زاری كرمانجی :
دوای سەردانی شاندێكی حكومەتی هەرێمی كوردستان بۆ بەغدا و كۆبوونەوە لەگەڵ بەرپرسانی حكومەتی فیدراڵی، ئەنجومەنی وەزیرانی عێراق، بڕیاریدا بە ناردنی 400 ملیار دینار وەكو پشكی هەرێمی كوردستان بۆ مانگەكانی 11 و 12 ی ساڵی 2022 .
ئاوات شێخ جەناب، وەزیری دارایی و ئابووری، ئەندامی شاندی حكومەتی هەرێمی كوردستان بۆ بەغدا، بە پێگەی فەرمی حكومەتی هەرێمی كوردستانی ڕاگەیاند كە بابەتی نەوت، بوودجە و پشكی هەرێم لە بەشە بوودجەی 2023ـی عێراق، لەو بابەتانەن كە بۆی هاتوون. لەبارەی ناردنی پشكی هەرێم گوتی: “وەزارەتی دارایی عێراق، لە تەواوی ساڵی 2022 دا، تەنیا دوو مانگ پارەی بۆ هەرێمی كوردستان خەرجكردووە”.
وەزیری دارایی و ئابووری، گوتیشی:”بەشێكی سەردانەكەمان تایبەت بوو بە داكۆكیكردن لە بەشە بوودجەی هەرێم، هەروەها ئەو كێشانەی كە پێشتر لەنێوان هەولێر و بەغدادا هەبوون، هەروەها كێشەی میلاكاتی فەرمانبەران، بابەتی خەرجی و داهاتمان بەتەواوەتی چارەسەر كرد.”
بابەتێكی دیكە كە گفتوگۆی لەسەر كراوە، بابەتی نەوتە، كە بووەتە كێشەیەكی هەڵپەسێرداوی نێوان هەولێر و بەغدا، ئاوات شێخ جەناب، ئاماژەی بەوەدا كە لە كۆبوونەوەكانیان گفتوگۆیان لەبارەی نەوتەوە كردووە و هەنگاوی زۆر باشیان ناوە و تاڕادەیەك لێكتێگەیشتن لەنێوانیان هەیە. لەبارەی درەنجامی كۆبوونەوەكایشەوە گوتی:” كۆك بووین لەسەر ئەوەی كە لە چوارچێوەی دەستوور و ڕێككەوتنی سیاسی و بەرنامەی وەزاری حكومەتی نوێی عێراق، چارەسەر بۆ ئەو بابەتانە بدۆزینەوە”.
وەزیری دارایی و ئابووری ئەوەشی گوت:” وەكو وەزارەتی دارایی و ئابووری، بە فەرمی داوامان ئاراستەی وەزارەتی دارایی عێراق كردووە، بۆ خەرجكردنی پشكی هەرێمی كوردستان، لە كۆبوونەوەمان لەگەڵ وەزیری دارایی عێراق و لیژنەی ئابووریش باسمان لەوە كردووە و بەڵێنیان پێداین، كە لە ئەنجومەنی وەزیران پێشنیاری بكەن. دوای هەوڵەكانی شاندەكەش، ئەنجومەنی وەزیران بڕیاری دا كە پارەی دوو مانگی هەرێم بۆ هەرێمی كوردستان بنێرێت.”
ئاماژەی بەوەش كرد، ئەمجارە بەراورد بە جارەكانی دیكە، تاڕادەیەكی زۆر گەشبینترن و دەرئەنجامی گفتوگۆیەكان بە دڵی هاووڵاتییان دەبن، هەوڵی زۆریشیان داوە بابەتی بوودجە و پشكی فەرمانبەرانی هەرێمی كوردستان مسۆگەر بكەن، بەشێوەیەك كە نەكەوێتە ناو كێشمەكێشی سیاسی و قۆزتنەوەی سیاسیش دژی هەرێمی كوردستان بكرێت.
لەبارەی كەشی كۆبوونەوەكانەوە، ئاوات شێخ جەناب كە ئەندامێكی شاندەكەی هەرێمە بۆ بەغدا، گوتی:” دەرئەنجامی كۆبوونەوەكان ئەرێنین و وەكو چۆن سێ ڕۆژە ئێمە بە ئەرێنی بینوویمانە.”
