پێداچوونەوەی: محەمەد هەسنانی
رەشید سەبری، مامۆستای شۆڕشی ئەیلوول لەساڵی 1945 لە شاری رواندز لە دایكبووە، لە 15ی7ی2022 دڵە گەورەكەی لە لێدان كەوت و بۆ هەمیشە ماڵئاوایی كرد، مەبەستمانە پۆختەیەك لە ژیان و بەسەر هاتی بخەینەڕوو، كە لەلایەن ئەكاونتی هەواڵی رواندز بەر لە كۆچكردنی دیدارێكی لەگەڵ سازكراوە.
م. رەشید سەبری، بۆ یەكەمجار لە ساڵی 1952 چۆتە قوتابخانە و خوێندنی قۆناخەكانی ناوەندی دواناوەندی لە رواندز تەواو كردووە و دەرچووی بەشی كشتوكاڵە، پێش دامەزارندنی دوای ساڵی 1967 وەك مامۆستای شۆڕش وانەی داوەتەوە، بەڵام بەفەرمی ساڵی 1970 دوای بەیاننامە مێژوویەكەی شۆڕشی كورد، لە بەكرەجۆی سلێمانی دامەزرا و لەوێ وانەی وتووەتەوە”.
لە ساڵی 1967 بووتە پێشمەرگە و كادیر لە ناو پردان لە مەكتەبی سیاسی، لەگەڵ دوو مامۆستای دیكە دەكرێنە بەمامۆستای شۆڕش بە شێوەی خۆبەخش، هەروەها لەهەمان ساڵ و ساڵی دواتریش، لە گوندی ئاكۆیان وانەی بنەڕەتی بە قوتابیان داوەتەوە، جگە لەوەش لە بەشی كۆمەڵایەتی كاری كردووە بۆ هەر كێشەیەك ئەگەر هەبوایە پەیوەست بوو بە گوندەكانی (ئاكۆیان، فەقیان، بنمێردە، گەرەوان، سەران، كەڕەك) كادری حزبیش بووە لە ناوچەكەدا”.
م. رەشید سەبری، باسی ئەوەشی كردووە ” لەو سەردەمەدا ژیان و گوزەرانی زوربەی خەڵك سادە بووە لە رووی رەنجەوە تا ڕادەیەك دژوار بووە، بەڵام ژیانی ئێمە باش بوو خۆمان دەگونجاند، قوتابخانەیەكی پێنج پۆلیمان لە ئاكۆیان هەبوو، لە خانوویەكی قوڕ بوو، رەحلەمان كەم بوو قوتابی زیاتر لە سەر تەنەكە دادەنیشت تەختەرەش و تەباشیر لە رواندز بە نهێنی لەلایەن ڕێكخستنەكانەوە بۆمان دەهات”.
دەشڵێت: “پێش نسكۆی شۆڕش چەكمان داناو ماڵ و منداڵمان لەبەر شەڕ دەرباز كرد چووینە ئێران دواتر ساڵی 1974 بە لێبوردنی گشتی هاتینەوە عێراق، دووبارە لە لایەن رژێم دامەزرامەوە لە كشتوكاڵ، بەڵام من و خێزانم مامۆستا جەمیلە ساڵح حەكیم، گوازراینەوە بۆ كۆیە چاودێری تووندمان لەسەر بوو دوای دووساڵ گواستراینەوە شارەكەمان رواندز”.
ناخۆشترین رۆژی ئەوكاتە بووە لە ساڵی 1982 لە لایەن ئەمنی رژێمی بەعس دەستگیر كراوە و لەسەر ڕێكخستنی نهێنی و هاوكاری هێزەكانی پێشمەركە، دوای ئەشكەنجەیەكی زور رەوانەی هەولێر و ئەمنی گشتی كراوە و لە بەغدا دراوەتە دادگای شۆڕش دادگای سەورە ِو سزادانی 10 ساڵ زیندانی بۆ بڕاوەتەوە، هەروەها هەموو كەل و پەلیان دەست بەسەردا گرتووە لەگەڵ خانووەكەشی، چونكە دوو برای دیكەشی پێشمەركە بوونە بەناوەكانی (ماموستا رەشاد و شاكر) دوای چوار ساڵ بەندكردنی بە لێبوردنی گشتی ئازاد كراوەو 1986 گەڕاوتەوە بەغدا، بەڵام لە پیشەكەی دوورخراوەتەوەو دەستی بەكار و كاسبی كردووە، دوای ڕاپەڕینی 1991 دووبارە گەڕاوەتەوە سەر پیشەكەی”.
م. رەشید سەبری، دوای راپەڕین زۆر دڵخۆش دەبێت بە ئازادی و دامەزراندنی هەرێمی كوردستان، لەگەڵ ئەوەشدا پەیامی بۆ حكوومەت ئەوە بووە، بایەخی زیاتر بە مامۆستایانی شۆڕشی ئەیلوول بدرێت، بەتایبەتی ئەوانەی لە زەووی و ئیمتیازاتەكانی سوودمەند نەبوونە، چونكە ئەوان سەردامەنێك شان بەشانی پێشمەرگە بە چەكی قەڵەم تێكۆشاون و خەباتیان كردووە”.
لە دوا قسەكانیدا م. رشید سەبری، ئاماژەی بەوەكردووە ” شانازی بە رابردووی خۆمەوە دەكەم چ وەك پێشمەرگەو كادیر چ وەك ماموستای شۆڕشی ئەیلوول چ وەك زیندانی سیاسی چ وەك رێكخستنی نهێنی كە چەندین رژێم گۆڕان من هەر كۆڵم نەداو كاری سیاسی خۆم كردووە”.
رشید سەبری، مامۆستای شۆڕشی ئەیلوول لە 15ی7ی2022 دڵە گەورەكەی لە لێدان كەوت و بۆ هەمیشە ماڵئاوایی كرد”.
سەرچاوە: لە ئەكاونتی هەواڵی رواندز وەرگیراوە بە دەستكاریەوە
