زاری كرمانجی-سۆران:
بە سەدان خێزانی ئاوارەی شارەكانی عێراق، لە ئیدارەی سۆران ماون و تا ئێستا نەگەڕاونەتەوە، نیگەرانن لەوەی كە حكوومەتی عێراق پشتی تێكردوون و هیچ هاوكاریان پێشكەش ناكات، تەنانەت بەم وەرزەی سەرما نەوتیان بۆ دابین نەكراوە.
لای خۆیەوە عەباس ئەمیر، بەڕێوەبەری نووسینگەی كۆچ و كۆچبەران و وەڵام دانەوەی قەیرانەكان، بەزاری كرمانجی راگەیاند: ” بەسەدان خێزانی شارو شارۆچكەو ناوچەكانی عێراق و ناوچە كوردستانییەكان، تا ئێستا لە سنووری ئیدارەی سۆران ماون و نەگەڕاونەتەوە، كەچی بەداخەوە ماوەی چوار ساڵە حكوومەتی فیدراڵی هیچ هاوكارییەكیان ناكات، هەروەها هیچ بڕە نەوتێكی بەسەر دابەش نەكردوون، لەو ماوەیەدا چەندین جار لیستی ئاوارەكانمان بۆ ناردوون، بەڵام ئامادەنەبوونە نەوتیان بەسەردا دابەش بكەن، هەروەها بە هۆی نەبوونی پسوولەی خۆراكی لێرەش ناتوانن سوودمەند بن”.
بەڕێوەبەری نووسینگەی كۆچ و كۆچبەران و وەڵام دانەوەی قەیرانەكان، دەشڵێت، ساڵی پار رێكخراوێكی بیانی بۆ هەر خێزانێك بڕێك نەوتی بەسەر دابەش كردن، لەمساڵیشدا هەوڵەكانمان بەردەوامە بۆ ئاوردانەوە لەو ئاوارانە”.
