شاندێكی فراكسیۆنی پارتی دیموكراتی كوردستان لەگەڵ سەرۆك وەزیرانی عێراق كۆ دەبنەوە، بۆ بابەتی مووچە و بودجە گفتوگۆیان كردووە و سوودانیش بەڵێنێكی پێداون.
شەوی رابردووو شاندێكی فراكسیۆنی پارتی دیموكراتی كوردستان، لەگەڵ محەمەد شیاع سوودانی سەرۆك وەزیرانی عێراق كۆبوونەوەیەكیان ئەنجام دا، لە كۆبوونەوەكەدا چەندان پرسی وەك كاراكردنەوەی مادەی 140، پارەی جووتیارانی كوردستان و جێبەجێكردنی ڕێككەوتننامەی شنگالیان تاوتوێ كرد.
بەشێكی كۆبوونەوەكە گفتوگۆ بووە لەبارەی گرنگیی جێبەجێكردنی بەرنامەی وەزاری حكوومەت، چارەسەركردنی كۆمەڵێك پرسی زۆر گرنگی پێوەست بە هەرێمی كوردستان، لەوانەش قەرەبووكردنەوەی ئاوارەكان، قەرەبووكردنەوەی خێزانی ئەنفالكراوان و شەهیدان، لەگەڵ پڕكردنەوەی بۆشایی تەناهیی ناوچە كێشە لەسەرەكان و دەستبەكاربوونی لیوای هاوبەش لەو ناوچانە، سەرباری ئەوانە مافە داراییەكانی پێشمەرگە و دامەزراندنی فەرمانبەرانی گرێبەستی كۆمسیۆنی هەڵبژاردنەكان، تەوەرێكی تری كۆبوونەوەكە بووە.
سوودانی دووپاتی لە پێویستیی گرتنەبەری پرەنسیپی هاوسەنگی و پێكەوەژیان، دادپەروەری لە مادە و یاسای بودجەی فیدراڵی بۆ ساڵی 2023، هاوئاهەنگی لەگەڵ حكوومەتی هەرێمی كوردستان كردووەتەوە لەگەڵ شایستە داراییەكانی هەرێمی كوردستان.
ئەو كۆبوونەوەیە لە كاتێكدایە، ئێستە حكوومەتی عێراق سەرجەم هەنگاوەكانی لە ئامادەكردنی بودجەی ساڵی 2023ـی عێراق چڕ كردووەتەوە و دەیەوێ پێش ساڵی نوێ بودجە ئامادە بكرێ، بەپێی گوتەی پەرلەمانتارانی كورد، لەو بودجەیە ئاماژە بە پشكی هەرێمی كوردستان كراوە.
