چاوپۆشی لەگەندەڵی و تیرۆر

ئیسماعیل ئیبراهیم
ماوەیەكە یەكێتی نیشتمانی كوردستان لە رێگەی هەموو ئەو كەناڵانەی هەیەتی بە تایبەت تیمی حكومییان گوشار لە حكومەتی هەرێم و لە پاڵ ئەویشدا لە پارتی دیموكراتی كوردستان دەكەن بۆ ئەوەی چاوپۆشی لەكۆمەڵێك رەفتاری ناشایستەی ئەوان بكات.
چەند مانگێك بەر لە ئێستا یەكێتی نیشتمانی كوردستان هیچ كێشەی لەگەڵ تیمی پارتی لە حكومەت نەبوو، تا ئەو كاتەی بڕیار درا رێگری تەواو لە گەندەڵی و مافیاگەرایی و هەر كارێكی نایاسیی بكرێت، ئەمەش لە ناو كارنامەی كابینەی 9ی حكومەتی هەرێم شوێنی بۆ كراوەتەوە و كابینەی حكومی ناچارە بەڵێنەكانی كە لە بەردەم پەرلەمانی كوردستان خستیانەڕوو بهێننە دی.
هەر ئەو كات تیمی یەكێتی كە هاوبەشی سەرەكی و راستەقینەی حكومەت بوو، بە تەواوی هێزەوە پشتیوانی لە كارنامەكە كرد، بەڵام دوای تێپەڕبوونی كات یەكێتی لە بەڵێنەكانی پاشگەز بوویەوە، پرسیارێكی جددی لێرە سەرهەڵدەدات، بۆچی یەكێتی پاشگەز بۆتەوە؟، ئایا كابینە و بەرنامەی كارییان گۆڕاوە؟، ئایا پارتی پابەندی بەڵێنەكانی نەبووە؟ نەخێر هیچ كامیان نییە، بەڵكو یەكێتی وەك هەمووجار تەنها لە پێناو رازیكردنی شەقام لە كاتی سوێند خواردنیان قسەیان كردووە و راستگۆ نەبوونە لەگەڵ خۆیان و هاووڵاتییان، لەبەر ئەوەی بەشێكی زۆری كارنامەی كابینەی 9ی حكومەتی هەرێم دژی ئەو رەفتارە قێزەونانە بووە لە سنووری سلێمانی كە یەكێتی باڵا دەستە تێدا، دەنا پارتی هەرگیز كێشەی ئەوەی نەبووە پۆستی زیاتر لە ئیستیحقاقی خۆی بداتە یەكێتی، بەڵام یەكێتی دوای كۆچی فەخامەتی مام جەلال، یەكێتییەكی دیكەیە، نەك بەدیوی باشتر بوونی بەڵكو بە ئاراستەی خۆسەپێنی، زیادبوونی مافیاگەرایی، گەندەڵی، تیرۆر كردن، كوشتن و خیانەتی نیشتمانی.
مامەڵە كردن لەگەڵ ئەو حزبە بەم شێواز و رەفتارانە كارێكی ئاسان نییە، بە پێچەوانەوە یەكێتی ئێستا بۆتە كۆسپێكی گەورە لەبەردەم گەشەی كیانی سیاسی باشووری كوردستان، تا ئەو ئەندازەیەی بۆ مانەوەی خۆی ئامادەیە هەموو دەستكەوتەكانی كوردستان بخاتە مەترسییەوە، لەبەر ئەوە ئێستا بابەتی دوو ئیدارەیی و جیاكردنی سلێمانی لە هەرێم یا مامەڵە كردنی راستەوخۆی سلێمانی لەگەڵ بەغدا دەخاتەڕوو.
بەڵام ئایا دروست و رەوایە پارتی و تیمی حكومییان لە ناو حكومەتی هەرێم بچنە ژێر باری ئەو گوشارە ناڕەوای یەكێتی؟، پرسیارەكە روونە، پارتی دیموكراتی كوردستان نابێ و ناشێ بەهیچ شێوەیەك ئەو خۆسەپێنییەی یەكێتی لا قبوڵ بێت و چاوپۆشییان لێ بكات، لەبەر ئەوەی تیرۆر كردن و مافیا گەرایی و گەندەڵی ئەو تۆقە خنكێنەرەن ئەگەر لە ملی حكومەتی هەرێم لانەبردرێن، بە دڵنیاییەوە ئەم كیانە دەخنكێندرێت.
ئەو كارەی ئێستا یەكێتی دەیكات لە دروستكردنی كێشە بۆ حكومەتی هەرێمی كوردستان، خیانەتێكی دیكەی نیشتمانییە و وەك رووداوەكانی 16ی ئۆكتۆبەر بە رەشی لە مێژووی نەتەوەی كورد دەنووسرێتەوە، هەر چەندە پێناچێت یەكێتی باكی بەم بابەتەوە هەبێت كە ئاخۆ مێژوو چی لە بارەوە دەنووسێت.