پشتیوان كەریم- سۆران:
بە پێی زانییارییەكانی زاری كرمانجی لە هەر چوار قەزای ئیدارەی سۆران، نزیكەی حەوت هەزار كرێچی هەیە و بەڕێوەبەری وەبەرهێنانی ئیدارەی سۆران یش دەڵێ 2500 یەكەی نیشتەجێبوون لە سنووری ئیدارەی سۆران دروست دەكرێت.
دوای ئەوەی حكومەتی هەرێمی كوردستان بڕیاری دروستكردنی بیست هەزار یەكەی نیشتەجێبوونی دەركرد بۆ كرێچیان، لە ئێستادا پرۆژەكە لە چەند شارێكی هەرێمی كوردستان كەوتووتە واری جێ بە جێكردنەوەو لە ئیدارەی سۆرانیش تا ئێستا بەردی بناغەی دانەنراوە.
دڵڤان عومەر، بەڕێوەبەری وەبەرهێنانی سۆران هێما بۆ ئەوە دەكات لە چەند رۆژی داهاتوو بەردی بناغەی ئەو پرۆژەیە لە سەنتەری قەزای ناوەندی سۆران دادەنرێت.
دڵڤان ئەوەش دەڵێ:” لە كۆی ئەو 20 هەزار یەكەی نیشتەجێبوونەی حكومەتی هەرێمی كوردستان بڕیاری دروستكردنی داوە، نزیكەی 2500 یەكە بۆ سنووری سۆران تەرخان كراوە،”
باس لەوەش دەكات:” لە ئیدارەی سۆران سەدان كەسی سەڵت فۆرمی یەكەی نیشتەجێ بوونیان پڕكردۆتەوە،”
دڵڤان لە ئامارێكدا زانییاری زیاتر لەسەر یەكەكان و ژمارەی ئەو كەسانەی فۆرمیان پڕ كردووەتەوە تایبەت بە زاری كرمانجی دەدات و دەڵێ:” لەكاتی پڕكردنەوەی فۆرمەكە بەشێوەیەك وا دیاری كرابوو كە جۆری یەكەكان (80م، 100م 120م) بن، لەم رێژەیە لە سنووری ئیدارەی سۆران سێ هەزار كەس فۆرمی یەكەی نیشتەجێ بوونیان پڕكردۆتەوە لەم رێژەیەش 700 كەسی سەڵتیش یەكەی 80م یان هەڵبژاردووە، هەروەها 1500 كەسیش یەكەی100م یان هەڵبژاردووە، 700 كەسی تریش یەكەی ح120م یان هەڵبژاردووە.”
بەڕێوەبەری وەبەرهێنانی سۆران ئاشكرای كرد:” ماوەی داهاتوو بەووردی كار لەسەر فۆرمەكان دەكەین تا كەسی شیاو شایستە سوودمەند بن لە یەكەی نیشتەجێ بوون”.
