“لە ئیدارەی سۆران پڕۆژەیەك بۆ دروستكردنی بڕاندێك دەدرێتە حكوومەت”

زاری كرمانجی – سۆران:
جووتیاران دڵخۆشن بە ناردنە دەرەوەی هەناری كوردستان و سوپاسی سەرۆكی حكوومەت دەكەن بۆ ئەو پاڵپشتییەی لە جووتیاران دەكات، دەشڵێن، ئەوە هاندەرێكی باش دەبێت بۆ ئەوەی لە داهاتوودا زیاتر پەڕە بە كەرتی كشتوكاڵ بدەین.
“بەڵێنەكەمان بەجێگەیاند” ئەمە ناونیشانی پۆستێكی مەسرور بارزانی، سەرۆكوەزیرانی كوردستانە لە هەژماری تایبەتی خۆی لە تۆڕی كۆمەڵایەتی سەبارەت بە هەناردەكردنی یەكەم كاروانی هەناری كوردستان بۆ دەرەوەی وڵات.
یەكەم كاروان 500 تۆن هەناری زاخۆ و هەڵەبجەیە، هەناری جۆری ساڵەخانی هەڵەبجە ناوبانگێكی زۆری هەیە و بۆ ئیمارات هەناردەكراوە.
مەسرور بارزانی، سەرۆكی حكومەتی هەرێمی كوردستان، بازاڕی تایبەت بە هەناردەی هەناری لە هەولێر بەسەركردەوە، لە وتەیەكدا بۆ كەناڵەكانی میدیا رایگەیاند، هەناردەكردنی هەناری هەڵەبجە و زاخۆ بۆ دەرەوەی وڵات، دەرگایەكی نوێ بەڕووی جووتیارانی هەرێمی كوردستان كرایەوە و ئەمە یەكەمجارە هەنار هەناردەی دەرەوە بكرێت، ئەم هەنگاوە رێگە خۆشكەرە بۆ هەناردەی بەرهەمە كشتووكاڵییەكانی دیكەی هەرێم بۆ دەرەوەی وڵات.
سەرۆكی حكومەتی هەرێمی كوردستان روونیكردەوە” ئەمجارە بۆ كەنداو هەنارمان ناردووە، ئەمە دەستپێكە، لە قۆناغەكانی داهاتوودا بە نیازین، هەنجیر، ترێ، سێو و هەنگوین رەوانەی دەرەوە بكەین، كە ئێستا لە چەندین وڵاتی كەنداو بەرهەمی ناوخۆیی هەرێمی كوردستان بەردەستە”.
هەروەها باسی لە كاریگەری سەركەوتنی هەوڵی هەناردەی بەرهەمە كشتووكاڵییەكان كرد و گوتی:”ئەم هەنگاوەمان موژدەیەكی خۆشە بۆ جووتیارانی هەرێمی كوردستان، كە خەمی ساغكردنەوەی بەرهەمیان نەبێت، تا بەرهەمیان زیاتر بێت، ئێمە دەتوانین دوای دابینكردنی خواستی بازاڕی ناوخۆ، بەرهەمەكانیان رەوانەی بازاڕی دەرەوە بكەین”.
سیامەند لەشكری، جووتیارێكی مێرگەسۆرە، بۆ زاری كرمانجی گوتی:” ناردنە دەرەوەی بەرهەمی كوردستان بۆ دەرەوە دەستكەوتێكی گرنگی كابینەی نۆیەمە، لەگەڵ ئەوەی پاڵپشتیەكی گرنگە بۆ جووتیاران كە زیاتر روو لە كاری كشتوكاڵی بكەن، چونكە ئەمجارە دڵنیا بوون لەوەی كە بەرهەمەكانیان وەكو ساڵانی رابردوو فڕێ نادەن و هەر بەرهەمێك لەناوخۆی كوردستان زیاد بێت هەناردەی دەرەوە دەكرێت.
ئەو جووتیارە، دەشڵێ:” داوا لە حكوومەتی هەرێم دەكەین ئەو كەلوپەلانەی كە پێویستن بۆ جووتیاران دابین بكەن، بۆ ئەوە زیاتر گرنگی بەو كەرتە بدەین و هەموو جۆرە بەرهەمێك هەناردەی دەرەوە بكەین.
