سەرۆكی دیوانی ئەنجوومەنی وەزیرانی هەرێمی كوردستان:
هەوڵ دەدرێت تا پێش سەری ساڵ 400 ملیار دینارەكە بۆ هەرێم رەوانە بكرێت

دوای گەڕانەوە شاندنی حكومەتی هەرێمی كوردستان لە بەغدا كە بە مەبەستی دانوستاندن لەسەر بابەتی بودجە و ماددەی 140 و نەوت چووبوون، رایانگەیاند كە ” نییەتی باش بۆ رێككەوتن هەیە، بڕیارە تا پێش سەری ساڵ حكومەتی عێراق بڕی 400 ملیار دینارەكە بۆ هەرێم رەوانە بكات “.
ئومێد سەباح، سەرۆكی دیوانی ئەنجوومەنی وەزیرانی هەرێمی كوردستان و ئەندامی شاندنی وەزارەی حكومەتی هەرێمی كوردستان بۆ دانوستان لەگەڵ بەغدا بە میدیاكانی راگەیاندووە” بڕیاری خەرجكردنی 400 ملیار دینار لەلایەن ئەنجوومەنی وەزیرانی عێراق، هەنگاوێكی باش و دەستپێكێكی گرنگە بۆ دەربڕینی نیازپاكی بۆ گەیشتن بە رێككەوتن لە نێوان هەولێر و بەغدا”.
زیاتر روونیكردەوە ” هەوڵ دەدرێت تا پێش سەری ساڵ حكومەتی عێراق بڕی 400 ملیار دینارەكە بۆ هەرێم رەوانە بكات”.
ئەنجوومەنی وەزیرانی عێراق دوێنێ سێشەممە كۆبوونەوەی ئاسایی خۆی ئەنجامدا و بەپێی راگەیەندراوی كۆبوونەوەكە ” ئەنجوومەنی وەزیران بڕیاریدا 400 ملیار دینار بەمەبەستی تەواوكردنی مووچە بۆ دوو مانگی كۆتایی ئەمساڵ رەوانەی هەرێمی كوردستان بكرێت”.

لە لای خۆشیەوە ئاوات جەناب نوری، وەزیری دارایی و ئابووری هەرێم و سەرۆكی شاندی دانوستانكاری حكومەتی هەرێم بۆ بەغدا رایگەیاند” لەگفتوگۆكانی چەند رۆژی رابردوو لەگەڵ شاندی حكومەتی فیدڕاڵ لەسەر خەرجی بەڕێوەبردن و میلاكات گەیشتووینەتە رێككەوتن و لە جارەكانی پێشوو كە هاتوون بۆ بەغدا گەشبینترن”.
ناوبراو روونیكردەوە “مەبدەئیەن مووچەی مووچە خۆرانی هەرێمی كوردستانمان گەرەنتی كردووە و جەختمان كردۆتەوە نابێت مووچە تێكەڵی ناكۆكی سیاسی بكرێت، دەشمانەوێت كێشەكانی نەوت بە یاسا چارەسەر بكرێ و بۆ چارەسەری كێشەكان لە نێوان هەرێم و عێراقیش دەستوور حەكەمە.”