە توانای حكوومەتدا نییە”.
گوتیشی: پێویستە لایەنەكان بەتایبەت پێكهێنەرە سەرەكییەكانی كابینەی نۆیەم، پشتگیری هەنگاوەكانی چاكسازی بكەن، كە خودی كابینەكە لەسەر بنەمای هاوپەیمانی چەند لایەنێك پێكهاتووە و لەرێگای نوێنەرەكانیان ئاگاداری هەنگاوەكانی چاكسازین.
لەم چوارچێوەیەدا گرنگە هەڵوەستە لەهەمبەر چەند خالێكدا بكەن:
یەكەم: یاسایی چاكسازی چەترێكە بۆ كۆكردنەوەی دادپەروەری كۆمەڵابەتی كە جیاوازی لە نێوان هیچ پلە و پۆستێك ناكات، چونكە ئامانج لە یاساكە هێنانەدی و بەرجەستەكردنی دادپەروەرییە، هەروەها رێگریكردنە لە بە هەدەردانی بوودجەی گشتی، بۆیە گرنگە هەمووان پابەندی یاسای چاكسازی بن و هەوڵی سەرخستنی بدەن.
دووەم: كابینەی نۆیەم لە ئاست بەڵێن و متمانەی خەڵكی كوردستان دابووە، بەڵێنی بردە سەر و چاكسازی ئەنجام داوە، بەردەوامیشە لەسەری، بەمەش ئەو راستیە دەركەوت، كابینەی نۆیەم بەرامبەر خەڵك و پەرلەمان شەفاف و راستگۆیە و لەئاست بەڵێنەكانی.
سێیەم: چاكسازی لەسەرجەم كەرتەكان دەستی پێكردووە، كە یەكێك بوو لە كارنامە گرنگەكانی كابینەی نۆیەم، لەگەڵ ئەوەی هەنگاوی گەورە نراون، بەڵام هێشتاش ماون.
چوارەم: كابینەی نۆیەم لە ماوەی دەستبەكاربوونی دا رووبەڕوی چەندین قەیران بووەوە، ‌بۆ رووبەڕووبوونەوەی ئەو دۆخە نەخوازراوە لە جیاتی ئەوەی پەنا بۆ قەرزكردن ببردرێت كە سەرەنجام بارگرانییەكی زۆر دروست دەبوو لەسەر هاونیشتمانیان، چونكە رۆژێك دێت دەبێت قەرزەكە بدرێتەوە، خۆشبەختانە بە بەردەوام بوون و پێداگیری لەسەر ‌چاكسازی بەبێ قەرز كردن توانرا دۆخەكە تێ بپەڕێنرێت، بەمەش دواڕۆژێكی گەش لەبەردەم خەڵكی كوردستان واڵا دەبێت كە لە داهاتووی خۆمان دڵنیا دەبین.
پێنجەم: جێبەجێكردنی یاسای چاكسازی هێشتا پێویستی بە كاتی زیاتر هەیە تا هەموو یاساكە جێبەجێ دەكرێت، چونكە یاساكە گشتگیرە پێویستی بە كاتی زیاترە، هەرچەندە لەماوەی رابردوودا حكوومەت هەنگاوی زۆری ناوە، لە شایستە بوون، خەرجكردنی مووچە و دەرماڵە، بەخشین، ئیمتیازاتەكان، نەهێشتنی سوودمەند بوونی ناشایستە، رێگریكردن لە بەهەدەردانی بوودجەی گشتی و بە دامەزراوەیی كردن و یەكخستنی بەڕێوەبەرایەتی گشتی، بەڕێوەبەرایەتی، فەرمانگە و یەكە جیاجیاكانی خانەنشینی لە بوارەكانی شارستانی، سەربازی و هێزەكانی ئاسایشی ناوخۆ لە چوارچێوەی یەك بەڕێوەبەرایەتی گشتی خانەنشینی سەر بە وەزارەتی دارایی و ئابووری، رێكخستنەوەی خانەنشینی خاوەن وەزیفە پلە باڵاكان و پلە تایبەتەكان لەسەر بنەمای تەمەن و ساڵانی خزمەت و بڕوانامە، لەگەڵ ئەنجامدانی بایۆمەتری و كردنەوەی هەژماری بانكی بۆ مووچەخۆران، كە سەرەنجام دەركەوت 22 هەزار فەرمانبەری دوو مووچەی هەبووە و مووچەكانیان ڕاگیراوە.
دۆسیەی فەرمانبەران پێداچوونەوەی بۆ كراوە، خانەنشینیی پلە باڵاكان جێبەجێ كراوە كە مانگانە نزیكەی ٣ ملیار دینار دەگەڕێتەوە خەزێنەی حكوومەت و لە بواری كەسوكاری شەهیدان كاری باش كراوە و هەروەها خانەنشینی پێشمەرگە و یەكخستنی یەكەی ٧٠ و ٨٠ و یەكەی پاسەوانی.
شەشەم : دەبێت بابەتی چەواشەكاری و موزایەدەی سیاسی و یاری كردن بە هەست و سۆز و قوتی خەڵكی كوردستان لە بابەتی چاكسازی دوور بخرێتەوە، كە ستراتیژی كابینەی نۆیەم بریتیە لە دابینكردنی مووچە و پێشكەشكردنی خزمەتگوزارییەكان و باشتركردنی رەوشی ئابووریی لەپێناو چاكتركردنی باری ژیانی هاووڵاتییان بۆیە هیچ پێویست بەموزایەدەی سیاسی ناكات.
هەشتەم: گرنگە لە داهاتوو كار بكرێت بۆ پەسەندكردنی بوودجە لە پەرلەمانی كوردستان، كە بۆ چەندین ساڵ دەچێت بەهۆی دۆخی دارایی نەتواندراوە پڕۆژەی بوودجە ئامادە بكرێت، یەتایبەت ئەگەر بۆ یەكەمین جار بەپشت بەستن بە توانا داراییەكانی هەرێمی كوردستان، بوودجە ئامادەبكرێت، لەگەڵ ئەوەی دەرفەتێكی زۆر باش دەبێت بۆ بووژانەوەی هەرێمی كوردستان، پەرەدانی زیاتر بە شەفافییەت كە بەشێكی گرنگی كارنامەی كابینەی نۆیەمە، بەمەش هاووڵاتیان دەزانن داهات و خەرجی لە هەرێمی كوردستان، ئەمەش راستەوخۆ كاریگەری دەبێت لەسەر بە هێزكردنی متمانەی نێوان حكوومەت و هاووڵاتی.
نۆیەم: ناردنی راپۆرتی بە دواداچوونی جێبەجێكردنی یاسای چاكسازی ژمارە 2ی ساڵی 2020 بۆ چەندین جار لەلایەن حكوومەتەوە بۆ پەرلەمانی كوردستان، جددیەتی حكومەت نیشان دەدات بۆ ئەنجامدانی چاكسازی.