گوڵستان بەهجەت
حکومەتی هەرێمی كوردستان هەمیشە بەو پەڕی متمانە بەخۆبوون و بەپشت بەستن بە جەماوەری نیشتیمانپەروەر، رووبەڕووی ئاڵەنگارییە سیاسی و سەربازی و ئابوورییەكان بۆتەوە و بە سەركەوتوویی بەسەریاندا زاڵ بووە و زۆربەی قۆناغە ناخۆش و ئاستەنگە زەحمەتەکانی تێپەڕاندووە.
بە دڵنیاییەوە لە ئێستادا هەرێمی كوردستان بەرەو گۆڕانكاری هەمەچەشنی دەوڵەتمەداری و بەڕێوەبردنی مۆدێرن هەنگاو دەنێت، گۆڕانكارییەکە بە جۆرەکە كە لەگەڵ سیستهمی نوێی ناوچەکە و جیهان یەكانگیر و گونجاوە.
ئەم پلانە پڕۆسەی دیموكراسی بەهێزتر دەكات و شكۆ بۆ تاك بە تاكی خەڵکی هەرێمی کوردستان بەهێزتردەکات، شەفافییەتی زیاتر دێنێتەكایەوە، رێگری لە مافیاچییەتی و گروپگەرایی لە نێو هەندێ شوێن دەكات، دەروازە سنوورییەكان بە یەكەوە دەبەستێتەوە بە سیستەمی نوێی تەکنەلۆجی و قاچاغچییەتی گرووپ و لایەنەكان و هەندێ گرووپ بنبڕ دەكات.
هەموو ئەمانەش هەرێمی كوردستان زیاتر لەوەی ئیستا بەهێزتر دەكات و پڕۆژە ستراتیژییەكانی خۆبەرێوەبردن دەگەینێتە ئاستی هەرە باڵا، بۆ نموونە پڕۆژەی روناكی، هەژماری من، ئاسایشی ئاو، پاراستنی ژینگەیەكی خاوێن، بە دیجیتاڵ كردنی دامەزراوەكانی حكومەت، یەكگرتنی هێزی پێشمەرگەی كوردستان، دابینكردنی ئاسایشی كەم وێنە، بەرز كوالێتی خۆراك، دابەشكردنی زەوی بەسەر فەرمانبەران و هاووڵاتییان، چاودێری توندی بازاڕ بۆ ریگری لە قۆرەغكاری، گەشە پێدانی بواری گەشتیاری، هاتنی سەدان كۆمپانیای نێودەوڵەتی بۆ وەبەرهێنان لە هەرێمی كوردستان، پەیوەندی بەهێزی دیپلۆماسی نێوخۆیی و هەرێمی و جیهانی.
ئەمانەی باسكران كاریگەرییان لەسەر داهاتی سەرجەم هاووڵاتییانی هەرێمی کوردستان دەبێت و هەلی كاری زیاتر دەستەبەر دەكات و بۆ چەند ساڵی داهاتوو كاریگەرییە هەمەچهشنەكانی بەسەر گشت كایەكانەوە دەبیندرێت و هەرێمەکەمان زیاتر دەبوژێتەوە و ئاوەدانی زیاتر دەبێت.
بە خۆشحاڵییەوە ئەم دەستكەوتانە بوونەتە جێگەی متمانەی كوردستانیان، لە هەمانكاتیشدا بۆتە دێوزمەی ناحەزانی كورد و کوردستان، بە هەمان ئەندازەش بۆتە هۆی زیان گەیاندنی بە هەندێك لایەنی سیاسی و گرووپ كە لە رابردوو تا ئێستاش بە هۆی ناسیستماتیك بوونی دامەزراوەكانی حكومەت سوودی خیاڵیان دەكرد و بە ملیۆنان دۆلاری گەندەڵیان دەستدەکەوت، بۆیە هەندێک لە گرووپە گەندەڵ و چەتەکان بەهەموو شێوەیەك رێگری لە سەركەوتنەکانی كابینەی نۆیەم دەكەن و هەموو هەوڵێکیان بۆ ناشرینکردنی جوانییەکانە، بۆیە هەر لەبەر ئەمەشە دەست بۆ هەموو بوارێك دەبەن تا پلانەكانی حكومەت سەركەوتوو نەبێت، ئەو كەس و گرووپانە بە هەڕەشەی جیاجیا دەیانەوێت وای نیشان بدەن كە هەڕەشە لەسەر نەمانی حکومەتی هەرێمی كوردستان هەیە لە كاتێكدا پێگەی هەرێمی کوردستان لە دەستووری ساڵی 2005ـی عێراقدا جێگیر کراوە و وەک قەوارەیەکی یاسایی ناسێنراوە، هیچ لایەنێك ناتوانێت حکومەتی هەرێمی كوردستان لە نێو ببات.
ڕوون و ئاشکرایە ئەوەی بییەوێت پێگەی هەرێمی کوردستان لاواز بکات، دەیەوێت عێراق لاواز بکات و ئاسایشی نیشتمانی وڵات بخاتە ژێر هەڕەشەوە و ئەوانەش دوژمنی هەرێم و عێراقن.
هەرێمی كوردستان، لە گەشە بەردەوام دەبێت، ناحەزانیش بەردەوام دەبن لەسەر چاندنی بۆمب لەسەر رێگای پێشكەوتن، دواجار ئەوەی سەردەكەویت خەمخۆرانی راستەقینەی نەتەوە و نیشتمانن.
