کۆمپانیای گشتی هێڵە ئاسمانییەکانی عێراق پلانێکی نائاسایی بۆ گەڕاندنەوەی ئەو هاووڵاتییانە ڕاگەیاند کە بەهۆی بارودۆخی ئەمدواییەی ناوچەکەوە لە دەرەوەی وڵات گیریان خواردووە.
بەپێی ڕاگەیەندراوێکی فەرمی کۆمپانیاکە، لە سبەی یەکشەممەوە (15ی ئازار) تا ڕۆژی چوارشەممە، 6 گەشتی ئاسمانیی تایبەت و نائاسایی ئەنجام دەدرێن. ئەم گەشتانە تایبەت کراون بە گەڕاندنەوەی عێراقییەکان لە دوو وڵاتی جیاوازەوە کە بریتین لە: (2) گەشت لە قاهیرەی پایتەختی میسرەوە و (4) گەشت لە شاری دەلهیی وڵاتی هیندستانەوە.
سەبارەت بە شێوازی گەڕانەوەکە، هێڵە ئاسمانییەکانی عێراق ڕوونی کردووەتەوە کە فڕۆکەکان سەرەتا بەرەو خاکی عەرەبستانی سعوودیە دەفڕن، دوای نیشتنەوەیان، هاووڵاتییان لە ڕێگەی وشکانییەوە دەگوازرێنەوە بۆ دەروازەی سنووری “عەرعەر” و لەوێوە دەگەڕێندرێنەوە ناو خاکی عێراق.
ئەم دەستپێشخەرییە وەک کارئاسانییەک دێت بۆ ئەو کەسانەی کە ماوەیەکە بەهۆی ڕاگرتنی گەشتە ئاساییەکانەوە لە دەرەوەی وڵات ماونەتەوە و چاوەڕوانی گەڕانەوەن بۆ ناو کەسوکاریان.
