لە خیانەتەوە بۆ كاری تیرۆری و گەندەڵی

زاری كرمانجی – سۆران
ماوەیەكە یەكێتی نیشتیمانی كوردستان لە رێگەی چەند بەرپرسێكیەوە دەستی كردووە بە كاری تیرۆرستی و هەوڵدان بۆ تێكدانی دۆخی ئابووری كوردستان، ئەمەش ناڕەزای خەڵكی لێ كەوتۆتەوە و چاودێرێكی سیاسیش دەڵێت:” حكوومەتی هەرێم ئەو كارە نایاساییانە لە یەكێتی و هیچ لایەنێكی كوردستان قبووڵ ناكات .
یەكێتی كە هاوبەشی سەرەكی پێكهێنانی كابینەی نۆیەمی حكوومەتە و ژمارەیەك پۆستی باڵای لایە، بەردەوام خۆی وا نیشان دەدات كە ستەمی لێكراوە و مافی تەواوی پێنەدراوە، ئەمە لە كاتێكدایە لە پارێزگای سلێمانی و خاڵە سنوورییەكانی ئەو پارێزگایەی ژێر دەسەڵاتی خۆی، داهات ناگەڕێتەوە گەنجینەی حكوومەت و بە تاڵان براوە.
محیەدین بادلی چاودێری سیاسی بە زاری كرمانجی گووت:” لەدووای خیانەتی 16ی ئۆكتۆبەر، هەندێ لەسەركردەكانی یەكێتی بەردەوامبوون لە ئالۆزی خستنە نێوماڵی كورد و تەگەرەخستنە بەردەم چالاكی و گەشانەوەی حكومەتی هەرێمی كوردستان، گەڵێ جاران لێدوان و گووتارەكانیان دژبە ئەدای حكومەت بووە، لەكاتێكدا خۆیان بەشێكی گرنگی پێكهاتەی ئەو كابینەیەن، سیاسەتی دووسەرەو دووئاڕاستەییان گرتۆتەبەر و لەلایەك دەستەڵاتداریی و لەلایەكی تر ئۆپۆزسیۆنبوون و ڕەخنەو گلەیی .
ئەو چاودێرەی سیاسی، دەڵێت:” لەم دوایانەدا بەهانەی ئەوەیانداوەتە پاڵ حكوومەت كە گەماڕۆی خستۆتە سەر سلێمانی و پارەو بودجەی لێ بڕیوون! ئەمەلەكاتێكدایە نە لەڕابردوو نەلە ئێستادا ئەوە لە بیر و هزری حكوومەت نەبووە شارێك بخاتەدەرەوەی ئەركەكانی خۆی، یاخود خەڵكەكەی برسی بكات، بەلكو دەستەڵاتەكەی حزبی ئەوێیە كە تەواوی داهات و باج و گومرگەكانی خستۆتە ژێر ڕكێفی خۆی و خەزێنەی شارەوانی و پارێزگای بەتاڵانكردۆتەوە، هەروەها وەكو كورد گۆتەنی’لە تەشتێ مشتێ ناگەڕێنێتەوە بۆ دارایی حكومەت”.
بادلی، دەشڵێت:” یەكێتی بۆ شاردنەوەی ئەو هەموو لاری و لاوازیانەی كە تێیكەوتووە، دەستی بردووە بۆ مەترسیدارتین و قێزەونترین ڕەفتار كە تیرۆر و تەسفیەكردنە، لەو بابەتەش لە ڕابردوو چەندین نموونەمان بینی، بەدڵنیایشەوە لەو ئاكارانەدا ڕوبەڕووی یاسا دەبنەوە، كە قبولیان نیەو دەیانەوێت بەڕۆژی ڕوناك خەڵك بكوژن و ئاسایش و ئارامی شارەكان بشێوێنن بەبێ ئەوەی ڕێگریان لێبكرێت، ئەوەش مەحاڵە و نابێت یەكێتی و سەركردەكەی بیرلەوەبكەنەوە كە قورسایی و بوونی خۆیان و جێگیركردنەوەی دەستەڵاتیان لە تیرۆر و وروژاندنی خەڵك و بابەتی دووئیدارەی و دژایەتی حكومەتی هەرێم ببیننەوە، پێویستە بگەڕێنەوە سەر ڕێگای كوردایەتی و خۆشەویستی بۆ نیشتیمان و ئاسانكاری و پشتیوانیكردن لە هەگاوەكانی حكومەتی هەرێمی كوردستان كە لەوێدا خۆشەویستی خەڵك و وڵات بەدەست دەهێننەوە”.