فەریدە موڕادخانی : گەلانی ئازاد، لەگەڵمان بن و بە حكومەتەكانتان بڵێن چیتر پشتیوانی لەم ڕژێمە بكوژ و منداڵ كوژە نەكەن
زاری كرمانجی :
لە گرتە ڤیدیۆیەكدا خوشكەزای ڕابەری باڵای ئێران ئایەتوڵا عەلی خامنەئی داوا لە حكومەتەكانی جیهان دەكات پەیوەندییەكانیان لە گەڵ تاراندا بپچڕێنن.
فەریدە موڕادخانی چالاكەوان و ئەندازیار كە باوكی كەسایەتییەكی دیاری ئۆپۆزسیۆن بووە و هاوسەرگیری لەگەڵ خوشكی خامنەئیدا كردووە، بە شێوەیەكی بەرچاو ڤیدیۆكەی لە ئینتەرنێت بڵاو بووەتەوە.
موڕادخانی لە گرتە ڤیدیۆیەكەیدا دەڵێ:” گەلانی ئازاد، لەگەڵمان بن و بە حكومەتەكانتان بڵێن چیتر پشتیوانی لەم ڕژێمە بكوژ و منداڵ كوژە نەكەن. ئەم ڕژێمە هاوسۆزی بۆ هیچ كام لە بنەما دینییەكانی نیە و هیچ یاسایەكی دیكە جگە لە بەكارهێنانی هێز و پاراستنی دەسەڵات نازانێت.”
ڤیدیۆكەی فەریدە موڕادخانی ڕۆژی هەینی لەلایەن مەحمود موڕادخانییەوە بڵاوكرایەوە كە لە فەڕەنسا دەژی لە هەژماری تایبەتی خۆیدا لە تویتەر خۆی بە ” ڕكابەری كۆماری ئیسلامی ” ناساندووە، دواتریش ڤیدیۆكە لەلایەن چالاكەوانە دیارەكانی مافەكانی مرۆڤی ئێرانەوە بڵاوكرایەوە.
لە 23 ی مانگی یانزەدا مەحمود موڕادخانی ئاماژەی بەوەدا دەستگیركردنی خوشكەكەی لەلایەن بەرپرسانی ئێرانەوە لە كاتێكدا بووە كە فەریدە بەرەو دادگا ڕۆیشتووە تاوەكو بچێتە بەردەم ئۆفیسی دادوەری گشتی تاران. فەریدە لە ماوەی ڕابردوودا لەم ساڵدا لەلایەن وەزارەتی هەواڵگری ئێرانەوە دەستگیركرا و دواتر بە كەفالەت ئازاد كرا.
دەزگای هەواڵی چالاكەوانی مافەكانی مرۆڤ وتی :” فەریدە لە بەندینخانەی ئیڤینی تاران بووە. وتیشی پێشتر موڕادخانی ڕووبەڕووی سزای 15 ساڵ زیندانی بۆتەوە و تۆمەتەكەشی كە خراوەتە پاڵی دیارینەكراوە.”
باوكی فەریدە، عەلی موڕادخانی مەلایەكی شیعە بووە و هاوسەرگیری لەگەڵ خوشكی خامنەئیدا كردووە، بەپێی ماڵپەڕەكەی لەمدواییانەدا دوای چەند ساڵێك لە دووربوونی بەهۆی هەڵوێستییەوە دژی كۆماری ئیسلامی، لە تاران كۆچی دوایی كرد.
فەریدە لە ڤیدیۆكەیدا دەڵێت:” ئێستا كاتی ئەوەیە سەرجەم وڵاتانی ئازاد و دیموكرات نوێنەرانیان لە ئێران بكشێننەوە، ئەوەش وەكو دەستپێشخەرییەكی سیمبولی و دەركردنی نوێنەرانی ئەم ڕژێمە دڕندەیە لە وڵاتەكانیان.”
ڕۆژی پێنجشەممەی رابردوو ڕێكخراوی مافەكانی مرۆڤی نەتەوە یەكگرتووەكان بە كۆی دەنگ بڕیاریدا ئەركێكی لێكۆڵینەوەی دیكە دەستپێبكات بۆ لێكۆڵینەوە لە سەركوتكارییە توندوتیژییەكەی ئێران دژی خۆپیشاندانەكانی دژ بە حكومەت.
بەپێی سەرچاوەكانی دەزگای هەواڵی چالاكەوانانی مافەكانی مرۆڤ، لە ماوەی دوو مانگی خۆپیشاندانەكەوە زیاتر لە 450 خۆپیشاندەر كوژراون و كە لەنێو قوربانییەكاندا 63 مێرمنداڵ هەیە، هەروەها دەشڵێت 60 ئەندامی هێزەكانی ئاسایش كوژراون.
دوێنی یەكشەممە ماڵپەڕی ئینتیخان لە ئەندام پەرلەمانی شاری مهاباد جەلال مەحمودزادەوە لە میانەی مشتومڕێكدا لە پەرلەمان بڵاویكردەوە لە ماوەی خۆپیشاندانەكاندا نزیكەی 105 كەس لە ناوچە كوردنشینەكان كوژراون.
سەرچاوە/ ڕۆیتەرز
