بەهۆی پڕۆژەی ئاو ناتوانرێ خزمەتگوزاری رێگاوبان لە بلێ جێبەجێ بكرێت

مستەفا دۆلەمەری– مێرگەسۆر
لە دیمانەیەكی زاری كرمانجیدا، نادر محەمەد سەرۆكی شارەوانی بلێ باس لە پڕۆژەی خزمەت گوزاری و كێشە و گرفتەكانی بەردەم شارەوانی دەكات و ئاماژە بەوەدەدات، زێدەڕۆی لە سنووری شارەوانیمان كەمە و خەڵك بەشێوەیەكی باش هاوكارمانن، دەشڵێت:”بەهۆی پڕۆژەیەكی ئاوی گوندەكانی بارزان، نەتوانراوە پڕۆژەی دیكەی خزمەت گوزاری بە تایبەت رێگەوبان لە بلێ جێبەجێ بكەین.
لە دەستپێكی قسەكانیدا، نادر محەمەد سەرۆكی شارەوانی بلێ بە زاری كرمانجی گووت:” بلێ لە لە رووی كارگێڕییەوە سەر بە ناحیەی بارزان لە قەزای مێرگەسۆرە، زیاتر لە 1500 ماڵی لێیە و رێژەیەكی زۆری دانشتووانی هەیە، هەروەها ٧٠٠ دوكان و ماركێتی گەورە لە سنوورەكەمان بوونی هەیە و بەردەوام لە بەفراوانیش دایە.
سەرۆكی شارەوانی بلێ، دەڵێت:“ بەهۆی پڕۆژەی ئاوی 51 گوندی دەڤەری بارزان، پرۆژەی گەورەمان ئەنجام نەداون، تا پرۆژەی ئاویش تەواو نەكرێت ناتوانین رێگەوبانەكان قیڕتاو بكەین، چونكە دواتر بەهەر هۆكارێكی لە كار كەوتن گرفت بۆ رێگەوبانەكانمان دروست دەبێت، بۆیە پێویستە سەرەتا كێشەی ئاو چارەسەر بكرێت، دەشڵێت:” خۆشبەختانە بە هەوڵی مەلا مستەفا مەسعوود بارزانی و بە هەماهەنگی بەڕێوبەرایەتی ئاو و ئاوەڕۆی هەرێم و ئیدارەی سەربەخۆی سۆران و قائیمقامیەتی قەزای مێرگەسۆر و فەرمانگەی ئاوی بارزان، لە ساڵی داهاتوو دەست بە جێبەجێ كردنی پڕۆژەی ئاوی گوندەكانی بارزان دەكرێت و لە ماوەیەكی زوودا تەواو دەبێت.
نادر محەمەد، دووپاتی كردەوە:” لە ئێستادا دوو پرۆژەی بچوكمان هەیە كە كاریان لەسەر دەكەین، ئەوانیش پڕۆژەی تێكدانی سێڕیانی ناو بڵێ و چاككردنەوەی بە شێوازێكی نوێ بە گوژمەی سێ ملیۆن دینار، هەروەها لە پڕۆژەی دووەم بە گوژمەی چواردە ملیۆن دینار گۆڕستانی ناو بلێ كاری نۆژەنكردنەوەی بۆ دەكرێت كە پێكدێت لە بۆیە كردن و دروست كردنی رێگای گۆڕستانەكە و گۆڕینی ئەو دیوارانەی كە بە هۆی روداوی هاتووچۆ تێكچوو بوون، هەروەها بە گوژمەی 50 ملیۆن دینار رێگای ئەوگوندانەی كە لە وەرزی زستاندا كێشەیان هەیە تێكەڵەڕێژ دەكرێن و ئاسانكاریان بۆ دروست دەكرێت.
سەرۆكی شارەوانی بلێ، لە بەردەوامی هەڤپەیڤینەكەدا، ئاشكراشی دەكات:” تا ئێستا تاپۆ كردنی زەوی لە سنووری شارەوانیمان جێبەجێ نەكراوە، بەشێوەیەكی گشتی لە سنووری قەزای مێرگەسۆر تاپۆكردنی زەوی بوونی نییە، هەروەها زێدەڕۆی لە بلێ كەمە، چونكە هەر كەسەو ئەو زەویەی هەیەتی لە باب و باپیرانیەوە بۆی ماوەتەوە، بەڵام لەكاتی دروست كردنی خانوو یاخود باڵەخانەیەك شارەوانی لێ ئاگەدار دەكرێتەوە و ئێمەش لیژنەیەك بەسەرۆكایەتی ئەندازیارێك بۆ شوێنی مەبەست رەوانە دەكەین و بەپێی رێنمایەكان رێگە پێدانیان بۆ دەكەین بەشێوەیەك زێدەڕۆی نەكرێتە سەر شەقام، خۆشبەختانە خەڵكەكە زۆر هاوكار و یارمەتیدەرمانن.
روونیشی دەكاتەوە، زیاتر لە 9 گوندی سنوورەكەمان بەهۆی پەكەكەوە چۆڵ كراون، كاتی خۆی كۆمەڵگەیەكییان بۆ دروست كرا بە ناوی كۆمەڵگەی ” داراداز ” و بە شێوەیەكی رێكوپێك ئەو شوێنەیان بۆ دروست كراوە تەواوی خزمەت گوزاریەكانیش بۆیان دابین كراوە و هۆكارەكەش پەكەكەیە لە گوند و ئاوایان ئاوارە بوونە. بەشێوەیەكی گشتی زیاتر لە 16 جارە لە لایەن رژێمی بەعسەوە دەڤەری بارزان هاتۆتە سوتاندن و تۆپبارانكردن و خەڵكەكەی ئاوارە و دەربەدەربوونە و هەزاران كەس شەهید و بریندار بووە و كراوەتە قوربانی .
نادر محەمەد، گووتیشی:” لە ئێستاشدا زیاتر لە 30 داموودەزگای میری و حیزبی لە دەڤەرەكە بونی هەیە، هەموشیان بەشێوەیەكی رێك دروست كراون بۆ خزمەت كردنی هاووڵاتییان، هەموو ئەوانەش لەسایەیی خەمخۆری جەنابی سەرۆك بارزانی بە دەست هاتوون”.