غیاس خالد زێباری
د وەڵاتێن تازە پێگەهشتی و نیمچە سەربخۆ دا، ناکۆکیێن سیاسی یێن نە ڕەوا و دژی بەرژەوەندێن گشتی سەرهەڵددەن، چونکی هێشتا بریارێن ئێکلاکەر نەکەفتینە د دەستێ دەستهەڵاتا جێبجێکاردا و سەروەریا یاسایێ وەکی پێتڤی بەرجەستە نابیت، چونکێ هەڤڕکیێن حزبایەتی سنوورێن خۆ دبەزینن و دگەهیتە ئاستێ دۆژمنایەتیێ و تۆندڕەویێ، ئەڤەژی ژ ئەنجامێ کۆنترۆلکرنا هێزێن چەکدار و هێزا ئابۆری و درایی یە ژلایێ حزبێن سیاسی، بەردەوامیا ڤێ چەندێ رێگریێ ل نشتیمانیبوونا سازیێن وەڵاتی دگریت، نشتیمانینەبوونا سازیێن وەڵاتی ژی دەرگەهی ل سەروەرینەبوونا یاسایێ و گەندەڵیێ و نەدادوەریێ ڤەدکەت.
هەرێما کوردستانێ پشتی سیهــ ساڵێن خۆڕێڤەبرنێ بن سێبەرا پەرلەمان و حکومەتێ، هێشتا حزبێن کوردستانێ قۆناغا دژبەریێ بۆ قۆناغا هەڤڕکیێ دەرباز نەکری یە، راستە هەرێما کوردستانێ رەوشەکا تایبەتا هەی و زۆر قۆناغێن دژوار بسەردا هاتن و پیلانێن هەرێمی بەردەوام بۆ دهێنە دارشتن و مانەڤا ڤێ هەرێما نیمچە سەربخۆ و دەربازبوون بسەر ڤان هەمی پیلان و ئاستەنگا حیکمەتەکا مەزنە و جهێ دەستخۆشیێ یە، لێ پێتڤی بوو دڤان ٣٠ ساڵان دا ئاستێ تێگەهشتنا هندەک سەرکردێن ئالیێن سیاسی ل قۆناغا دژبەریێ بەرامبەر حزبێن دیتر هاتبانە گۆڕین بۆ قۆناغا هەڤڕکیا ساخلەم و ئێکتر قەبۆلکرنێ و مەزنتر دیتنا بەرژەوەندێن نشتیمانی و قەوارێ هەرێما کوردستانێ ل بەرژەوەندێن بەرتەسکێن حزبایەتی، پێتڤی بۆ سەرکردێن حزبێن سیاسی پێشەنگ بانە بۆ بسازیکرنا دەستهەڵاتێن هەرێمێ و نشتیمانیکرنا ئۆرگانێن لەشکری و ئێمناهی و ئابۆری.
ئەوا ئەڤرۆ دناڤبەرا پارتیێن کوردستانی دهێتەکرن، بتایبەت پارتی دیموکراتی کوردستان و ئێکەتیا نشتیمانیا کوردستانێ، سەرەدەریێن دوژمنکارانە نە، نەک هەڤرکڕی، خەلکێ کوردستانێ ژی بڤان ڕەفتار و سەرەدەریا زۆرێ دڵگرانە، چونکی د ترسیت بەردەوامیا ڤێ چەندێ کارڤەدانێن دژواتر لدیڤ خۆ بینیت، کۆ مەترسیێ لسەر قەوارێ هەرێما کوردستانێ درۆست بکەت، مینا دوو ئیدارەیی یێ یان شەرێ ناڤخۆیی. بۆ نەهێلانا ڤێ هەڤڕکیا دژوارا دناڤبەرا ڤان پارتیاندا، خەلکێ کوردستانێ دشێت ڤان ناکۆکیا ڤەڕەڤینیت، ئەگەر کراسێ سۆزدایا حزبایەتی دانێت وب هشیاری و عەقلانە سەرەدەریێ لگەل بکەت و کراسێ بەرژەوەندێن نشتیمانی و هەرێما کوردستانێ لبەر خۆ بکەت و بەرژەوەندێن حزبایەتی مەزنتر و پیرۆزتر نە بینیت، چونکی خەلکێ هشیار، ڕەش و سپیا ــ چەپ و ڕاستا، ژێک جودا دکەت و دزانیت کێ حزب و کێ سەرکردە، دەستکەفتێن پیرۆزێن خەلکێ کوردستانێ دپارێزیت و قەوارێ هەرێما کوردستانێ بەرەڤ سازیکرنێ و سەروەریا یاسایێ و پێشڤەبرنێ و ئێمناهی و سەقامگیریێ دبەن و کی حزب و سەرکردە، بەرۆڤاژی رەفتا و سەرەدەریا دکەت و پاراستنا بەرژەوەندێن خۆ و حزبا خۆ ل بەرژەوەندێن گشتی مەزنتر دبینیت..!، ئەڤرۆ لسەر خەلکێ کوردستانێ نەخاسمە چینا رەوشەنبیر و نڤیسکار و راگەهاندکا و چالاکڤانێن سۆشیال میدیایێ پێتڤی یە دەست ب هەوەکا بەرفرەهــ بکەن بۆ هەڵویست وەرگرتنا خەلکی بەرامبەر وان ناکۆکیێن حزبا ئەوێن مەترسیێ لسەر هەرێما کوردستانێ و خەلکێ وێ درۆست دکەن و داخازیا ئێکرێزیێ و ئێک ئیدارەیی یێ بکەن، ئەگەر نە لایەنێن خەمسار و دژی ئێکرێزیێ و بەرژەوەندێن گشتی ل هەلبژارتنا شەرمزار بکەن و هەمی پێکڤە ببنە فاکتەرێن ئاشتیێ و ئاشتەواریا جڤاکی و رێکێ نەدەن ناکۆکی تەشەنەتر بن، چونکی زیان بەخشێ ئێکێ و دووماهیێ خەلکێ بێ دەستهەڵاتێ کوردستانێ یە .
