رووبەڕوو بوونەوەی مەترسییەكان

ئیسماعیل ئیبراهیم
كوردستان لە ئۆكراینای خاوەن ئابوورییەكی بەهێز لە سەر ئاستی جیهانی نازدارتر نییە، ئەمە لە روانگەی وڵاتانی زلهێزی جیهانی، بینیمان چییان بەسەر هێنا.
تەنها چەند وڵاتێك نەبێ هەموو جیهان پشتگیریان لە ئۆكراینا كرد، ئەنجامەكەی چییە؟
وڵاتێكی وێران لە ژێر خانی ئابووری، تێكچوونی ئاسایشی كۆمەڵایەتی….
ئێستاش وڵاتان لە پەنای هاوكاریان بۆ ئۆكراینا یا روسیە چەكەكانیان لەو شەڕە نمایش دەكەن و بازاڕی فڕۆشتنی چەكەكانیان پێ گەرم دەكەن.
كوشتن و بێ سەروشوێن بوونی مرۆڤ، یا كەم ئەندام بوونیان، برسی بوون و لەرزینی دەست و جەستەی منداڵان لەبەر سەرما و سووتانی پێستیان لەبەر گەرما كە لە ئەنجامی شەڕەكانی ئەوانەوەیە بەقەد نووكە دەرزییەك بایخیان نییە، ئەوەی لایان گرنگە دەستكەوتی زۆرتری ئابووری و بەهێزكردنی هەژموونی سیاسییە.
ئەو وڵاتانە رازی نین یەك ئاژەڵ لە ناو سنووری خۆیان ئازاری پێبگات، بەڵام لەسەر سیاسەتی چەوتیان و بەرژەوەندی ئابووری و هەژموونیان، بە بەرچاویان نەتەوەكان جینۆسائید دەكرێن و بەردەوام هەڕەشەی كوشتنیان لەسەرە، مێش نابێتە میوانیان، ئەو دۆخەی ئێستا لە ئێران دەگوزەرێت ئەوەندە دەهێنێت دەستوەردانی نێودەوڵەتی بكرێت بۆ رزگار كردنی هاووڵاتییانی ئێرانی، بەڵام بەرژەوەندییە زەبەلاحەكانی وڵاتانی زلهێز و هاوپەیمانی ئێران ئەوەندە قەبەن كە هەموو كارە قێزە وونەكانی دەستەڵاتدارانی ئێرانی نادیدە دەگیرێن.
ئەو دۆخەی بەسەر وڵاتانی یەمەن و لیبیا و سوریە و عێراقیش داهات تەنها بەرژەوەندی هەژموونگەرایی بۆ بەرژەوەندی ئابووری و بەگەڕ خستنی كۆمپانیاكانیان بوو لەم وڵاتانە.
هەرێمی كوردستانیش كەوتۆتە ئەو ناوچە پڕ لە خێر و بێرەی چاوی هەموو دەوڵەتانی جیهانی لەسەرە و كار لەسەر بەهێزكردنی هەژموونیان دەكەن بۆ دەستكەوتی ئابووری و ساخ كردنەوەی كاڵا هەمە چەشنەكانیان.
بۆیە راگرتنی دۆخی ئێستای هەرێمی كوردستان ئەركێكی قوورسە، بیری تیژ و دیپلۆماسییەتی درێژ خایەن و تاكتیكی هەمەچەشنەی دەوێت هەم بۆ ناوخۆ هەمیش بۆ عێراق و ناوچەكە و جیهانیش، ئەوەی تا ئێستا هاتووە وێڕای هەموو تێبینییە ناوخۆییەكان بە تایبەتی لە پەیوەندی نێوان لایەنە سیاسییەكان، بەڵام رۆژبەرۆژ پێگەی هەرێم بەهێزتر دەبێت.
بەڵام مانای ئەوە نییە هەرێم لەبەردەم مەترسیدانییە، باش دەزانین وڵاتانی داگیركەری كوردستان بە هەموو شێوەیەك هەوڵی نەهێشتنی ئەم كیانە دەدەن، بۆیە هەم دەست درێژی دەكەنە سەر خاكەكەی هەمیش دەستوەردانی ناوخۆیی دەكەن، تەنها رێگەش بۆ دوور خستنەوەی ئەم مەترسیانەی بەسەر باشووری كوردستانەوەیە یەك رێزی و تەبایی نێوان لایەنە سیاسییەكان، ئەو تەباییەیە كە دەتوانی ئاشتەوایی كۆمەڵایەتی بەهێز بكات و دۆخی ئابووری هەرێم و هاووڵاتییانیش بەهێزتر بكات، لە ئاستی نێو دەوڵەتیش پشتگیری زیاتر بۆ هەرێمی كوردستان دەستەبەر بكات.
بۆ ئەم بابەتەش وەك هەمیشە ئەركە قوورسەكە دەكەوێتە سەر شانی پارتی دیموكراتی كوردستان، بۆ ئەوەی وەك هەمووجار مەترسییەكان بڕەوێنێتەوە، پارتێك كە خاوەنی راستەقینەی دۆزی رەوای نەتەوەی كورد و كوردستانیانە، پارتییەك كە خاوەن مێژوویەكی پڕ لە سەروەری و خۆنەچەماندن و تێپەڕاندن و زاڵ بوونە بەسەر كۆسپ و ئاڵەنگارییەكان، پارتییەك كە جێگەی ئومێدی 50 ملیۆن كوردە، ئەو دەتوانێت وەك هەمیشە دەستبەرداری ئیمتیازاتی راستەقینە و یاسایی و شەرعی خۆی بێت، لە پێناو كوردستانێكی بەهێز و مەزن وەك لە رابردوو كردوویەتی.