د . شێروان شەریف: زانكۆی سۆران لە پێشەنگی زانكۆیەكانە و قوتابییانیشمان شایستەی باشترینەكانن

مستەفا دۆلەمەری – زاری كرمانجی

زانكۆی سۆران، ساڵانە رێورەسمی دەرچوان رێكدەخات، كە تیایدا ژمارەیەكی بەرچاو لە دەرچووی بەهرەدار و خاوەن توانا پێشكەش بە كوردستان دەكات. كە دەتوانن لە رێگەی كەرتی تایبەت و گشتییەوە لە كۆمەڵگە، رۆڵیكی بەرچاو ببینن.
رۆژی پێنجشەمەی رابردوو، رێورەسمی سێزدەیەمین خولی دەرچوانی زانكۆی سۆران بۆ ساڵی 2021 – 2022 بەڕێوەچوو، رێوڕەسمەكە بە ئامادەبوونی پڕۆفیسۆری یاریدەدەر، د. شێروان شەریف قورتاس سەرۆكی زانكۆ، هەڵگورد شێخ نەجیب سەرپەرشتیاری ئیدارەی سۆران، د. ئەمیر چالی نوێنەری وەزیری خوێندنی باڵا و ژمارەیەك لە بەرپرسانی باڵای حكومی و حیزبی و ژمارەیەكی بەرچاوی قوتابیان و كەسوكاریان بەڕێوەچوو، تیایدا 1385 قوتابی لە 25 بەشی جیاواز ، بە خوێندنی بەكالۆریۆس، ماستەر و دكتۆراوە بوونەتە خاوەن بڕوانامە و ئاهەنگی دەرچوونیان بۆ ساز كرا .
یاقوب نادر، دەرچووێكی دیكەی فاكەڵتی ئەندازیاریە، بە زاری كرمانجی گووت:” نازانم چۆن ئەو هەستەم دەرببرم واتە دڵم زۆر خۆشە دوای 16ساڵ خوێندن و شەونخونی، بڕینی چەندین ئاستەنگ، لە كۆتایدا توانیم بروانامەی بەكالۆریۆس لە زانستی كۆمپیۆتەر بەدەست بێنم، سوپاسی دایك و باوكم و خێزانەكەم و هاوڕێیانم دەكەم هەر لە هەنگاوی یەكەمەوە تاوەكو ئێستا بەردەوامن لە پشتگیری كردنم و یارمەتیدانم، لە قۆناخی داهاتووشدا هەركارێك بكەین بەو پەڕی دڵسۆزیەوە كار دەكەین لە پێناو پێشخستنی وڵاتەكامان.
فەرسەت ساڵح، یەكێكە لە دەرچووی فاكەڵتی یاسایی زانكۆی سۆران، بە زاری كرمانجی گووت:” هەستێكی زۆر خۆشم هەیە كە دوای چوار ساڵ خوێندنم لە زانكۆ، توانیم قۆناخێكی دیكەی ژیانم بە سەركەوتووی تەواو بكەم، لێرەدا سوپاسی تەواوی مامۆستایانی زانكۆ دەكەم كە لە پڕۆسەی خوێندنی بەكالۆریۆس ئێمەیان گەیاندە لوتكە، سوپاسی تەواوی خێزانەكەم و هاورێیانم دەكەم كە ماندوو بوونە لەگەڵمان تاوكو گەیشتووین بەو قۆناخە.
داخواز محەمەد، دەرچووی فاكەڵتی ئاداب لە زانكۆی سۆران ، لەم بارەیەوە بە زاری كرمانجی راگەیاند:” زۆر خۆشحاڵم دوای چوار ساڵ خوێندن و ماندووبون توانیم قۆناخێكی تری ژیانم بە سەركەوتووی تەواو بكەم، ئەمە رۆژێكی مێژوویە ماندووبون و ‌تێكۆشان بەشێك لە بەری ماندووبوونیان دەچێنینەوە، قۆناخێكی نوێ لە ژیانمان دەست پێدەكات كە زیاتر خزمەتكردنە بە خۆمان و كۆمەڵگەكەمان، هەروەها دووای تەواو بوونمان لە زانكۆ ناچار نین كە تەنیا پشت بە كەرتی گشتی ببەستین، بەڵكو كەرتی تایبەت هەیە دەتوانین هەوڵی دۆزینەوەی كار بدەین.
