ئەژین غەفار-زاری کرمانجی
بریکاری وەزارەتی بازرگانی و پیشەسازی حکوومەتی هەرێمی کوردستان ئاشکرای کرد کە لە سەرەتای وەرزی کڕینی گەنمەوە تاکو ئێستا، نزیکەی 82 هەزار تۆن گەنم لە جووتیاران وەرگیراوە؛ ئەو بڕەش نزیکەی پێنج یەکەمی کۆی گەنمی دیاریکراو بۆ وەرگرتن پێکدەهێنێت.
سەروەر کەمال هاواری وتی، پرۆسەی وەرگرتنی گەنم لە 10ی حوزەیران لە دهۆک، 11ی حوزەیران لە هەولێر و 12ی حوزەیران لە سلێمانی دەستی پێکردووە. بە گوێرەی زانیارییەکانی ئەو، سایلۆکان بە شێوەی 24 کاتژمێری کار دەکەن و جووتیاران لە هەر کاتێکی شەو و ڕۆژدا دەتوانن بەرهەمەکانیان ڕادەست بکەن.
بە وتەی هاواری، هێشتا زیاتر لە 307 هەزار تۆن گەنم ماوە وەرگیرێت، کە نزیکەی 79%ی بڕی گشتیی پلاندانراو پێکدەهێنێت. هەروەها ئاماژەی دا کە وەزارەت لەگەڵ وەزارەتی بازرگانی عێراق لە پەیوەندی دایە بۆ ئەوەی بڕی گەنمی وەردەگیرێت لە جووتیارانی هەرێم زیاد بکرێت.
ئەو بەرپرسە هیواخوازە کە پرۆسەی کۆکردنەوە و وەرگرتنی گەنم تا 10ی تەمموز بەردەوام بێت. لە هەمان کاتدا، ئاماژەی بە سیستمی ئەلیکترۆنیی نۆرەگرتن کرد و رایگەیاند، ئەم سیستەمە بۆ یەکەمجارە لە ئاستی عێراق بەکار دەهێنرێت و ئەرکی ڕێکخستن و ئاسانکردنی خزمەتگوزارییەکان بۆ جووتیاران دەگرێتە ئەستۆ.
