ئەندامێكی پەرلەمانی كوردستان: یەكێتی لە بەرپرسیاریەتی رادەكات و ئامادە نییە بەرژەوەندیە گشتییەكان بخاتە سەرووی بەرژوەندی تایبەتی و حیزبییەكانیان

زاری كرمانجی – سۆران
ئەندامێكی فڕاكسیۆنی پارتی لە پەرلەمانی كوردستان رایدەگەینێت، بریارەكەی ئەنجومەنی وەزیرانی فیدراڵ، بە ناردنی 400 ملیار دینار بۆ هەرێمی كوردستان، كارێكی گرنگ وپێویست بوو تا نیازپاكی و پابەندبوونی حكومەتی فیدراڵ بۆ خەڵكی كوردستان بە دیاربكەوێت بەو ڕێككەوتننەی لەماوەی رابردوودا حكومەتی عێراقی لەسەر پێكهاتبوو بەلام ئەوەی ماییە هەڵوەستەكردنە، رونكردنەوەی راگەیاندنی فەرمی یەكێتی بوو كە هەرز و ویستی خۆی بكاتە خاوەنی ئەم بڕیارە.
وەیسی سەعید، دووپاتی كردەوە:” خەڵكی كوردستانیش باش دەزانێ، لەسەر پەردەپۆش نەكردنی تاوانە قێزەونەكەی تیرۆركردنی عەقید هاوكار جاف، تیمی وەزاری یەكێتی و خودی جێگری سەرۆكی حكومەت بایكۆتی كۆبوونەوەكانی ئەنجومەنی وەزیرانیان كردووە و بەشداریشیان لە شاندی هەرێمی كوردستان نەكرد بۆ دانوستان لەگەڵ بەغدا بۆ داكۆكیكردن لە مافەكانی خەڵكی كوردستان.
ئەو ئەندامەی پەرلەمانی كوردستان، ئاشكراشی كرد:” ئەم دەستكەوتە و دەسكەوتەكانی دیكەش كە بۆخەڵكی كوردستان بەدەستهاتوون لە ئەنجامی پێداگیری خودی مەسرور بارزانی سەرۆكی حكومەت بووە، كە یەكەمین كاری دیپلۆماسی كابینەی نۆیەم سەردانكردنی بەرێزیان بوو بۆ بەغدا، بۆچارەسەركردنی كێشەو گرفتە داراییەكانی هەرێمی كوردستان، هەروەها قبوڵیشی نەكرد ئیڕادەی گەلی كوردستان بشكێت و پێداگیر بوو لە سەر مافە دەستوورییەكانی هەرێمی كوردستان و وازی لێنەهێنان. ئەمەلەكاتێكدا بوو لەناوخۆی هەرێمی كوردستان بە ئاشكرا لایەن و كەسانێك هەبوون دەیانویست هەموو شتێك رادەستی بەغدا بكرێت و شتێك نەمێنێت بەناوی هەرێمی كوردستان.
گووتیشی:” بەداخەوە ئەم جارەشیان وەك پیشەی هەمیشەیان راگەیاندنی فەرمی یەكێتی، دەیەوێت خۆڵ بكاتە چاوی خەڵك و خۆیان بكەنە هاوبەش و خاوەنی دەسكەوتەكان، بەڵام لە كاتی پێویستیشدا، لە بەرپرسیاریەتی رادەكەن و ئامادە نین بەرژەوەندی باڵای خەڵكی كوردستان بخەنە سەرووی بەرژوەندییە تایبەتی و حیزبییەكانیان”.