بایكۆت و 400 ملیارد دینارەكە

ئیسماعیل ئیبراهیم
سەردانی شاندنی باڵای حكومەتی هەرێمی كوردستان بۆ بەغدا و دانوساندن كردن لەگەڵ لایەنە حكومی و سیاسییەكانی عێراق، لە پێناو بەدەستهێنانی دەستكەوتی زیاتر بۆ هەرێمی كوردستان، لە ئەنجامی رێككەوتنی پێشوەختەی سیاسی بووە، كە دەشێ رێككەوتنەكانی لایەنە سیاسییەكانی عێراق لەگەڵ سەرۆك بارزانی و دواتریش سەردانی سەرۆكی هەرێمی كوردستان بۆ بەغدا و پەیوەندییە بەردەوامەكانی مەسرور بارزانی سەرۆكی حكومەتی هەرێمی كوردستان لە گەڵ سەرۆكی حكومەتی ناوەندی و لایەنە سیاسییەكان بوونە هەوێنی ئەم دەستكەوتانەی ئێستا و لە داهاتوو هەرێمی كوردستان دەیدوورێتەوە.
چانسی خراپی پارتی هەمیشە ئەوە بووە لە دەستكەوتەكان لایەنە سیاسییەكان بە تایبەتی یەكێتی خۆی دەكاتە هاوبەش و كەناڵەكانی راگەیاندنی خۆی لەم بارەوە جۆش دەدات، بەڵام بە شێوەیەكی مەیدانی هەمیشە وەك ئۆپۆزسیۆن مامەلەی كردووە و بەردەوام كۆسپی بۆ كابینەی ئێستا دروست كردووە، كە بایكۆت كردنی جێگری سەرۆك وەزیران و ژمارەیەك لە وەزیرەكانیان لە چالاكییەكانی حكومی دواین هەڵوێستیان بووە.
تیمی یەكێتی بە فەرمانی سەرووی خۆیان كە حزبە بایكۆتی دەوامیان كردووە، بەرپرسە باڵاكانیان لە كەناڵەكانی راگەیاندن ئەوەیان خستۆتەروو كە بەشدار نین لە كارەكانی حكومەت، بەڵام كاتێ شاندی باڵای حكومەت بە دەستكەوتی مەزن و دەستی پڕەوە بۆ نەتەوەی كورد و كوردستانیان لە بەغدا دەگەرێنەوە خۆیان دەكەنە هاوبەشی راستەقینەی دەستكەوتەكان، بەڵام ئەگەر ئەم شاندە بە دەستی بەتاڵ گەڕبانەوە ئەو كات تیمی وەزاری یەكێتی دەیانگووت ئێمە بایكۆتمان كردووە و بەرپرسیارییەتی ناگرینە ئەستۆ، ئەمە كاری لە مێژینەی یەكێتی و بەشێكی زۆری حزب و لایەنە سیاسییەكانی كوردستان بووە.
بەڵام دواجار خەڵك باش لەو یارییەی یەكێتی تێگەیشتووە، بۆیە ناكەونە ژێر كاریگەری ئەو راگەیاندنانەی فرمێسكی تیمساحی دەرێژن.
پارتی و تیمی وەزاریشی لە حكومەت وەك پێشەی هەمیشەییان و بە سەربەرزییەوە، شانی لەبەرپرسیارییەت خاڵی نەكردووە و ناشی كات.
دەستكەوتەمەزنەكان هەمیشە شوێن پەنجەی پارتی پێوەدیار بووە و پشكی شێری بەر پارتی كەوتووە، لە نەهامەتییەكانیش هەر پارتی شانی داوەتەبەر بۆ نەهێشتنیان.