رابەر عەبدولڕەحمان، دەرچووێكی دیكەی فاكەڵتی ئادابە لە زانكۆی سۆران، بە زاری كرمانجی گووت:” چوار ساڵی گرینگمان لە زانكۆی سۆران بەرێكرد، لە رووی فكری و هزری گۆڕانكاریەكی تەواومان بە دیكرد و سوودی زۆرمان بینی، بەشی كۆمەڵناسیم تەواو كردووە كە یەكێكە لە بەشە هەرە گرینگەكان بۆ خودی مرۆڤ سودی زۆری هەیە، وامان لێدەكات لە سەرجەم لایەنەكانی ژیان سودی لێ ببینین، بەڵام بەداخەوە لە كوردستاندا گرینگیەكی ئەوتۆی پێنادرێت، هیوای دامەزراندن بۆ خۆم و سەرجەم هاورێیان دەخوازم، داواكاریشم لە حكوومەتی هەرێمی كوردستان گرنگی زیاتر بەو بەشە بدات و دامەزراندنیش بۆ بەشی كۆمەڵناسی بكرێتەوە تا خوێندنەكەمان بە فیڕۆ نەڕوات .
كاژان عەلی، دەرچووی فاكەڵتی ئادابە لە زانكۆی سۆران، دەڵێت:” ئەمڕۆ خۆم بە دڵخۆش دەزانم، كە وەك كچێك بەهەوڵ و شەونخوونیەكی زۆر توانیم بڕوانامەی بەكالۆریۆس بە دەست بهێنم، زانكۆ ناوەندێكی گرنگی ئەكادیمییە، بێگومان لە ماوەی ئەو ساڵانەدا فێری زۆر شت بووین، بە تایبەت لایەنە زانستیەكەی و متمانە بەخۆ بوونمان، لە دوای ئەم قۆناخە قۆناخێكی دیكە لە ژیانمان دەست پێدەكاتن ئەویش كاركردنە جا چ لە كەرتی تایبەت بێت یاخود كەرتی گشتی بێت، لە كۆتایدا هیوای سەركەوتن بۆ تەوای قوتابیان دەخوازم كە لەم خولەدا قۆناخێكی تری ژیانیان بە سەركەوتووی بڕی .
لای خۆشیەوە، پڕۆفیسۆری یاریدەدەر، د.شێروان شەریف، سەرۆكی زانكۆی سۆران ، رایگەیاند:” زانكۆی سۆران بەهۆی قوتابی زانست خواز، مامۆستای كارامە و لێهاتووەكانی لە پێشەنگی زانكۆكانی كوردستان و عێراق ماوەتەوە و لە بەرەوپێشچوونی بەردەوامە، باوەریشمان وایە كە قوتابیانمان شایستەی باشترینەكانن.
سەرۆكی زانكۆی سۆران، دەڵێت:” ئێمە لە زانكۆی سۆران دەستی ماندووبوونی هەموو ئەو دایك وباوك و پەروەردەكار و بەخێوكەرانە دەگوشین كە سەرباری هەموو قەیران و ناڕەحەتییەكان، لە پاڵپشتیی ڕۆڵەكانیان بەردەوام بوون. بەڕاستی، ئەوان ئەركی ئێمەیان ئاسانتر كرد و ئێمەیان خستە بەردەم بەرپرسیارێتییەكی ئەخلاقیی گەورەتر. سەربەزین كە ئەمڕۆ لە بەردەم ئەواندا ڕاوەستاوین. خۆشحاڵین كە هەموو پێكەوە دەست لە ناودەستی یەكدی ئەو سەختییانەمان تێپەڕاند، قەولی پەروەردگاری جیهانیانیش هەر ئەمەیە كە لە دوای هەر ناخۆشییەك، خۆشی دێت”.