دەوڵەتێكی فەرمی بەتامی داعش

رێبوار حەمەلاو شوانی

رەوشی ناوچەكە تادێت لە ئاگروپێكدادانی گەورەی جەمسەر گەورە و بچووكەكان نزیكتر دەبێتەوە، لەگەڵ ئەوەشدا چاوەروانی دەستپێكردنی گۆڕینی نەخشەی سیاسی دەكرێت و لە شوێنی ئەو نەخشەیەی سایكس پێكۆ كە پێش سەدەیەك بووە هۆی دابەشكارییەكی ستەمكارانە و گڕژی و ئاڵۆزییەك و ئاگرێك تا ئێستاش ئاسەوارەكانی و كاریگەرییەكانی كۆتاییان نەهاتووە ؛ گەلی كورد یەكێكە لەو نەتەوە گەورە و خاوەن خاك و جوگرافیا و مێژوو و ڕەسەنانەی زۆرترین زیانی بەهۆی لكاندنی خاك و گەلەكەی بۆ چوار وڵاتی داگیركەری عەرەب ،فارس ،تورك بەركەوتووە و تا ئێستاش بە ئاگر وئاسن و جۆرها سیناریۆ و پیلانگێری هەوڵی نكۆڵیكردن و پەراوێزخستنی دەدرێت و كۆسپ لەبەردەم كاروانە ئامانجدارەكەی كە بەدەستهێنانەوەی مافەرواكانێتی دروست دەكرێت ، ئەگەر دوێنی بەسوپا و لەشكركێشی ڕاستەوخۆی داگیركەران ئەو پیلان و سیناریۆیانە كرابێت ، ئەوەتا ئەمڕۆ بە ڕێگەی جۆرها گروپ و تاقم و میلیشیا و تیرۆریستی بە ناو و دروشمی ئاینی و مەزهەبی و فاشیزمی پەڵاماری كوردوكوردستان بەشێوەیەكی گشتی دەدرێت
بە گەڕانەوە بۆ مێژوویی 12 ساڵی رابردوو واتە هەر لەسەرتاكانی ساڵی 2014وە ، نەیارانی كورد بەڕێگەی بەكارهێنانی دڕندەترین ڕێكخراوی تیرۆریستی بەناوی داعش لەسەر ئاستی عێراق و وسووریا هێرش و پەڵامارێكی دڕندانەیان لەسەرئاستی ناوچەكە و دواتر بە ئاراستەی كوردستان دەستپێكرد ، بەