رێبوار حەمەلاو شوانی
مێژوو و خەباتی بێ وچانی هەشت دەیەی پارتی دیموكراتی كوردستان بە رابەرایەتی بارزانی، لە نێو سەختترین هەڵوەمەرجی سیاسی و سەربازی و ئاڵۆزییەكانی ناوچەكە و جیهان و چۆنێتی مامەڵەكردن لەگەڵ ڕووداو و پێشهاتەكان و هەروەها ڕێگریكردن لە سڕینەوەی مۆڕك و ناسنامەی كورد و ئینجا رژدبوون لە سەر گەڕانەوەی خاك و نیشتیمانی باب و باپیرانی بۆ نەتەوەیەكەی و سازش نەكردن لە سەر ماف و خواستە رەواكانی گەلی كورد نەك تەنها بۆ بەشێك و سنووری جوگرافیاییەكی دیار كراو، ئاماژەن بە بەهێزی و متمانەبەخۆبوونی ئەم ڕێباز و قوتابخانەیە بە دۆزی رەواكەی گەلەكەی، لەهەمانكاتیشدا سەنگ و پێگەی لە نێو دۆستان و نەیارانیدا.
ڕێبازێك و قوتابخانەیەك لە نێو قوڵایی ئێش و بۆردومانكردن و سەختترین هەلومەرجەكاندا لە سەر دەستی ڕابەری ڕوحی نەتەوەیی كورد مستەفا بارزانی دامەزرا بێت و ئینجا هەنگاو بە هەنگاو كاری بۆ بەدیهێنانی ئامانجەكانی كرد بێت و ڕێگەی نەدا بێت داگیركەران و دوژمنانی كورد و كوردستان خەونەكانیان بێنەدی و وەك چیاییەكی سەركەش خۆڕاگر بووبێت بەرامبەر بە قورسترین هێرش، پیلانگێری ناوچەیی و نێودەوڵەتییەكان و ڕێگەی خۆنەچەماندنی بەرامبەر بە نەیارانی كورد هەڵبژارد بێت، ئەمەیە فەلسەقەی هەرمان و خوڵقاندنی مێژوو.
پارتی تەنها ناسناو و ڕێكخستنێكی سادە نییە، بەڵكو ڕشماڵ و هێزێكی نەتەوەیی لەبن نەهاتووی گەلی كوردە، هەڵگری مێژوو و میراتێكی گرانبەهای شۆڕش و ڕاپەرینەكانی كوردستان و خەباتێكی پڕ قوربانیدان و كۆڵنەدانە، رێبازێك خەون و هەوڵ و پیلانگێری هەموو ئەوانەی دەیانویست شوناسێك بەناوی كوردبوون بوونی نەمێنێت شكست پێهێنا و سازی لە سەر نەكرد، پارتی ئەو ڕشماڵە گەورە نەتەوەییە كە توانیوێتی هەموو بیروباوەرە ئایینی و نەتەوەیی و نیشتیمانی و كاری بەكۆمەڵ كۆبكاتەوە، ئیرادەیەكی پتەو دروست بكات بۆ گەیشتن بە ئامانجە رەواكان، بۆیە كاتێك باسی خۆڕاگری بەرامبەر ئاگر و ئاسن و بۆردومان و كیمیاران و ئەنفال دەكرێت و ئەو گەلە خۆڕاگرە خۆی بەدەستەوە نادات و بەهێزتر لە جاران سەرهەڵداتەوە و بەرانبەر ڕەشەبای دوژمنان و داگیركەران دەوستێتەوە، ئەوەش هەمان ئەو فەرموودە كورت و گرانبەهایەی جەنابی سەرۆك بارزانی مان بیر دێنێتەوە “پارتی وەك دار بەڕوو وایە نە بەسووتان و نە بڕین لەناو ناچێت.” ئەوەش بەڵگەیەكی حاشاهەڵنەگرە كاتێك داگیركەران و نەیارانی كوردستان چەندین جار هەوڵی لەناوبردن و خامۆشكردنی ئەم ڕێبازە و مەشخەڵی خەباتی پارتی یان دا، بەڵام ئەم ڕێبازە و پەیرەوانی ئەم قوتابخانەیە خۆیان بەدەستەوە نەدا، تا گەیشتن بە قۆناغی ئەمڕۆی قەوارەی هەرێمی كوردستان و حكوومڕانییەكەی كە لە سەر ئاستی ناوچەكەدا لە ڕووی دیموكراسییەت و پێشكەوتن و گەشەسەندن و پێكەوەژیانی ئاشتیانە و ئینجا پەیوەندییە سیاسی و دیپلۆماسییەكانی لە سەر ئاستی ناوچەكە و نێودەوڵەتی بێ وێنەیە و لە هەمانكاتیشدا توانیوێتی لەگەڵ هەر پێشهات و گۆڕانكارییەكی نوێ لە ناوچەكە دا بەشێوەیەكی زۆر ژیرانە و وردبینانە خوێندنەوەی وردی هەبێت، هەموو ئەمانە ئاماژەن پارتی لە هەموو قۆناغەكاندا توانیوێتی خۆی نوێ بكاتەوە و پێشكەوتنیش بەدەست بێنێت.
