“هەنگوینی ئیدارەی سۆران كواڵێتی باشە و رەوانەی دەرەوە دەكرێت”

پشتیوان كەریم- هەولێر:

سەرۆكی تۆڕی هەنگەوانانی هەرێمی كوردستان، بۆ زاری كرمانجی باس لە هەنگ و كواڵێتی هەنگوین لە هەرێمی كوردستان دەكات و رێژەی بەرهەمهێنانی ساڵانەی هەنگوینیش دەخاتەڕوو. هەنگەوانانیش، باس لە داواكاریەكان و بەرهەمی ساڵانەیان دەكەن.
غەریب ساڵح، هەنگەوانێكی سنووری سۆرانە، بۆ زاری كرمانجی دیاركرد:” ئەمساڵ هەنگوین زۆر باش بوو، بەتاییبەتی هی ئەو هەنگانەی كە لەناو خلیفدا بەخێو دەكرێن، نەك سندووق.
حەجی عوسمان، هەنگەوانێكی دیكەیە، بە زاری كرمانجی گوت:” داوا لە لایەنە پەیوەندیدارەكان دەكەین چی دیكە رێگە نەدەن هەنگوین لە دەرەوە هاوردەی هەرێم بكرێت، چونكە بە هاوردەكردنی هەنگوین، نرخی هەنگوینی ئێمە دابەزیوە و كەس ناكڕێت، ئەگەر حكوومەت رێگری نەكات، ناچار دەبین دەست لە پیشەی هەنگەوانی بەردەین.
ئەحمەد شوكری، هەنگەوانێكی دیكەیە بۆ زاری كرمانجی روونیكردەوە:” دیارە بەرهەمی هەنگوین لە ساڵێكەوە بۆ ساڵێكی دیكە جیاوازە، چونكە زۆر جار هەنگەكانمان بەهۆی بڵاوبوونەوەی نەخۆشییەك تووشیی لەناوچوون بوونەتەوە، هەروەها لەم ساڵانەی رابردووشدا بەهۆی بارودۆخی سەربازیی ناوچە سنوورییەكان و بوونی بۆردومانەكانی ئێران و توركیا لەم ناوچانە زیانی زۆری بۆ هەنگەكانمان و كەمبوونەوەی بەروبوومی هەنگوین هەبووە، بەڵام خۆشبختانە ئەمساڵ بە شێوەیەكی گشتی بەرهەمی هەنگوین لە بەرزبوونەوە و هەڵكێشاندایە، وەك دیاریشە هەنگوینەكەی من سروشتییە، چونكە من شەكر و ئەم جۆرە شتانەیان پێ نادەم، بەمەش خواستی زۆری كڕینی لەسەرە لەلایەن هاووڵاتییانەوە
لە دەسپێكی قسەكانیدا، عارف شێروانی، سەرۆكی تۆڕی هەنگەوانانی هەرێمی كوردستان، دەڵێت:” تا ئێستا رەوشی هەنگ لە هەرێمی كوردستان باشە، لە بارەی كواڵێتی هەنگوینی كوردستان بەگشتی و ئیدارەی سۆران بەتایبەتی، دەڵێ:” هەنگوینی كوێستانەكانی ئیدارەی سۆران باشە ئەوەش لەبەر ئەوەیە ئەو ناوچانە لە بار و شیاون بۆ بەخێوكردنی هەنگ.
شێروانی، گوتیشی:” ساڵی رابردوو زیاتر لە 51 تۆن هەنگوینی هەرێمی كوردستان هەناردەی وڵاتانی ئەوروپا و عەرەبی كراوە، ئەمساڵ خواست زیاتر بووە لەسەر هەنگوینی هەرێمی كوردستان، ئەوەش ئەوە دەگەیەنێت كە هەنگوینی هەرێمی كوردستان لە هەنگوینی وڵاتانی دیكە خواستی زیاترە.
عارف شێروانی، نەیشاردەوە:” چەندین جۆر هەنگوین لە هەرێمی كوردستان بەرهەم دێت، ئەوەش وا دەكات نرخی جیاواز بێت، بەڵام ئەوەی لە هەموویان باشتر كە سرووشتی بێت كیلۆی سەرووی 70 هەزار دینار دەكات”.