داستانی كۆڕێ بەسەرپەرشتی ڕاستەوخۆی سەرۆك بارزانی بوو
دوای كۆچی ملیۆنی خەڵكی هەرێمی كوردستان لە بەهاری 1991 ڕژێمی بەعس بە هێزی زۆر و چەكی جۆراوجۆرەوە هێرشی كردە سەر كوردستان، هێزی پێشمەرگە بەسەرپەرشتی سەرۆك بارزانی لە دەربەندی كۆڕێ توانیان بەرەنگاری هێزەكانی ڕژێمی بەعس ببنەوە، لە ئەنجامدا داستانی كۆڕێ تۆمار كرا، كە یەكێكە لە سەركەوتنە مێژووییەكانی هێزی پێشمەرگەی كوردستان بەرامبەر بە حكوومەتی ئەوكاتی عێراق.
دوای ئەوەی سوپای بەعس پەلاماری كوردستانی دا و گەیشتە هەولێر و دەیویست ناوچەكانی دیكە داگیر بكاتەوە، ئەو بوو لە شارۆچكەی پیرمامەوە دەیویست بەرەو شەقڵاوە، ئاكرێ، سۆران و ناوچەكانی دیكە بە تانك و تۆپ درێژە بە هێرشەكانی بدات، لە حەوتی نیسان تا 11ی نیسانی 1991، لە دەربەندی كۆڕێ شەڕێكی یەكلاكەرەوە ڕوویدا، پێشمەرگە بەرگریی كرد و ڕێگری لە پێشڕەوی سوپای ڕژێمی بەعس كرد، پێشمەرگە لەو داستانە بێوێنەیەدا سوپای بەعسی تێكشكاند، سوپایەك كە بە تانك و تۆپ و فڕۆكەوە هاتبووە مەیدانەوە، بەڵام لە چەند قۆڵێكەوە پێشمەرگە بەرگریی مان و نەمانی كرد و بە فەرمانی سەرۆك بارزانی هێڵی بەرگریی بەهێز پێكهات.
پێشمەرگە بە توانای كەمی چەك و تەقەمەنی، بەڵام بە بەرگری و ئیرادەی بەهێزەوە دووبارە خۆی خستەوە پێش مەرگ و تانك و تۆپەكانی سوپای ڕژێمی بەعس و تێكشكێنران، كوژراوێكی زۆر لە سوپای بەعس بەجێمان، لە 11ی نیسان پێشمەرگە مژدەی سەركەوتنی ڕاگەیاند و سوپای عێراق ناچار بە پاشەكشێ كرا، بەعس تانك و چەك و تەقەمەنی زۆری لێ بەجێما، داستانی كۆڕێ داستانی بەرگری و وەرچەرخان بوو كە بە خوێنی ژمارەیەك پێشمەرگەی قارەمان تۆمار كرا، وەكو فەرماندەكانی پێشمەرگە باسی دەكەن، ئەگەر سەرۆك بارزانی نەبوایە سوپای بەعس نەك تەنها تا كۆڕێ، بەڵكو تا حاجی ئۆمەران دەڕۆیشت.
سێ ڕۆژ پێش داستانی كۆڕێ، لە سنووری ڕواندز و سۆران، سەرۆك بارزانی كە ئەوكات سەرۆكی بەرەی كوردستانی بوو، لە كۆبوونەوەیەكی جەماوەریدا كە خەڵكێكی زۆر ئامادە بوو، لە وتارێكدا ورەی خەڵكی بەرز كردەوە و گوتی: ئەگەر هیمەت و نیاز هەبێت و ئەگەر دەستیش پاك بێ، دڵنیاتان دەكەمەوە دوژمن هیچ نییە و ئەوەشی بەدەستی هێناوە لە چەند ڕۆژی داهاتوودا لێی دەستێنینەوە.
سەرۆك بارزانی هەروەها ڕووی لە جەماوەر كرد و ڕایگەیاند: بۆ كوێ دەچن؟ ژیانی پەنابەری ژیانێكی تاڵ و ناخۆشە، مردن لەسەر خاكی كوردستان سەد هەزار جار پیرۆزتر و سەربەرزانەترە لەوەی مرۆڤ لە ئەوروپا یان لە هەر وڵاتیكی تر پەنابەر بێت.
سەرۆك بارزانی، جەماوەری كوردستانی دڵنیا كردەوە و گوتی: ورەی پێشمەرگە بەرزە، یەك بەڵێنتان دەدەینێ، دوژمن یان بەسەر لاشەی ئێمەدا دێتەوە بۆ كوردستان، یان دوژمن نایەتەوە بۆ كوردستان.
