نووسینی د. ساماڵ مانیی
لە بەریتانیا دەپرسن: ئایا مێری ئیلیزابت ترەس دەبێت بە ژنە ئاسنینەكەی كە پێشتر یەكەم ژنە سەرۆك وەزیران بووە لە بەریتانیا ؟
ترەس لە هەمان حیزبەكەی مارگریت تاتچەرە كە یەكەم ژنە سەرۆك وەزیرانی بەریتانیا بوو و بە ژنە ئاسنینەكەی بەریتانیا ناوبانگی دەركرد و ماوەی لە ساڵی (١٩٧٥ وە هەتا ١٩٩٠) پانزە ساڵ سەرۆكی حیزبەكەی بوو، لە (١٩٧٩ وە هەتا ١٩٩٠) یانزە ساڵیش سەرۆك وەزیرانی بەریتانیا بوو.
ئەو حیزبەی ئەم دوو ژنەی تیا بوون بە سەرۆك و سەرۆك وەزیران، حیزبی كۆنپارێز/موحافزین،كۆنسێرڤاتیڤ/تۆری یە لە بەریتانیا كە لە (١٨٣٤ ) سەدەی نۆزدەدا دامەزراوە، سەد و هەشتاو هەشت ساڵ لەمەوبەر. لەو كاتەدا تەنها دوو حیزبی سەرەكی دژە پرنسیپی یەكتری لە بەریتانیا هەبوون: حیزبی كرێكاران/لەیبەر كە لە ساڵی (١٩٠٠) سەرەتا ساڵی سەدەی بیست دا دامەزرا، بەرامبەر بە حیزبی خاوەن سەرمایەكان/تۆری یا كۆنپارێزەكان كە (٦٦) ساڵ پێشتر دروست ببوون و سەرۆكایەتی وڵاتەكەیان لە بن دەستدا بوو. ئەم دوو حیزبە هەتا ئێستاش ڕەكابەری یەكترین، بەڵام پرنسیپ و سیاسەتیان وەك كاتی دروستبوون و مێژووی خەباتیان نیە، كۆنپارێزەكان بە لای چەپدا كشاوون و كرێكارەكان بەرەو سەنتەر.
مارگریت تاتچەر ئەو ساڵەی من پاش دایكم لە كوردستان چوومە ناو سیاسەتەوە، ئەو چەند ساڵێك بوو سەرۆكی حیزبەكەی بوو و یەكەم ساڵی بوون بە سەرۆك وەزیرانی وڵاتەكەی بوو لە بەریتانیا. ئەو ساڵەش كە من وەك پەنابەری سیاسی گەیشتمە بەریتانیا ئەو هێشتا هەر سەرۆكی حیزبەكەی و سەرۆك وەزیران بوو، بەڵام نازناوی ژنە ئاسنینەكەی لێنرابوو، ئەو نازناوەی چەند لەبەر بەهێزبوونی پێی بەخشرا بوو هێندەش لەبەر خراپی و تووندیی سیاسەتەكەی بوو. من خۆمم دێتەوە بەرچاو لە چەندین خۆپیشاندانی ناو بەریتانیادا دژ بە سیاسەتی تاتچەر.
یەكێك لەو خۆپیشاندانانەم دژ بە تاتچەر، لەگەڵ زۆر لە ئەندام پەرلەمانەكان و سەرانی حیزبەكان و ڕۆشنبیران و هونەرمەندان و نوسەران و خوێندكاران و مامۆستاكان و ژنان و میدیاكاران و هەموو ئەوەی كە ناویان هەبوو لە بەریتانیا، دژ بە سەپاندنی یاسای نوێی كاونسڵ تەكس/زەریبەی سەرانە بوو لە لایەن تاتچەرەوە كە هەتا ئەمڕۆ هاووڵاتیانی بەریتانیا پێوەی دەناڵێن و هەموو كەسیك كە لە بەریتانیا دەژی ساڵانە لە هەزار پاوەند زیاتر سەرانە دەدات بە حكومەتی بەریتانیا سەرەڕای زەریبەكانیتر.
ئیلیزابیت ترەس نابێت بە ژنە ئاسنینەكەی بەریتانیا، سیاسەتی حیزبەكەشی ئەو سیاسەتەی ئەوسا نیە، بەڵام دەبێت بە سەرۆكی حیزبەكەی و سەرۆك وەزیران لە بەریتانیا، هەموو ئاماژەكان بەرەو ئەوە پەنجە ڕادەكێشن، بە تایبەتی ئەوەی ترەس دەكات بە سەرۆك وەزیران ئەو پەیمانەیە كە بە هاووڵاتییان و حیزبەكەی خۆی داوە لە ئێستادا: داڕشتنی پلانێك كە تاكس/زەریبە كەم بكاتەوە لەسەر خەڵك، لەگەڵ داڕشتنی پلانی ڕاگرتنی بەرزبوونەوەی زیاتری نرخی گاز لەسەر هاوڵاتیان كە ئەمساڵ گیرفان هەڵدەتەكێنێ لەبەر بەردەوامی شەڕی نێوان ئەورۆپا/ یۆكرەین و ڕووسیا.
ترەس سەركەوتوو دەبێت یان نا، نادیارە، بەڵام ئەمە ئەو پەیمانەیە كە پێی دەبێت بە سەرۆكی حیزبەكەی و بە سەرۆك وەزیرانی بەریتانیا.
