بێوار نێروەیی
لە كاتی دەستبەكار بوونی كابینەی نۆیەمەوە، ڕاگرتنی باڵانس بۆتە ئاڵنگارییەك لەبەردەمی.
دوای متمانە وەرگرتن لەلایەن نوێنەرانی خەڵكەوە ئەم كابینەیە بە هێزێكی زۆرەوە دەستی دایە پڕۆسەیەكی چاكسازی هەمە لایەنە، ئەمەش دوای وەرگرتنی هێزی یاسایی لە پەڕلەمانەوە دەستی كرد بەو بەرنامە چاكسازییە كرد هەر چەند تووشی كێشەی زور هات لەگەڵ بەغدا و بڕینی شایستە داراییەكان و دابەزینی نرخی نەوت و وەستانی هەموو جموجۆڵێكی بازرگانی بەهۆی پەتای كۆڕۆناوە، بەڵام بە ئیرادەیەكی بەهێزەوە بەردەوامی دایە ئەم پڕوسە گرنگە، تارادەیەكی باش ئەنجامەكانی ئەو پڕوسەیە بەدی دەكرێن كە خۆی لە ڕێكخستنەوەی میلاكات، زیادكردنی داهات، كەمكردنەوەی خەرجی، كەم كردنەوەی ڕوتین و بەردەوام بوونی پڕوژە خزمەتگوزارییەكان دەبینێتەوە، ئەوەی راگەیێندراوە وەك پلانی پاشە ڕۆژیش هەمووی جێی دڵخۆشی و دەست خۆشییە.
كێشەی سەرەكی بۆ ئەنجامدانی ئەم هەنگاوانە ڕاگرتنی باڵانس بووە و بەردەوامیش ئەم بەربەستە لە ئارادایە بەجۆرێك بۆ ڕێكخستنەوەی میلاكات دەبێ حسابی دابەشبوونی جوگرافی بكرێ، بۆ كەمكردنەوەی سیماكانی كۆمەڵگەیەكی چەكداری دەبێ ڕەچاوی پێگەی كەسایەتییە سیاسی و كومەڵایەتییەكان بكرێ، شۆڕشگێرەكانیش نازیان هەڵبگیرێ، بۆ زیادكردنی داهات و شەفاف كردنی دەبێ ڕەچاوی دروست نەبوونی شەڕی ناوخۆ بكرێ، بو بەرتەسك نەبوونی ئەزموونی هەرێم دەبێ ڕەچاوی بەرژەوەندی تاران، ئانكارا و بەغدا بكرێ جگە لە بەرژەوەندی ئەمریكا و ڕوژئاوا لەم هەرێمە بچووكەدا.
بۆ وەرگرتنی ئەزموون لە هەڵەكانی ڕابردوو نابێ هەموو هێڵكەكان لەیەك سەبەتە بێ ، بۆ برەودان بە خەباتی نەتەوایەتی لەناو ئەم هەموو هاوكێشە ئاڵۆزەدا دەبێ پاڵپشتی سیاسی بێ بۆ پارتە سیاسییەكانی پارچەكانی تر.
بێگومان ئەمە كارێكی ئاسان نەبووە و نابێ، بەڵام ئەوەی لە هەمووی گرنگترە بە لەبەر چاو گرتنی مەترسییە دەرەكییەكان راگرتنی باڵانسی سیاسییە لە ناوخوی هەرێمی كوردستان، تا بتوانین بەردەوامی بدەینە ئەم ئەزموونە، بۆیە ئەم كابینەیە ماندوو بووە بە ڕاگرتنی باڵانسی ئەم هەموو هاوكێشە ئاڵۆزەدا، ئەوەی ماوە وەك هەمیشە جەنابی سەرۆكی حكومەتی هەرێم دەست پێشخەری زیاتر بكات بە ڕێكخستنەوەی پەیوەندی لەگەڵ یەكێتی نیشتیمانی تا ئەم تەباییەش ببێتە هۆی ڕەخساندنی كەشێكی باشتر بۆ ئەوەی پڕۆسەی چاكسازی زیاتر و زووتر بەرەو پێشەوە بچێ، هەنگاوەكان جێگای دڵخۆشین چونكە ئیرادەیەك دەبینرێ كە نابێ لە یەك بازنەدا بمێنین و پڕوسەیەكی گەورەی چاكسازی كە تەنیا شانسی سەركەوتنە بكرێتە قوربانی بەرژەوەندیەكی تەسك و تاكە كەسی.
مامۆستای زانكۆ
