مەنسوور محەمەد گەردی
نیشتیمان تەنها ناوێک لەسەر نەخشە نییە، نیشتیمان بریتییە لە هەناسەی دایکم، لە دەنگی باوکم، لە گریانی دایکانی شەهیدان، و لە خوێنی ئەوانەی بۆ ئەم خاکە قوربانییان دا. نیشتیمان ئەو خاکەیە کە منداڵانی لەسەری گەورە دەبن، خەونەکانیان لە ناویدا دەڕوونێت، و هیوای ژیان لێی دەست پێدەکات.
ئاڵا، پارچە ڕەنگ نییە؛ ئالا دڵە، شانازییە، و میراتێکە لە باوباپیرانەوە. کاتێک لە سەر ماڵێک، قوتابخانەیەک، یان شەقامێک هەڵدەدرێت، پەیامێک دەهێنێت: “ئێمە هێشتا لێرەین، هێشتا سەربەرزین، هێشتا خۆشەویستی خاکمان لە دڵماندایە.”
ئەمڕۆ، نەوەی نوێ لە جیهانێکی خێرا و گۆڕاو دادەژیت. زۆرجار زمان، کەلتوور، و مێژوو لەبیر دەکرێن. بەڵام ئەگەر منداڵێک لە منداڵیدا فێر نەکرێت کێیە و لە کوێوە هاتووە، سبەینێ نازانێ بۆ کوێ دەڕوات.
پێویستە خۆشەویستی نیشتیمان لە دڵی گەنجاندا وەک دارێک بچێنین؛ بە وشەی جوان، بە چیرۆکەکانی شەهیدان، بە گۆرانییە نیشتیمانییەکان، و بە فێرکردنی شانازیی مێژوو. چونکە دڵێک کە نیشتیمان لێی نەبێت، بە ئاسانی دەشکێنرێت.
خێزان و قوتابخانە نابێت تەنها شوێنی فێربوونی پیت و ژمارە بن، دەبێت شوێنی دروستبوونی ڕووحی نیشتیمانپەروەریش بن. مامۆستا و باوان و دایکان دەبێت بە کردار پێشان بدەن، نە تەنها بە وتار.
لە کۆتاییدا، نیشتیمانپارێزی تەنها لە هەڵگرتنی ئاڵانییە، لە پاراستنی ڕاستگۆیی، یەکگرتوویی، و خزمەتکردنی خاکەکەدایە. ئەگەر ئاڵا لە دەستمان بێت و نیشتیمان لە دڵماندا، هیچ هێزێک ناتوانێت ئەم گەلە بشکێنێت.
با نەوەی نوێ فێربکەین کە نیشتیمان تەنها میرات نییە، ئەمانەتێکە لە دەستماندا… و پێویستە بە دڵ و گیان بپارێزرێت.
