سەردار قازی -سۆران:
ئاڤان عەدنان تەمەن 16 ساڵە و ئارەزوومەندێكی پێشكەوتنی وەرزشە لەئیدارەی سەربەخۆی سۆران. خاوەنی بەهرەیەكی نایابی پاسكیلسوارییە، ماوەی 5 ساڵە وەك پاسكیلسوارێكی نایاب دەردەكەوێت و لەپاڵەوانێتیەكانی دەڤەرەكەدا پشكدار بووە، و بەدەسكەوت تەواویكردوون.
ئەم خانمە دەركەوتەی گرنگیدان بە بوارەكە بەكلتوركردنی پاسكیلسواری دەبینێت، هاوكات لە پێناو تەندروستیەكی باشتر و ژینگەیەكی پاكتر.
ئاڤان، حەزو خولیای زۆری بۆ وەرزشی پاسكیلسواری، مەلەوانی و شاخڕەوی هەیە. گەرچی لە شارەكەیان یانەی تایبەت بەخانمان نییە، بەلام لەڕێگەی ئەو گرووپەی دایان مەزراندوە هانی چەندین ئارەزوومەندانیانداوە، بۆ نێو ئەم وەرزشە سودبەخشە هەر لەڕێگەی گرووپەكەیانەوە ئاشنای پێشبڕكێ و پاڵەوانیەتیەكانی ئەم وەرزشانە بوونه، بۆ ئەوەی بتوانن بەشداری بكەن لە پاڵەوانێتییەكانی نێوەخۆ و دەرەكی.
ئەو خانمە تەمەن 16 بەهارییە چڕتر دێتە سەر توێیەك لەژیانی وەرزشی خۆی و دەڵێت: “وەرزشكردن بۆ تەواوی مرۆڤایەتی تەندروستیەكی باش فەراهەم دەكات، لەو روانگەیەشەوە هەمیشە لە هەوڵدابووم بۆ هاندانی خانمانی شارەكەمان، بۆ ئەوەی روو لە وەرزش بكەن لە پێناو تەندروستیەكی باشتر بۆ خۆیان. گەر كەسێك وەك یاریزان دەستكەوتێك لە بواری وەرزش بوێت، ئەوە دەبێتە شانازییەكی گەورە بۆ خۆی و كۆمەڵگە و كوردستان.”
باسی یەكێك لەهۆكارەكانی دووركەوتنەوەی جێندەری مێینە لەوەرزش دەكات: “بەهۆی هەندێك رووداوی دوور لە ئەخلاقی و پیشەیی وەك لە ساڵانی رابردوو روویاندا، كاریگەریەكی زۆری كردوەتە سەر خێزانەكان، كە رێگە بەكچەكانیان نەدەن بڕۆنە یانە وەرزشییەكان و ئەو ئاست و توانای هەیانە بەدەری بخەن، ئەگەرچی كۆمەڵێك زەمینە خۆشكەر هەیە، بەڵام كاریگەری رووداوەكان ترسی لەدڵی خێزانەكان دروستكردووە كە دەبێت كار لەسەر ئەوە بكرێت، جوانی پاكییەتی بۆ وەرزش بگەڕێتەوە تاكو هەمووان بە ئاسودەی كچەكانیان ئەمانەتی یانەكان بكەن و ببنە نموونەی سەركەوتن بۆ شار و وڵات.”
ئاڤان، لەدیوێكدا دێتە سەر باسی رەوشی وەرزشی وڵات: “ئاستی وەرزش لە عێراق و بەتایبەتی لە كوردستان بەشێوەیەكی پشتگوێخراو و لاواز دەبینم، بەهۆی دەستوەردانی حیزبەكان لە بواری وەرزش و خزمەت نەكردن بە یاریزان و بەكارهێنانی یاریزان بۆ بەرژەوەندی تایبەتی وایكردوە تا بێت وەرزش بۆ دواوە بچێت، بۆیە داواكارم لە یاریزانەكان ” لە هەر یانەیەك خزمەت نەكران و پێداویستی سەرەكی بۆیاریزان دابین نەكرا ئەوە یانەیە جێبهێڵن، چونكە وەرزش لە هەموو جیهان سەردەری پێشكەوتن و داهات و گەشتیاری بۆ وڵاتە تەنها، لەكوردستان وەرزش نەبووەتە هۆی دابینكردنی بژێو بۆ یاریزان لە ئاست ماندوبونیان.”
هەروەها دەشڵێت: “خێزانەكەم و هەندێ هاوڕێكانم هاندەرێكی سەرەكی منن بۆ بەردەوام بوون و پێشڤەچوونم لە بوارەكەم.”
ئەم خانمە یاریزان بەشداری یەك خولی كردوە كە لەلایەن ڕێكخراوی ورە كراوەتەوە و سودێكی زۆری لەو خولە بینیوە. لەم ساڵدا لە دوو كەرنەڤاڵی جیاواز خەڵاتی رێزلێنانی پێبەخشراوه وەك كەساییەتی وەرزش بۆ ساڵی ٢٠٢١ كە خزمەتێكی زۆری بە وەرزشی دەڤەرەكەیان كردوە.
ماوەی 5 ساڵە خزمەت بە بواری وەرزش دەكات و چـەندین خولی فێربوونی پاسكیلی بۆ خانمانی شارەكەی كردوەتەوە و خۆشبەختانە رێژەیەكی زۆر لە خانمان بەشداریان لە خولەكانی كردووە.
ئاڤان زیاتر چڕ دەبێتەوە: “لەپێناو هاندانی خانمان دێمە سەرشەقام و پاسكیل لێدەخورم، تاوەكو بیسەلمێنن خانمانیش شان بە شانی كوڕان رێگە سەختەكان دەبڕن.”
ئەوەشی گووت: “چەندین جار بەشداریم لە پێشبڕكێ و پاڵەوانێتیەكان كردوە لە جۆری پاسكیلی ركابەری شەقام لەسەر ئاستی كوردستان و عێراق. چەندەین بەڵێنی ناڕاستمان پێدراوە كە تائێستا جێبەجی نەكراوە.”
وەرزش لای ئاڤان واتای تێركردنی حەز و سەركێشیكردنە بۆ هۆشیاربوونەوەی هاورەگەزانی خۆی.
ئەو هێما بۆ ئەوە دەكات، “كە وەرزش لای من حەزو خولیا و پاراستنی تەندروستییە، رەنگە لە داهاتوو بیرلەوەبكەمەوە وەرزش بكەمە پیشەو سەرچاوەی داهات، بۆ زیاتر گرنگی دان بە وەرزشی پاسكیلسواری لە پڕۆگراممدایە لە داهاتوو لە شاری سۆران، گرووپێك لەپاسكیلسوارانی خانم دروستبكەین و بەشێوەی فراوان بەشداری پێشبڕكێیەكان بكەین. هەڵبەت تائێستا خۆم بە یاریزان نازانم، چونكە لە شارەكەمان ئەگەرچی هیچ یانەیەكی پاسكیلسواری نییە و هیچ كەسێك و ڕاهێنەرێكم نەبووە تاكو ئاستی خۆم پێشخەم بۆ ئەم وەرزشە.”