عەبدولڕەزاق قادر، جووتیارێكی ئیدارەی سۆرانە، بە زاری كرمانجی گوت:” دەڤەری سۆران زەوی لە بارو بە پیت و بەرەكەتی هەیە بە دەیان رووبار و ئاو و كانیاوی سازگاری هەیە، بۆ بەرهەمهێنانی كشتوكاڵی، بەمەش ساڵانە هەزاران تۆن بەروبوومی كشتوكاڵی لە سنوورەكە بەرهەم دەهێنرێت، جگە لە دابین كردنی بەشی ناوچەكە، هەناردەی بازاڕەكانی كوردستان و عێڕاق دەكرێت، بەڵام بەداخەوە زۆرجار بەهۆی هێنانی بەروبوومی كشتوكاڵی لە وڵاتانی دراوسێ بۆ هەرێمی كوردستان، زیان بە بەروبوومی ناوخۆ دەگات و ناتوانرێت ساخ بكرێتەوە، بەمەش جووتیاران لە بری سوودمەند بوونیان زیانمەند دەبن”.
ئەو جووتیارە، گووتیشی:” ئەگەر بەروبوومی جووتیاران هەناردەی دەرەوەی وڵات بكرێت، دەبێتە هۆی بووژانەوەی ئابووری هەرێم و سوودمەندبوونی جووتیاران”.
حەكیم عەبدوڵڵا، جێگری بەڕێوەبەری گشتی كشتوكاڵی ئیدارەی سۆران، بۆ زاری كرمانجی گوتی:” وەكو بەڕێوەبەرایەتی گشتی كشتوكاڵی ئیدارەی سۆران، پڕۆژەیەكمان ئامادە كردووە كە 100 جووتیار لە خۆ دەگرێت، پڕۆژەكە دراوەتە ئەنجوومەنی وەزیران، لە بارەی ئەو پڕِِۆژانەیە كە لە سنوورەكە بوونیان هەیە، دەمانەوێت بڕاندێكی جیهانی دروست بكەین، بەو پێیەی سنووری ئیدارەی سۆران بەگشتی دەوڵەمەندە بە بەرهەمەكانی وەرزی وەك (تەماتە، خەیار، سێو، هەنار، ترێ و چەندین بەروبوومی دیكە) بۆ ئەوەی بڕاندێك بۆ بە بازاڕكردنی بكرێتەوە ئەوەش گرنگیەكی باشی دەبێت و بازاڕێكی باشیش بۆ جووتیاران دێنێتە كایەوە، بۆیە جووتیاران دڵنیا دەكەینەوە كە خودی سەرۆكی حكوومەت پاڵپشتی و هاوكارێكی باشی جووتیارانە، بۆ ئەوەی بەروبوومەكانیان ساغ بكەنەوە.
جێگری بەڕێوەبەری گشتی كشتوكاڵی ئیدارەی سۆران، دەشڵێت:” ساڵانە لە سنوورەكەمان بەرهەمی سەوزە و میوە روو لە بەرزبوونەوەیە، ئەوەش لەبەر ئەوەیە ساڵ بە ساڵ ژمارەی جووتیاران زیاد دەبێت، لە ئێستادا بەشێك لە جووتیاران خەریكی دانانی باخی سێو، هەنار و فستەقن، بەو پێیەی كەشوهەوای ناوچەكە بۆ زۆرێك لەو بەرووبوومانە شیاوە .
لەبارەی هەناردەكردنی هەناریش، ئەو بەرپرسەی كشتوكاڵ، گوتی:” ئەم هەنگاوەی سەرۆكی حكوومەت جێگەی دەستخۆشییە كە پاڵپشتی جووتیارانی كوردستان دەكات بەگشتی و ئەم هەنگاوەیان بە ئەركێكی پیرۆز دەزانین كە خۆی بە خاوەنی جووتیاران دەزانێت، خۆشی بەروبوومی جووتیارانی هەرێمی كوردستان لە بازاڕ دەكرێت ئەمەش هانی جووتیاران دەدات كە لە داهاتوودا پەرە بە كاری كشتوكاڵی بدەن، ئەوەش وا دەكات لە داهاتوودا جووتیاران خەمی ساغ نەبوونەوەی بەرهەمەكانیان نەمێنێت”.