سەیران سەڵاح
سەرۆكی رێكخراوی ئەستێرەی منداڵان
مێژوی ئاهەنگێران بۆ رۆژی جیهانی منداڵان دەگەڕێتەوە بۆ 1 ـی حوزەیران ی ساڵی 1950، زۆرێك لە وڵاتانی جیهان بە جەژنی منداڵ ناوی دەبەن و هەموو ساڵێك وەك رێزگرتنێك بۆ مافەكانی منداڵ ئاهەنگیان بۆ ساز دەكەن بۆ تیشك خستنە سەر بارودۆخی منداڵان لە بابەتی تەندروستی و پەروەرد و مافی یاریكردنیان و گەشەكردنی تەندروستیان و پاراستنیان لە توندوتیژی بەرامبەریان ،
رۆژی جیهانی منداڵ بە دەستپێشخەری یەكێتی ئافرەتانی دیموكراتی نێودەوڵەتی لە مانگی 11 ـی ساڵی 1949 لە كۆبونەوەیەك كە لە مۆسكۆ بەسترا بوو تێیدا رۆژی جیهانی منداڵ راگەیاندرا، بریاڕدرا لە 1 / 6 ی ساڵی 1950 وەك رۆژێكی جیهانی بۆ منداڵ تەرخان كرا.
لەم كۆبونەوەیەدا باس لەو كوشتارگە و نەهامەتیانەی لە جەنگی جیهانی دووەمدا منداڵان بە چاوی خۆیان بینیبویان و ئازاریان چەشتبوو گفتوگۆ كرا بۆ ئەوەی چیتر منداڵان نەبن بە قەڵغانی جەنگ و چیتر پشتگوێ نەخرێن، هەر بۆیە بە چەندین خالی گرنگ ئامانجی كۆبونەوەكە بریاری لەسەردرا كە بریتیی بوون :
*هۆشیاری بۆ مافەكانی منداڵ .
*جەختكردنە سەر گرنگی رەخساندنی ژینگەیەكی لەبار و ئاشتی بۆ منداڵ.
*بەهێزكردنی پەروەردەی باش و چاودێریكردنی تەندروستی منداڵان.
*بەڕەنگاربوونەوەی كارپێكردنی منداڵان و توندوتێژی بەرامبەریان.
*سازكردنی فیستیڤاڵا و پێشانگە بۆ منداڵان.
*سازدانی چالاكی رۆشنبیری و وەرزشی بۆ رەخساندنی كەشێكی ئارام و خۆش بۆیان.
*هەڵمەتی هۆشیاریی سەبارەت بە مافەكانی منداڵ.
*دابەشكردنی دیاری بەسەر منداڵان بە تایبەتی لە قوتابخانە و نەخۆشخانەكان .
ئەم هەڵبژاردنە (رۆژێك بۆ منداڵ ) : چەندین رەهەندی گرنگ بە خۆیەوە دەبینێت لەوانە :
زیندوكردنەوەی یادی بریاردانی ئەو رۆژە بەفەرمی دانی پینرا بە ئاهەنگگێران بۆ یەكەم جار لە 1 ـی مانگی 6 ی ساڵی 1950
یەكگرتنەوە دوای كۆتاهاتنی جەنگ :
وەك هەنگاوێك بۆ یەكگرتنەوەیەكی جیهانی بۆ تیشك خستنە سەر ئەو ئازارو نەهامەتی ئەو منداڵانەی زیانی گەورەیان پێگەیشتبوو لە ئاكامی جەنگی دووەمی جیهانی نەگریس.
بانگەشە بۆ مافە بنەرەتیەكان :
مێژوی ئەم یادكردنەوەیە بۆ وەبیرهێنانەوەی حكومەت و كۆمەڵگاكانە بۆ پابەندبونیان بە پاراستنی مافەكان منداڵ و فەراهەمكردنی چاودێری تەندروستی و گرەنتی لە مافەكانی خوێندن و ژیانكردن لە كەشێكی تەندروست و ئاشتی دا.
هاوكات رۆژێكی دیكەش بۆ منداڵان تایبەت كراوە لەلایەن وڵاتە یەكگرتووەكان بەفەرمی رێكەوتی 20 ـی 11 ـی هەموو ساڵێك ئاهەنگ بۆ جاری گەردونی مافەكانی منداڵ تەرخان كراوە بۆ بەرز راگرتنی ئەو یادە كە رێكەوتنامەی مافەكانی منداڵانە هەموو ساڵ چەندین بریاری گرنگ بۆ بەرژەوەندی پاراستنی مافەكانی منداڵ لەو رۆژە دەردەكرێت كە بە رۆژی رێكەوتنامەی مافەكانی منداڵ ناسراوە .
