ن : گولستان بەهجەت
كاتێ فەرشی سوور بۆ جەنڕاڵ مەزلووم عەبدی رادەخرێت و نوێنەرانی وڵاتێكی داگیركاری كوردستان گۆڕەپانەكە بەجێ دەهێڵێت، گۆڕانكاری راستەقینەی ناوچەییمان بۆ روون دەبێتەوە، پێشوازیكردن لە مەزلووم عەبدی لە لایەن سەرۆك، وەزیر و نوێنەری وڵاتان لە میونشن بە تایبەتی وەزیری دەرەوەی ئەمریكا و سەرۆكی فەرەنسا پەیامێكی روونی هەبوو، بۆ داهاتووی نەتەوەی كورد لەسەر نیشتمانی خۆی، ئەمە دیوێكی بابەتەكەیە. دیوی دیكەی گەیشتنی هەر دوو هاوسەرۆكی هەسەدە بە میونشن، هەوڵ و ماندوو بوونەكانی جەنابی سەرۆك بارزانی و سەرۆكی هەرێم و سەرۆكی حكومەتی هەرێم بوو، هەر چەندە هیچ منەتێكی تیدا نییە و وەك ئەرك پیشاندرا و هەرواش بوو، وتارەكانی هەر دوو هاوسەرۆك لە میونشن و دواتریش لە شوێنەكانی دیكە راستی ئەو بابەتەمان بۆ دەسەلمێنن كە بنەماڵەی بارزانی چ رۆڵێكی كارایان هەبووە بۆ رزگار كردنی رۆژئاوای كوردستان لە جینۆسائید و راگرتنی هێرشەكان، دواتریش لۆبی كردن لەسەر ئاستی جیهان بۆ خۆپیشاندانی نەتەوەیی، هەروها گەیاندنی دەنگی كوردان لە سەكۆی باشووری كوردستانەوە بۆ هەموو ناوەندە بڕیاردەرەكان و كەسایەتییە كاریگەرەكانی جیهان.
كۆ كردنەوەی هاوكاری بۆ هاونیشتیمانیانی رۆژئاوا بە فەرمان و رێنمایی سەرۆك بارزانی روونە.
راستە بەرگریكردنی سەربازی هەسەدە لە رۆژئاوای كوردستان خاڵی دەستپێك بوو، تا زەمینەی دیپلۆماسی و لۆبی كردن بڕەخسێت، بەڵام ئەگەر سەرۆك بارزانی سەردانی ڤاتیكانی نەكردبایە، ئەگەر پەیوەندی لەگەڵ ئەمریكا و وڵاتە زڵهێزەكانی دیكەی ئەوروپایی نەكردبایە، بە هۆی ناهاوسەنگی هێز و جوگرافیای داخراو، شتێك بە ناوی بەڕێوەبەری خۆسەر نەدەما.
ئێستا لێرەو لەوێ مشتێك بڕوانامەداری نەخوێندەوار ڕاست بوونەتەوە و بە قسە و رێنمایی حزب یا گرووپێك لە ناو حزب دەیانەوێت لە ڕۆڵی پارتی و بنەماڵەی بارزانی بۆ پشتگیریان لە رۆژئاوای نیشتیمان كم بكەنەوە.
هەر چەندە گووتەكانی جەنڕاڵ مەزلووم عەبدی بەخۆی وەڵامی هەموو ئەو ناخ پیسانەی دایەوە كاتێ گووتی” سەرۆك بارزانی نەبایە كارەسات لە رۆژئاوا دەقەوما تا راددەی جینوسائید كردن” یا كاتی گووتی ” زۆر سوپاسی هەموو هەوڵ و ماندوویەتی كاك نێچیرڤان بارزانی دەكەم كە بووە هۆكاری گەیشتنی ئێمە بۆ میونشن” هەر دوو هاوسەرۆك پڕ بەدڵ و لە ناخەوە سوپاسی مەسرور بارزانیان كرد بۆ هەموو هاوكاری و ئاسانكارییە سیاسی و پەیوەندییە نێودەوڵەتییەكان، ئیتر هەر كەس و لایەنێك بیەوێت لە رۆڵی پارتی و بنەماڵەی بارزانی كەم بكاتەوە دەستی بە بەتاڵی لە بنی هەنبانە دێتە دەڕێ.
لەم دۆخەی كوردستان و ناوچەكە بەگشتی تێداتێپەڕ دەبێت ئەو بڕوانامەدارە نەخوێندەوارانە باشترە هێزی خۆیان بۆ یەكڕێزی و تەبایی نێو ماڵی كوردی بەكار بهێنن، پەلاماردانی یەكتری جگە لە پشت شكاندن هیچی لێ بەرهەم ناهیت.
