حازم بلەیی
د هەڤسەنگییا هەستیار یا مان و نەمانێ دا، ڕێبەرایەتی نە بتنێ پلە و پۆستەکێ کارگێڕی یە، بەلکو بەرپرسیا گوڕینا چارەنڤیسێ مللەتەکی و هەلگرتنا خەما دیرۆکێ یە ل سەر ملان، د قۆناغێن هەستیارێت ژیانا گەلان دا، هندەک کەسایەتی پەیدا دبن کو دبنە چەپەرێن نەهەژیای، رێزدار سەرۆک مەسعوود بارزانی ب وێ خەمخۆریا خۆ یا بێ سنوور کو هەمی ئاخا کوردستانێ ب بێ جوداهی د پارێزیت، سەلماندیە کو ئەو سیمبوڵێ مان و بەردەوامییا مە یە.
ئەگەر ئەم ل ڕەفتار و مێژوویا سەرۆک بارزانی بنێڕین، دێ بینین کو ئەو وەک سەرکێشەکێ مەیدانی، هەمیشە ل سەنگەرێت کەرامەتێ ڕاوەستایە. وی ب کریار نیشانی جیهانێ دا کو ڕێبەرایەتی، بەری هندێ فەرماندەیی بیت، پڕاکتیککرنا فیداکاریێ و پێشەنگ بوونە د قوربانیدانێ دا. ئەڤ ڕاوەستانە بوویە ئەگەر کو جەوهەرێ مللەتێ مە ل هەمبەر هەر هێرش و پیلانەکا ل دژی قەوارێ مە، ب پاراستی بمینیت.
لەوما، ئەڤڕۆ ئەرکێ ئەخلاقی و نەتەوەیی یێ هەر کوردەکێ دڵسۆزە، کو ژ دل و ب ئێک دەنگ بێژیتێ ڕێبەر. ئەڤ ناسناڤە نە ژ بۆ مەدح و سەنایانە، بەلکو بەرهەمێ وان سیفاتێت بلند و حیکمەتا سیاسی یە یا کو د تاریترین کاودانان دا، شیای کەلها پاراستنا گەلێ مە ژ ناڤ ئاگرێ رووداوان دەرباز بکەت و بەرەڤ کەنارێ قورتالبوونێ ببەت.
سەرۆک بارزانی، ئەو هێڤیا زیندی و سەروەرێ دادپەروەریێ یە کو کوردپەروەری ل نک وی بوویە عیرفانەکا کریاری. ب دڵسۆزییا وی، گەلێ مە ژ هەمی لەرزینێن مێژوویی یێت کو گەلەک نەتەوە ژ ناڤ برین، پاراستی مایە. بێگۆمان ب هەژیترین کەس کو وەک مەرجەعێ بلندێ نەتەوەیی لێ بنێڕین هەر ئەوە، چونکی وی هەمی ژیان و ئەزموونا خۆ کرە قوربانی دا کو مللەتێ کورد ب سەرفرازی و سەربلندی د ناڤ جیهانا نو دا بمینیت.