هەروەها پارتی ئەو هێزە نەتەوەییە، كە هەمیشە لە سەنگەری پێشەوەی هەڵگرتنی ئەرك و بەرپرسیاریەتی بووە بەرانبەر بە دۆزی رەوایی نەتەوەكەی و هەرگیز بێ باكانە مامەڵەی نەكردووە، ئەوەش لە هەڵوێست و كردارەكانی ڕەنگی داوەتەوەو، لەهەمان كاتیشدا هەمیشە بە خوێن و گیانی و هێمەتی هێزی پێشمەرگەی كوردستان پارێزگاری لەو دەستكەوت و هەمیشە لە كاتی هێرش و پیلانگێرییەكاندا و ڕەشەبای نەیارانی كوردا، وەك چیاییەك خۆڕاگرانە و سەربەرزانە وەستاتەوە و خۆی نەچەماندووە.
بۆیە، تاكە هێزی نەتەوەیی لە سەر گۆڕەپانی خەبات و كوردایەتییە، توانیوێتی خوێندنەوەی وردی بۆ گۆڕانكاری و پێشهاتەكان ناوچەكە و جیهان هەبێت , ئەوەش سەركەوتنی گەورەی سیاسی و دیپلۆماسییە و كاریگەری بەهێزی كردۆتە سەر سەنگ وپێگەی هەرێمی كوردستان ، لە هەمان كاتیشدا ئەو سیاسەتە ژیرانەیە وایكردووە ، پارتی بگەێنتە لووتكە و لە هەمانكاتیشدا متمانەی ناوخۆیی و دەرەكی بەدەست بێنێت ؛ بەتایبەتی لە سەر ئاستی عێراق و پرۆسە سیاسیەكەی بە بێ بوون و كاریگەری پارتی ، ئەوا دیموكراتیی و فیدراڵییەتی عێراق ئەستەمە ، ئەو لۆژیك و دیپلۆماسییەتەش وایكردووە وەك كارەكتەرێكی سەرەكی لە هاوكێشەكانی عێراقییدا شوێن دەستی دیاروبەرچاو بێت
بۆیە، پارتی هێز و داینەمۆی دیموكراسی و هاوسەنگی و سازان و هاوبەشییە و دژی هەموو هەوڵێكە بۆ تاكڕەی و زۆرینەی خۆسەپاندن و پەراوێزخستنی هیچ هێز ولایەنێك ، لە هەمانكاتیشدا ، پارتی بە وتارێكی كوردستانیانە و توانیوێتی ئاستی پەیوەندییەكان چ لە سەر ئاستی ناوخۆ و نێودەوڵەتی بەهێزتر بكات ، لە بەغدا رژدە لەسەر جێبەجێكردنی مافە دەستووریی و نەتەوەییەكان و خاك ، ئەوەش ئاماژەیە بەو راستییەی كە ، پارتی دیموكراتی كوردستان چ لەسەر ئاستی ناوخۆ و چ لەسەر ئاستی عێراقی و ناوچەیی و نێودەوڵەتیشدا هێزێكی متمانەپێكراوە و رۆژ بەرۆژیش لە پێشكەوتن و بەرەو لووتكەیە و ئەو ستراتیژی و هەڵوێستە نەگۆڕ وستراتیژیەی توانیوێتی دۆزی رەوای نەتەوەكەی لە هەر پیلانگێری و هەڕەشەیەك بپارێزێت و بەرگریشی لێبكات .
