د. كاوە عومەر : ئێمە زیاتر منداڵەكانمان هاندەدەین تووشی ڤایرۆس ببن
شەهلا رەشید- زاری كرمانجی :
چەند جۆرە چبسێك لە شارەكانی عێراقەوە هاوردەی كوردستان كراون كە بە زمانی عەرەبی لەسەری نوسراوە و كڕیارێكی زۆری هەیە لە نێو منداڵان بەوەی لە نێو چبسەكەدا دیاری تایبەتی تێدایە، بەڵام هەروەكوو باس دەكرێت جگە لە 250 دیناری تا ئیستا هیچ دیارییەكی تایبەت بۆ هیچ كام لە منداڵان دەرنەچووە، زاری كرمانجی وێنەی بەشێك لە چبسەكانی لایە بە بێ هیچ پارێزییەك پارەكە خراوەتە نێو كیسەكە، كە ئەمەش كاریگەری لەسەر تەندروستی ئەو منداڵانە دروست دەكات كە چبسەكە دەخۆن.
د. كاوە عومەر، پزیشكی پسپۆڕی منداڵان، سەبارەت بەم جۆرە خواردنانەی كە منداڵان لە دەرەوە دەیخۆن هۆشداری بە باوان دەكات و دەڵێ ” ئێستا جەوەكە بە تەواوی گۆڕاوە و زیاتر بەرەو سەرما دەچێت، لە وەرزەكانی پایز و زستان ڤایرۆس زیاتر بڵاو دەبێتەوە لەناو منداڵەكان دا، لەبەر ئەوەی وەرزی خوێندنە، ئەوان لە قوتابخانەكان زیاتر تێكەڵاوی یەكتر دەبن، ڤایرۆسێك هەیە بەناوی RS كە زۆر خێرا بڵاو دەبێتەوە، بۆیە پێویستە لەسەر دایكان و باوكان زیاتر ئاگاداری منداڵەكانیان لەرووی خواردن و خواردنەوە، بەتایبەت خواردنەكانی دەرەوە كە بەشێكی زۆر لە منداڵان حەزیان لێیە.”
لە بارەی ئەو چبسەی كە 250 دیناری تێدایە وەك دیاری، د. كاوە دەڵێ” ماوەیەكە چبسێك لە عێراقەوە رەوانەی هەرێمی كوردستان دەكرێت كە 250 دینار لەناویدایە، كڕیارێكی زۆریشی هەیە، بەداخەوە ئێمە بە ئاسایی رێگە دەدەین منداڵەكانمان ئەم جۆرە چبسە بكڕن و بخۆن، كەچی باش دەزانین كە پیسترین ڤایرۆس لەناو پارەدا هەیە، لەبەر ئەوەی ئەم پارەیە بە هەزاران دەست وەردەگیرێت، ئێمە دەبێ رێگر بین لە بڵاوبوونەوەی ڤایرۆس و منداڵەكانمان بپارێزین نەك پارە بە منداڵ بدەین كە خۆراكی زەرەرمەندی پێ بكرێت، بۆیەش پێویستە وەزارەتی تەندروستی رێگە نەدات ئەم جۆرە خۆراكانە بێنە ناو هەرێمی كوردستان، هەر كارگەیەك ئەم جۆرە خۆراكانە بەرهەم بهێنیت، ئەگەر لە هەرێمی كوردستان بوو پێویستە سزا بدرێن و ئەگەر لە دەرەوەی هەرێمی كوردستان بوو دەبێ رێگر بن و رێگە نەدەن هەناردەی هەرێم بكرێن.”
