وەرزش ـ زاری كرمانجی:
شەوی رابردوو هەڵبژاردەكانی كڕواتیا و ئارجێنتینا سەركەوتن بۆ نیوەی كۆتایی، دوای بردنەوەی كڕواتیا لەبڕازیل بەلێدانی یەكلایكەرەوە 4-2. ئارجێنتینا بەهەمان شێواز و، بەلێدانی یەكلایكەرەوە 4-3 لەهۆڵەندای بردەوە. هەردوو هەڵبژاردەكە لەنیوەی كۆتایی بەیەك دەگەن.
بەبەڕێوەچوونی دوو یاریی، یارییەكانی قۆناخی چارەگی كۆتایی جامی جیهانی بەردەوامیان دەبێت.
كاتژمێر 6 ـی ئێوارە لەسەر یاریگەی ئەلسومامە، مەغریب سوپرازیەكەی جامی جیهانی، رووبەڕووی پۆرتوگال دەبێتەوە.
دواین رووبەڕووبوونەوەی نێوان ئەم دوو هەڵبژاردەیە دەگەڕێتەوە بۆ مۆندیالی 2018 كاتێك پۆرتوگال، بەگۆڵێكی بێ بەرانبەر یارییەكەی بردەوە.
یاریی دووەم تایبەتە لەدیدی هاندەران و كاتژمێر 10 شەو لەسەر یاریگەی ئەلبەیت، تێیدا ئینگڵاند رووبەڕووی فەڕەنسا دەبێتەوە.
دواین 4 یاریی بەرانبەریان لەسوودی كەڵەشێرەكان بووە، بەجۆرێك 2 بردنەوەیان تۆماركردووە، یەكسانبوونێك و، شكستێكیان هەبووە.
ئەم یارییە بەتەواوەتی چارەنووسازە بۆ هەردوو تیم، هیچ كامێكیان نایانەوێ هەمان سیناریۆی بڕازیل ـیان بەسەردا دووپات ببێتەوە.
