محەمەد ئامۆكەیی- زاری كرمانجی:
خانمە پێشكەش كارێك لەبارەی كاری كچە مۆدێلەكان لە هەرێمی كوردستان روونی دەكاتەوە ئەو كەسانەی كاری لەمجۆرە دەكەن هیچ ستاندەرێكی جیهانی لەوان نابینم، بەڵكو زۆربەی جەستەی خۆیان نمایش دەكەن.
رێنا عەبدولڕەحمان، كە چەند ساڵێكە لەزۆرێك لە ئیڤێنت و دیبەیت كاری پێشكەشكاری دەكات، بەزاری كرمانجی راگەیاند” مۆدێلی واتە نمایشی جلوبەرگ نەك نمایشی جەستە، بەر لەوەی باس لە ئازادیەكانی كاری مۆدێلی بكەم بەشێوەیەكی ستانداردی جیهانی كاری مۆدێلی لەسەر چەندیین پێوەر و مەرج وەستاوە كە پێویستە لە مۆدێلكارەكان تەواوی ئەم مەرجانەی هەبێت، ئێمە ئازادین لەوەی كە دەیكەین بەڵام لە چوارچێوەی داب و نەریتی كومەڵگەش نابێت دەرچێت ئەگینا دووچاری فشار و قسەیەكی زۆری كۆمەڵگە دەبینەوە”.
ئەو كچە پێشكەشكارە نیگەرانی خۆی دەردەبڕێت لە هەڵسوكەوتنی هەندێ بەناو مۆدێل، وەك خۆی دەڵێت” بەداخەوە لەم رۆژگارەی ئێستاكە تێیداین كۆمەڵە بەناو مۆدێلكارێك پەیدابوونە كەوا نمایشی جەستەیان لەگەڵ كاری مۆدێلی تێكەڵاو كردووە و زیاتر شوێنێكی جەستەیان نمایش دەكەن بۆ سەرنج راكێشانی رەگەزی بەرامبەر، ئەمەش لە كاری مۆدێلی دوورە، مۆدێلكارەكانی ئێمە بەهەلە لە كاری مۆدێلی تێگەیشتوونە ئەوەی ئەوان دەیكەن نەكاری مۆدێلە نە ئازادی.
