“لە كۆمەڵەی سۆران ناوی زیاتر لە چوار هەزار خاوەن پێداویستی تایبەت تۆمار كراوە”

محەمەد هەسنانی- سۆران:
بەرپرسی بەشی پڕۆگرام لە كۆمەڵەی سۆران بۆ چاودێری كەمئەندامان، لە دیدارێكی زاری كرمانجی دا، تیشك دەخاتە سەر كاروچالاكییەكانیان و دەشڵێت:” چەند پڕۆژەیەكی تایبەت بە خاوەن پێداویستی تایبەتەكان لە بەرنامە و پلانماندایە تا خزمەتی زیاتر پێشكەش بەو چینە بكەین.
لە بەردەوامی قسەكانیدا سەركار رواندزی، بەرپرسی بەشی پڕۆگرام لە كۆمەڵەی سۆران بۆ چاودێری كەمئەندامان، راگەیاند:” كۆمەڵەكەمان لە ساڵی 1999 دامەزراوە و سنووری هەر چوار قەزاكانی ئیدارەی سۆران لە خۆدەگرێت، ئەم كۆمەڵەیە لە سەرەتاوە لەسەر دەستی رەوانشاد عەبدولواحید گوانی دامەزرا، بە هاوكاری دەستەی كارگێڕی و ستافەكەمان زیاتر لە 22 ساڵە خزمەت بە خاوەن پێداویستییە تایبەتەكان دەكەین، هەروەها رۆژی 3-12-2022 لە ژێر چاودێری و بەسەرپەرشتی هەڵگورد شێخ نەجیب، سەرپەرشتیاری ئیدارەی سەربەخۆی سۆران، مەڕاسیمێكی پێشوازیمان بە مەبەستی بەرز ڕاگرتنی رۆژی جیهانی كەمئەندامان رێكخست بە ئەنجامدانی چەند چالاكییەك و سازكردنی كۆنگرەیەكی رۆژنامەوانی بۆ راگەیاندنی چەند پڕۆژەیەك بۆ زیاتر خزمەتكردن بە خاوەن پێداویستی تایبەت و دانیشتووانی سنووری كۆمەڵەكەمان.
لە بەشێكی دیكەی قسەكانیدا ئاماژەی بەوەكرد:” كۆمەڵەكەمان بە سەرپەرشتی نێچیروان عەبدولواحید و دەستی كارگێڕی و ئەندامە خۆبەشەكانمان، لە كاروچالاكی بەردەوامە و ناوی زیاتر لە چوار هەزار خاوەن پێداویستی تایبەت وەك (ئۆتیزم، بیركۆڵ، داون، نابینا، نابیستا، تالاسیما، جەستەیی) واتە خاوەن پێداویستی تایبەت بە هەموو جۆرەكانییەوە لامان تۆمار كراون و زۆربەشیان ناسنامەی كۆمەڵەكەمان بۆ دروست كراوە، بەردەوامیش بۆ بوون بە ئەندام و خۆ تۆمار كردنیان خاوەن پێداویستی تایبەت سەردانمان دەكەن، ئیمەش وەك ستافی كۆمەڵە دەرگامان كراوەیە و ئامانجان پێشكەشكردنی خزمەتە بەم چینە، لەگەڵ ئەوەش زۆر لە كەمئەندامان بەهرە و توانای زیاتریان هەیە لە كەسانی ئاسایی، بۆیە گرنگترین شت بوونی متمانە و باوەڕ بەخۆبوونە لە نێوان مرۆڤەكاندا.
بەرپرسی بەشی پڕۆگرام لە كۆمەڵەی سۆران بۆ چاودێری كەمئەندامان، ئاشكراشی دەكات:” جگە لە كۆكردنەوەی هاوكاری دارایی و پێداویستییەكانی دیكە، چەند سەنتەر و شوێنی تایبەمان هەیە بۆ راهێنانی خاوەن پێداویستییە تایبەتەكان لە رووی جەستەیی و فێركاری خزمەتگوزارییەكانی دیكە، ئەمەش كاریگەری باشی هەبووە لەسەر خاوەن پێداویستییەكان، بەتایبەتی سەنتەرەكانی منداڵان و ئۆتیزم و مەنگۆڵ و هتد.. هەروەها لە كاتی پێدانی كورسی كەمئەندامان و دار شەقە و پێداویستیەكانی دیكە و راهێنانیان لە شێوازی بەكارهێنانیان.
رواندزی، ئەوەشی خستەڕوو:” ئەو هاوكاریانەی پێشكەش بە كۆمەڵەكەمان دەكرێن زیاتر لە رێگەی رێكخراوە خێرخوازییە بیانی و ناوخۆییەكانەوەیە، بەتایبەتیش دەزگای خێرخوازی بارزانی ڕۆڵی بەرچاوی هەبووە، لە خزمەتكردن بە خاوەن پێداویستییە تایبەتەكانی سنوورەكەمان، هەروەها رێكخراوی روانگەو رێكخراوەكانی دیكەش بەهەمانشێوە، لەگەڵ ئەوەشدا لە مانگی رەمەزانی پیرۆز و هەندێك لە بۆنەكاندا دەزگاو رێكخراوە خێرخوازەكان و كەسایەتی و دەوڵەمەندەكان، هاوكاری دارایی و ئازووقە و پێداویستی پێشكەش بە كۆمەڵەكەمان دەكەن، ئێمەش زیاتر بارودۆخی ئەم كەسانە لەبەرچاو دەگرین كە زۆر پێویستن و كەمدەرامەتن.
بەرپرسی بەشی پڕۆگرام لە كۆمەڵەی سۆران بۆ چاودێری كەمئەندامان، ئەوەشی خستەڕوو:” جگە لە كاروچالاكی و خزمەتكردن لە رێگەی سەنتەرەكانمان بە خاوەن پێداویستییە تایبەتەكان، بنكەی تەندروستی زەیتوون لە كۆمەڵەكەمان هەیە، سەر بە بەڕێوەبەرایەتی تەندروستی سۆرانە، لەو رێگەیەوە چەندین ساڵە خزمەتگوزاری تەندروستی پێشكەش بە كەمئەندامان و هاووڵاتییان بە گشتی دەكرێت، بۆ چارەسەركردن رۆژانە نەخۆش بۆ رووی تێدەكەن.
سەركار رواندزی، ئەوەشی گوت:” دوای راگەیاندنی ئیدارەی سەربەخۆی سۆران و دەستەبەكاربوونی هەڵگورد شێخ نەجیب، وەك سەرپەرشتیاری ئیدارەی سۆران، ناوچەكە بووژانەوەی زۆری بەخۆیەوە بینیووە لە گشت سێكتەرەكاندا، بۆیە ئێمەش گەشبینین كە لە داهاتوودا بەتایبەت دوای نۆژەنكردنەوەی بەشەكانی كۆمەڵەكەمان بتوانین خزمەتی زیاتر پێشكەش بە خاوەن پێداویستییە تایبەتەكانی سنوورەكەمان بكەین، داواكاریشین لە ئیدارە و سەرجەم رێكخراو و دەزگا خێرخوازییەكان و كەسایەتی و سەرمایەداران خودا پێداوان، ئاوڕی زیاتر لە كۆمەڵەكەمان بدەنەوە و دەستی هاوكاریمان بۆ درێژ بكەن، بۆ ئەوەی ئێمەش ببین بە پردێك بۆ گەیاندن و پێشكەشكردنی ئەم هاوكاریانە بەو كەسانەی كە پێویستن”.