شەهلا رەشید- زاری كرمانجی :
چەندین تاوەری بەرزی گەیاندنی تۆڕەكانی ئەنتەرنێت و موبایل لە نێو گەڕەكەكانی ئیدارەی سۆران دانراون و هاووڵاتیان ترسیان هەیە لە كاریگەرییە تەندروستییەكانی، پزیشكێكی پسپۆڕ دەڵێ:” لە رووی تێۆری زیانی هەیە و لە رووی زانستی یەوە لێكۆڵینەوەكان بەردەوامن”، قایمقامی قەزای ناوەندی ئیدارەی سۆران یش دەڵێ :”هەر هاووڵاتییەك گومانی هەیە بە بۆنەی ئەو تاوەرانەوە زیانی پێگەیشتووە، دەتوانێت لە رێگەی دادگا سكاڵا بكات”.
د. سۆران زراری، پسپۆڕی نەخۆشی هەناو، بۆ زاری كرمانجی باس لە زیانەكانی ئەو تاوەرانە دەكات كە بۆ هێڵەكانی تایبەت بە گەیاندنی ئێنتەرنێت و موبایل بەكاردەهێندرێن و دەڵێت:” لەرووی تیۆری زیانی هەیە، لەبەر ئەوەی تیشكی شەپوڵی كاروموگناتیسی تێدایە، ئەمەش زیانی هەیە بۆ دڵا، مێشك، تێكدانی میموری مرۆڤ، باری دەروونی، قەلەقی و سەرجێیكردن، بەڵام لەرووی زانستییەوە لێكۆلینەوەكان بەردەوامن و هێشتا نەگەیشتوونەتە هیچ ئەنجامێكی كۆتای كە ئەمە زیانی هەیە یاخود نە”.
لای خۆیەوە مەغدید عەریف ئەحمەد، قایمقامی قەزای ناوەندی ئیدارەی سۆران، بە زاری كرمانجی راگەیاند” هیچ كۆمپانیایەك بەبێ مۆڵەت، ناتوانێت ئەم تاوەرانە لە هیچ شوێنێك دابنێن، ئەوان نووسراوێك ئاڕاستەی وەزارەتەكانی گواستنەوە و گەیاندن، تەندروستی و ژینگە پارێزی دەكەن و ئەو رێكارە یاساییانەی كە پێویستن ئەنجامی دەدەن، ئەگەر وەزارەتەكان پەسندیان كرد، كەواتە ئەمە هیچ كێشەیەكی نییە و ئێمەش پەسندی دەكەین”.
ئەوەش خستەروو” هەر هاووڵاتییەك گومانی هەیە كە زیانی پێگەیشتووە ئەوا دەتوانێت لە رێگەی دادگا سكاڵا بكات، بەڵام پێویستە بەڵگەشی هەبێت، یاخود راپۆرتی پزیشكی لا بێت، ئەگەر زیانی پێگەیاندبێت ئێمە خۆمان ئەمە قبول ناكەین و قەرەبووش دەكرێتەوە”.
