” سرووشتی دەڤەری بارزان بۆتە جێگەی سەرنجی گەشتییاران”

سەفەر سوار: ساڵانە زیاتر لە شەش هەزار سەردانیكەر و گەشتییار روو لە ناوچەكە دەكەن

مستەفا دۆلەمەری- زاری كرمانجی:
لە دیمانەیەكی زاری كرمانجیدا، سەفەر سوار، بەرپرسی بنكەی گەشتوگوزاری قەزای مێرگەسۆر، باس لە كەرتی گەشتیاری لە دەڤەری بارزان دەكات و ئاماژە بەوەدەدات، ساڵانە ژمارەیەكی زۆری گەشتیار لە پارێزگاكانی عێراق و هەرێمی كوردستان روو لە دەڤەرەكەیان دەكەن و دەڵێت:” هەڵكەوتەی ناوچە گەشتیارییەكانی مێرگەسۆر جیاوازە لە گەڵ شوێنەكانی دیكە و كۆمەڵێك رووبار و ئەشكەوت و شوێنی سەرنج راكێشی لێیە، ئەمەش هۆكارە بۆ هاتنی گەشتیاری زۆر، ئاشكراشی دەكات:” لە سنوورەكەمان چەند هۆتێل و مۆتیڵ بوونی هەیە كە بەشێكیان پێنج ئەستێرەن.
لە دەستپێكی قسەكانیدا، سەفەر سوار بەرپرسی بنكەی گەشتوگوزاری مێرگەسۆر، گووتی:” بەگشتی دەڤەری بارزان و سنووری قەزای مێرگەسۆر، ناوچەیەكە وەكو سەیرانگەیەك وایە، ساڵانە لە تەواوی وەرزەكان خەڵكێكی زۆر رووی تێدەكات، بەتایبەتیش لە وەرزی بەهاراندا، دیمەنێكی سەرنج راكێشی هەیە، لەو دەڤەرە زۆربەی دیمەنەكانی گەشتیاری لە خۆی گرتووە، لە ئەمساڵیشدا چەند شوێنێكی نوێ لە ناوچەكەمان كراونەتەوە وەكو رێستوڕانتی چیاكانی رێزان كە شوێنێكی مۆدێرن و سەردەمیانەیە و كافەیە لەگەڵ رێستوڕانت لەسەر بەنداوی رێزان دروست كراوە و لە ئێستادا كاری لەسەر دەكرێت، لە كۆتایشدا بریاڕ دەدرێت كە چەند ئەستێرەی پێببەخشرێت.
زیاتر گووتی:”چەندین شوێنی گەشتییاریمان هەیە لە دەڤەری بارزان وەكو رێستوڕانت و هۆتێلی رێزان و رێستووڕانتی سرووشتی پێدرۆ و ماسی رێزان و هەروەها كافتریای كراوەی جافركا و ئەشكەوتی شانەدەر ئەمانە و چەندین شوێنی دیكەی گەشتیاری، لە وەرزی هاوین چەندین شوێنی ترمان هەیە كە گەشتیار رووی تێدەكەن وەكو رووباری زرارا، چەم، هاواری پیران، باڵندا، گەلی زۆرەكڤان، گەلیێ كۆلیتا، گەلی دالاش .
بەرپرسی بنكەی گەشتوگوزاری مێرگەسۆر، ئاماژەشی بەوەدا:” ساڵانە شەش هەزار سەردانیكەر و گەشتیار، روو لە ناوچە گەشتیارییەكانی قەزای مێرگەسۆر بە تایبەتیش بۆ ئەشكەوتی مێژووی و گەشتیاری شانەدەر و مەزاری نەمران و چەند شوێنێكی دیكەی دەڤەرەكەمان دەكەن، بە شێوەیەكی گشتی كەرتی گەشتوگوزار و پرۆژەكانی ئەو بوارە، هەر لە سەرەتای بوونیادنانەوە هەلی كاری زۆری ناوخۆ دەڕەخسێنێت، بۆیە بەبەردەوامی كاردەكەین و هەوڵدەدەین هەلی كار بڕەخسێنین و ژمارەی گەشتیارانیش بۆدەڤەرەكەمان بەرز بكەینەوە.
سەفەر سوار، روونی دەكاتەوە، ساڵانە پلانی تایبەت بەخۆمان هەیە بۆ گەشتووگوزار و ئەو پلانانەش لە بەڕێوەبەڕایەتی گشتی بە ئامادەبوونی هەموو بنكەكانی گەشتیاری دادەندرێن، یەكێك لە پلانەكانی ئێمەش ئەو ساڵ چەند شوێنمان دیاری كردووە كە گرینگیان پێبدەین و كاریان لەسەر بكرێت، وەكو گەیاندنی خزمەتگوزاریە سەرەتایەكان بۆ ئەو ناوچانە بەتایبەت رووباری زرارا، چەم، گەلیێ زۆرەگڤان، بۆ ئەوەی كاتێك گەشتیار سەردانی ئەو شوێنە دەكەن، بە ئاسانی بتوانێ پیداویستیە سەرەتاییەكانی دەست بكەوێت و زەحمەتی بۆ دروست نەبێت”.
بەرپرسی بنكەی گەشتوگوزاری مێرگەسۆر، دەشڵێت:” چەندین شوێنی مانەوەمان هەیە كاتێك گەشتیار رووی تێدەكات دەتوانێت لێی بمێننەوە، لە ئێستاشدا هۆتێڵێكی پێنج ئەستێرەیمان هەیە كە هۆتێڵ رووبارە و چوار مۆتێلی دیكەش درووست كراون ئەوانیش لە بارزانن گەشتیاران دەتوانن تێدا بمێنێتەوە، لە داهاتووشدا چەندین شوێنی نوێ دەكرێنەوە بۆ ئەوەی بتوانین زۆرترین خزمەت پیشكەش بە گەشتیارانمان بكەین، بە شێوەیەكی گشتی كەرتی گەشتیاری لە سنووری قەزای مێرگەسۆر پێشكەڤتنی باشی بەخۆیەوە بینیوە.
دووپاتی كردەوە، هەڵكەوتەو جوگرافیای دەڤەری بارزان وای كردووە كە بێتە جێگەی سەرنجی زۆربەی هەرەزۆری گەشتیاران، بە تایبەت لە وەرزی پایزدا مێرگەسۆر جیاوازە لەگەڵ ناوچەكانی دیكە، لە كاتی هاتنی وەرزی پایز و دەست پێكردنەوەی قوتابخانەكان گەشتیار لە تەواوی ناوچەكانی دیكە كەمدەكات، بەڵام لە قەزای مێرگەسۆر رێژەی گەشتیاران بە پێچەوانەوە زۆر زیاد دەكات، چونكە ژینگە و سرووشتێكی زۆر جوان و پارێزراوی هەیە و پایزێكی سەرنج راكێشی هەیە، تەنیا لە وەرزی پایزدا هەموو كۆتای هەفتەكان نزیكەی ٣٠٠٠ سەردانیكەر و گەشتیار و شاخەوان سەردانی گەلی زۆڕەگڤان و شوێنە گەشتیارەكانی دیكە دەكەن و گەلی زۆڕەگڤان یەكێكە لەو شوێنانەی كە هەموو كۆتای هەفتەیەكان نزیەكەی ٢٠٠٠ سەردانیكەر رووی تێدەكەن، لە ئایندەدا گەلی زۆڕەگڤان دەبێتە یەكێك لە سەرنج راكێشترین شوێنی گەشتیاری لە سەر ئاستی هەرێمی كوردستان”.