ئەژین غەفار-زاری کرمانجی
ئەمڕۆ سێشەممە، ٢٣ی حوزەیرانی ٢٠٢٦، لە رێوڕەسمێکدا بەردی بناخەی کارگەی “داسن” بۆ بەرهەمهێنانی ژیناو و موغەزی لە سنووری ئیدارەی سەربەخۆی زاخۆ دانرا.
د. سامان بەرزنجی، وەزیری تەندروستیی حکوومەتی هەرێمی کوردستان، لە وتارێکدا رایگەیاند ئەم پڕۆژەیە یەکێکە لە پڕۆژە ستراتیژییەکانی هەرێم و هەنگاوێکی گرنگە بۆ پەرەپێدانی بەرهەمی ناوخۆیی و پشتگیریی کەرتی تایبەت.
بە وتەی وەزیری تەندروستی، دامەزراندنی ئەم کارگەیە دەبێتە هۆی کەمکردنەوەی پێویستی بە هاوردەکردنی پێداویستییە پزیشکییەکان و بەهێزکردنی ئاسایشی دەرمان لە هەرێمی کوردستان.
هەروەها ئاماژەی بە چاکسازییەکانی کەرتی دەرمان کرد و گوتی حکوومەتی هەرێمی کوردستان لە چەند ساڵی ڕابردوودا هەنگاوی گرنگی ناوە بۆ ڕێکخستن و کۆنترۆڵکردنی بازاڕی دەرمان و سنووردارکردنی دەرمانی قاچاخ.
زانیارییەکانی تایبەت بە پڕۆژەکە بە کورتی:
– ناوی پڕۆژە: کارگەی داسن بۆ بەرهەمهێنانی ژیناو و پێداویستییە پزیشکییەکان.
– شوێن: ناحیەی باتێل لە ئیدارەی سەربەخۆی زاخۆ.
– رووبەر: 45,000 مەتر چوارگۆشە.
– گوژمە: 22 ملیۆن و 250 هەزار دۆلار.
– وەبەرهێنەر: کۆمپانیای شەماڵک میدیکاڵ (بە خاوەندارێتیی عەلی غازی عەبدوڵڵا).
– ماوەی جێبەجێکردن: 36 مانگ.
توانای بەرهەمهێنانی ساڵانەی کارگەکە:
– ژیناو (مەغەزی): 12 ملیۆن بوتڵ.
– حەب: 3 ملیۆن و 500 هەزار دانە.
– دلۆپێنەر (قەترە): 2 ملیۆن دانە.
– سرنج و دەرزی: 1 ملیۆن دانە.
گرنگی، ئامانج و پێکهاتەی پڕۆژەکە:
– ئاسایشی تەندروستی:
زیادکردنی بەرهەمی ناوخۆیی کوالێتی بەرز، کەمکردنەوەی دەرمانی هاوردە، و خۆئامادەکردن بۆ هەر قەیرانێکی چاوەڕواننەکراوی دەرمان بە نرخێکی گونجاو.
– هەلی کار: لە کاتی دروستکردنیدا، دەرفەتی کار بۆ زیاتر لە 200 کەس لە ناوچەکە دەڕەخسێنێت.
– پشتگیریی زانستی: دەبێتە پاڵپشتییەک بۆ لێکۆڵینەوە زانستی و پەروەردەییەکان.
– پێکهاتەی مۆدێرن: بەپێی بەرزترین ستانداردی پزیشکی دروست دەکرێت، کە پێکهاتووە لە: تاقیگەی هاوچەرخی کۆنترۆڵی جۆری، کۆگای جیاواز بۆ کەرەستەی خاو و بەرهەمی کۆتایی، هۆڵی تایبەتی بەرهەمهێنان، باڵەخانەی خزمەتگوزاری، و رووبەری سەوزایی و پارکینگ.
