دڵشاد شەهاب: لە تاران جەختمان لە بێلایەنیی هەرێم لە جەنگ کردەوە

گوتەبێژی سەرۆکایەتیی هەرێمی کوردستان رایگەیاند، سەرۆکی هەرێمی کوردستان لە کۆبوونەوەکانیدا جەختی لە بێلایەنیی هەرێم لە جەنگەکەی ناوچەکەدا کردووەتەوە و لەسەر ئاستی ناوخۆش رایگەیاند کە پێگەی دەستووریی هەرێم پارێزراوە و کاراکردنەوەی پەرلەمانیش زۆر دواکەوتووە.

هەینی، 3ـی تەممووزی 2026، دڵشاد شەهاب، گوتەبێژی سەرۆکایەتیی هەرێمی کوردستان، دوای گەڕانەوەی شاندی باڵای هەرێم لە کۆماری ئیسلامیی ئێران، کۆنگرەیەکی رۆژنامەوانی ئەنجامدا. ئەم سەردانەی شاندی هەرێم بۆ تاران بە مەبەستی بەشداریکردن بوو لە رێوڕەسمی سەرەخۆشیی عەلی خامنەیی، رێبەری کۆچکردووی ئەو وڵاتە.

دڵشاد شەهاب رایگەیاند، نێچیرڤان بارزانی، سەرۆکی هەرێمی کوردستان، لەسەر بانگهێشتنامەیەکی فەرمیی تاران سەردانی ئێرانی کردووە و چەندین کۆبوونەوەی گرنگ و باڵای لەگەڵ سەرۆک کۆمار، سەرۆکی پەرلەمان و وەزیری دەرەوەی ئەو وڵاتە ئەنجامداوە. 

سەبارەت بە ناوەڕۆکی کۆبوونەوەکان لە تاران، گوتەبێژی سەرۆکایەتیی هەرێم رایگەیاند: “ئێمە هەڵوێستی روون و فەرمیی هەرێمی کوردستانمان بۆ بێلایەنبوون لە جەنگ و ململانێکانی ئەم دواییەی ناوچەکە دووپات کردووەتەوە. سەرۆکایەتیی هەرێم هەموو هەوڵێکی داوە بۆ پاراستنی بێلایەنیی نیشتمانیی هەرێم؛ هەرچەندە لەم جەنگەدا قوربانی و زیانمان بەرکەوت، بەڵام بەهۆی سیاسەتە هاوسەنگەکانمانەوە توانیمان بە سەرکەوتوویی تێپەڕین.”

دڵشاد شەهاب ئاشکرای کرد، پێگەی هەرێم و سیاسەتی حەکیمانەی گرتنەبەری بێلایەنی، لە لایەن بەشداربووانی جەنگەکە و هێزەکانی تریشەوە رێزلێگیراو بووە و ستایشی هەڵوێستی هەرێمی کوردستانیان کردووە.

هاوکات، پرسی دانوستانەکانی نێوان ئەمریکا و ئێران بۆ کۆتاییهێنان بە جەنگی ناوچەکە، یەکێک بووە لە تەوەرە سەرەکییەکانی گفتوگۆکانی شاندی هەرێم لەگەڵ بەرپرسانی ئێران. دڵشاد شەهاب گوتی: “نێچیرڤان بارزانی پشتیوانیی خۆی بۆ گرتنەبەری رێگەی دیالۆگ و دانوستان بۆ کۆتاییهێنان بە جەنگ دووپات کردەوە، جەختیشمان کردەوە کە هەرێمی کوردستان هەرگیز نابێتە سەرچاوەی هەڕەشە بۆ سەر هیچ کام لە دراوسێکانی.”

شەهاب باسی لەوەش کرد کە پەرەپێدانی پەیوەندییە دوو قۆڵییەکانی نێوان هەولێر و تاران تەوەرێکی دیکەی کۆبوونەوەکان بووە، چونکە هەرێم هەمیشە هەوڵی داوە پەیوەندیی دۆستانە و دراوسێیەتیی باش لەگەڵ ئێران بپارێزێت. سەرکردەکانی ئێرانیش لای خۆیانەوە گرنگیی پەیوەندییەکانیان لەگەڵ هەرێمی کوردستان دووپات کردووەتەوە.

گوتەبێژی سەرۆکایەتیی هەرێم راشیگەیاند: “پێشوازیی زۆر گەرم و گرنگیپێدانی بەرپرسانی تاران بە سەرۆکی هەرێمی کوردستان لە نێو ئەو خشتە قەرەباڵغەی کە بەهۆی پرسەکەوە هەیانبوو، نیشانەیەکی روونی پێگە و گرنگیی مێژوویی و ناوچەیی هەرێمی کوردستانە لە کایەی دیپلۆماسیدا.”

لە وەڵامی پرسیاری رۆژنامەنووساندا سەبارەت بە دۆخی ناوخۆی هەرێمی کوردستان، دڵشاد شەهاب ئەو دەنگۆیانەی رەتکردەوە کە باس لە خراپیی بارودۆخی سیاسیی هەرێمی کوردستان دەکەن و گوتی: “پێگەی سیاسی و دیپلۆماسیی هەرێمی کوردستان هێشتا زۆر بەهێزە. راستە کێشە ناوخۆییەکان کاریگەرییان هەیە، بەڵام هەرێمی کوردستان لە مەترسیدا نییە و کێشە سیاسییەکان هەرگیز نابنە سەرچاوەی هەڕەشە لەسەر پێگەی دەستووریی هەرێم.”

سەبارەت بە کاراکردنەوەی پەرلەمانی کوردستان، دڵشاد شەهاب جەختی کردەوە: “خەڵکی کوردستان و وڵاتانی هاوپەیمانیش چاویان لەوەیە کە پەرلەمان کارا بکەینەوە، چونکە ئەم بابەتە زۆر دواکەوتووە و کاراکردنەوەی پەرلەمان مافێکی سەرەتایی و فەرمیی گەلی کوردستانە.”