رێبوار حەمەلاو شوانی
كۆڕبەندی لووتكەی جیهانیی حكوومەتەكان، لە ساڵی 2013وە ، لە شاری دوبەی لە ئیمارات بەڕێوەدەچێت ،تێیدا سەرۆك و سەرۆكوەزیرانی وڵاتانی ناوچەكە و جیهان و سەركردەكان لە بواری كەرتی تایبەت و ڕێكخراوە نێودەوڵەتییەكان كۆدەكاتەوە؛ بەشداریكردنی مەسروور بارزانی ، سەرۆكوەزیرانی كوردستان لەم كۆنفرانس و كۆڕبەندە ناوچەیی و نێودەوڵەتییانە ، ئاماژەن بۆ زیاتر بەهێزكردنی ڕۆڵ و پێگەی هەرێمی كوردستان وەك فاكتەر و هاوبەشێكی كاریگەری و متمانەپێكراو لەسەر ئاستی كۆمەڵگەی نێودەوڵەتیدا .
ئاشكرایە ناوچەكە و جیهان بە گۆڕانكارو پێشهاتی نوێی و خێرا دا گورزە دەكات ، بۆیە لەم كاتە و ساتە هەستیارانەدا خوێندنەوەی ژیرانە بۆ سیاسەتی ناوچەیی و نێودەوڵەتی هەبێ و زۆر وردبینانە مامەڵە بكرێت ، بەتایبەتی بۆ گەلی كورد و دۆزە رەواكەی چەند ئەوەندە زەروورەتە تاكو لەلایەك پارێزگاری لە دەستكەوتەكانی بكات و لەلایەكی دیكەش سوود لە دەرفەتەكان وەربگرێت ،بەتایبەت سەردان و بانگهێشتی مەسروور بارزانی، سەرۆكوەزیرانی كوردستان بۆ كۆڕبەندی لووتكەی حكوومەتەكانی جیهان خۆی لەخۆیدا ئاماژەیە بە كاریگەری و ڕۆڵی هەرێمی كوردستان وەك قەوارەیەكی یاسایی ودەستووری لە ناوچەیەكی پڕ كێشە و ململانێیدا .
بەتایبەتی لەم قۆناغە سیاسیی و مێژووییەدا ، زۆر گرنگە لەم كۆڕبەند و لووتكە جیهانییەیانەدا ڕۆڵ و كاریگەرییەكی بەرچاوی هەبێ ، چونكە جوگرافیا ،ئاسایش و ئابووری و نەوت و كانزانكان و گوتاری گەلی كورد ڕۆڵی بنچینەیی لە سەقامگیری ناوچەگە دەگێڕێت ، ئەوەش بەكردەوە لەماوەەكانی رابردوو سەلمێنراوە ، چونكە كوردستان و سەركردایەتییەكی گرنیییەكی حەتمی لەناوچەكەدا هەیە ، پێشترین كارەكتەرێكی بنچینەیی بووە بۆ كۆتایی هێنان بە تیرۆریستان و پارێزگاریكردن لە سەقامگیری وئاشتی لە ناوچەكەدا ، بۆیە وڵاتانی ناوچەكە و بەتایبەتی ئیمارات لە ڕۆڵ و كاریگەری كورد تێدەگەن ، هەر ئەوەشە هەموو ئەو بانگهێشتە فەرمییانەی ئاراستەی سەرۆكوەزیرانی كوردستان دەكرێن ، بۆ ئەو سەنگ و پێگە دیپلۆماسییە بەهێزە دەگەڕێتەوە كە گەلی كورد و هەرێمی كوردستان لە ناوچەكە دەیگێڕێت و هەیەتی
لووتكەی كۆڕبەندی حكوومەتەكان بۆ ئەمساڵ كە تێیدا زیاتر لە شەش هەزار كەسایەتی سیاسی و ئابووری و سی و پێنج سەرۆك و سەرۆكوەزیران و پێنج سەد وەزیری و سەركردە لە 150 وڵاتی جیهان بەشدارن ، بەتایبەتی ئەمە بۆ ساڵی پێنجەمینە ، مەسروور بارزانی، سەرۆكوەزیرانی كوردستان بەشێوەیەكی فەرمی بەشداری لووتكەی حكوومەتەكانی جیهان دەكات ، كە خۆی لەخۆیدا ئاماژەیە بە گرینگی وبایەخی پێگەی هەرێمی كوردستان لە سەر ئاستی ناوچەیی و نێودەوڵەتییدا
بۆ ئەمساڵ لووتكی جیهانیی حكوومەتەكان لە ژێر دروشمی ( داڕشتنی حكوومەتەكانی داهاتوو)، بەڕێوەدەچێت و لەگەڵیشدا چەندین تەوەری گرنگی وەك حكوومڕانیی جیهان و سەركردایەتیی كاریگەر، خۆشگوزەرانیی كۆمەڵایەتی و بونیاتنانی توانا، گەشەپێدانی ئابووری و دەرفەتەكان ، داهاتووی شارەكان و گۆڕانكاریی دیموگرافی لە خۆدەگرێت ؛ هەر بۆیە لووتكەی جیهانیی حكوومەتەكان بەتایبەتی بۆ هەرێمی كوردستان لە ناوچەیەكی پڕ كێشەدا ، سەكۆیەكی گرینگە بۆ تاوتوێكردنی كێشە هەرێمایەتی و نێودەوڵەتییەكان وئاڵنگارییەكانی بەردەم حكوومەتەكان و دەرفەتێكە بۆ ئاڵوگۆڕكردنی بیروڕا و چارەسەری داهێنەرەانە لە پێناو بەرەوپێشبردنی ئەدا وكارەكانی حكوومەت
لەم كۆڕبەندە جیهانییەدا ،بێجگە لە كەسایەتییەكانی وڵاتان ، زیاتر لە 80 ڕێكخراویی جیهانی و پسپۆر لە بوارە جیاجیاكان بەشدارن و لەماوەی سێ رۆژی ئەم لووتكەیەدا ، زیاتر لە 200 پانێڵ و كۆوبوونەوەی تایبەت وگرینگ ئەنجامدەرێت و پانزدە راپۆرتی ستراتیژی لەبواری جۆارجۆریش پێشكەش دەكرێت ،كە پەیوەست وئامانج لێیاندا شیكردنەوەی ئاڵنگارییەكان و دۆزینەوەی چارەسەرییە بۆ كێشە ناوچەیی و نێودەوڵەتییەكاندا
وڵاتانی ناوچەكە و كۆمەڵگەی نێودەوڵەتیش گەواهیدەرن، مەسروور بارزانی، وەك سەركردەیەكی بڵیمەت و سەرۆكوەزیرانی كوردستان لەماوەی رابردوو و ئێستاشدا ڕۆڵی سەرەكیی هەبووە لە هاوسەنگی ڕاگرتنی سەقامگیری،گەشەی ئابووری ، ستراتیژییەتی بەڕێوەبردنی حكوومەتی كوردستان لە قۆناغە سەخت و هەستیارەكاندا ،بەتایبەتی تێپەڕاندنی بارۆدۆخی ئاڵۆزی ناوچەیی و ئاڵنگارییەكان هەرێمایەتی ولەهەمانكاتیشدا ئاسایش و سەقامگیری و گەشەپێدان لە هەرێمی كوردستان و بەردەوامی پێدانی.
