گووتە بێژی پەكەكە ئاشكرایكرد: ئەگەر پەكەكە نەبوایە ئەمریكا هەرێمێكی هاوشێوەی هەرێمی كوردستان لە ڕۆژئاوا درووست دەكرد، بەڵام ئێمە ڕێگربووین.

زاری كرمانجی-سۆران:
دوای بڵاو بوونەوەی هەڤپەیڤینێكی هێلێن ئومێد گووتە بێژی پەكەكە، لە بەرنامەی (میدیا هەبەر) سەربە پەكەكە، كە ئاماژەی بەوەدا ” پەكەكە رێگر بوو لە دروستكردنی هەرێمێكی هاوشێوەی هەرێمی كوردستان لە باشوور بۆ رۆژئاوای كوردستان” كار دانەوەی بەدواوە هات و رۆشنبیران و چاودێرانی سیاسی ئەو هەڵوێستەی پەكەكەیا بە دژایەتی نەتەوەی كورد بە گشتی لە رۆژئاوا بە تایبەتی لە قەڵەمدا.
مامۆستایەكی زانكۆ بە ناوی د. مەهدی ستونی، شارەزای سیاسەت و پەیوەندییە نێودەوڵەتییەكان لەمبارەوە بە زاری كرمانجی گووت :” شاراوە نییە پەكەكە دژی هەر جۆرە پڕۆژەیەكی نەتەوەییە، كە لە خزمەتی داهاتووی سیاسی و ئابووری كورد بێت. ئەوە جاری یەكەم و كۆتا جاریش نابێت. دژایەتی دۆزی كورد بكات، بەڵكو پەكەكە هەمیشە سیاسەتی سەر لەگێژە پەیڕەو دەكات. جگە لەوەی ناهێڵێت دۆخی بەشەكانی تری كوردستان بەرەو كەناری ئارام كەمەندكێش بكرێت. بۆتە هۆكارێكیش تا توركیا سنوورەكانی هەرێمی كوردستان ببەزێنێت. لە ڕاستیدا پەكەكە هێزێكی ئایدۆلۆژی مەترسیداری دژە نەتەوەو ئاڵاو دەوڵەتی كوردییە. ئەگینا چەند جارێك سەركردایەتی سیاسی كورد لە باشووری كوردستان دەست پێشخەری كۆكردنەوەی هێزەكانی ڕۆژئاوایان بۆ حزبەكانی ئەو بەشەی ووڵات كرد. بەڵگەش كۆنگرەی دهۆك یەك و دهۆك دوو بوو. بەڵام دیار بوو كە پەكەكە نەك هیچ هاتنە پێشەوەی لەو بابەتە نەبوو، بگرە دژایەتی ئەو پرسەیان كرد و لە ڕێگەی دەستوەردانی ئاشكرا دژایەتی هەر جۆرە ڕێككەوتنێكی كوردی _ كوردی بوو لە ڕۆژئاوای كوردستان”.
هەر سەبارەت بەو لێدوانەی گووتە بێژی پارتی كرێكارانی كوردستان، د. مەهدی مستەفا، مامۆستا لە بەشی سیاسەت و پەیوەندییە نێودەوڵەتییەكانی زانكۆی سۆران دەڵێت:”سەبارەت بە لێدوانی ووتەبێژی پەكەكە لە سەر ڕێگریان لە دامەزراندنی هەرێمێكی هاوشێوەی كوردستان لە ڕۆژئاوای كوردستان. ئەو لێدوانەی پەكەكە دەرئەنجامی ناكۆكی سیاسی ئەو حیزبەیە لەگەڵ پارتی دیموكراتی كوردستان، لەبەر ئەوەی حكومەتی هەرێمی كوردستان و بە تایبەت پارتی دیموكراتی كوردستان دژی هەبوونی پەكەكەن لە سنوورەكانی هەرێمی كودستان. ئەوەش لەسەر بنەمای ئەوەی كە حكومەتی هەرێمی كوردستان پێی وایە نابێت هەرێمی كوردستان بكرێتە مەیدانی یەكلایی كردنەوەی ناكۆكیی و ململانێ سیاسییەكانی توركیا و پەكەكە، بەڵكوو پێویستە پەكەكە خەباتی خۆی بگوزاێتەوە بۆ قۆڵایی ستراتیژی خاكی توركیا و لەوێ ئامانجەكانی بەدەست بێنێت. حزوری پەكەكە و حزبەكانی تر لە نێو خاكی هەرێمی كوردستان بەهانە دەداتە دەست نەیارانی كوردستان و كیانی سیاسی هەرێمی كوردستان كە هەڕەشە لە سەر سەقامگیری سیاسیی هەرێم دروست بكەن و سنووری جوگرافی هەرێمی كوردستان ببەزێنن و ببنە مەترسیی بۆ ناوچە سنوورییەكان و دانیشتووەكانیان”.
زیاتر روونیكردەوە:”ئەگەرچی ڕزگار كردنی هەر چوار پارچەی خاكی كوردستان و دامەزراندنی دەوڵەتی كوردستان و پێكەوە گرێدانی هەر چوار پارچەی كوردستان پڕوژەیەكی ستراتیژی و خەونی هەموو كوردێكە، بەڵام هەبوونی قەوارەی سیاسی وەك هەرێمی كوردستان و ئازاد كردنی پارچەكانی تریش هەنگاوێكی باشە و نزیك بوونەوەیە لە دامەزراندنی دەوڵەتی كوردستانی گەورە. بۆیە گرنگە هەموو حزب و پارتە سیاسییەكان ناكۆكییە سیاسییەكانیان وەڵاوە بنێن لە پێناو خۆشكردنی زەمینە بۆ دروستكردنی دەوڵەتی كوردستان و هەستی نیشتیمانی و نەتەوەیی لەنێو كوردانی هەر چوار پارچەی كوردستان. ئەوەش لەبیر نەكەین لە دنیای سیاسەت، بەرژەوەندی زلهێزە نێودەوڵەتییەكان لە سەرووی ویست و خواستی حزب و لایەنێكە، ئەگەر ویستی نێودەوڵەتی و بەرژەوەندی زلهێزەكان لە سەر دامەزراندن یان ڕووخانی قەوارەیەكی سیاسیی بێت و بەرژەوەندییان لەوەدا بێت، ڕێگری كردی لایەنێك كاریگەری نابێت لە سەر گۆڕینی ئاراستەی ویست و سیاسەتی زلهێزەكان.”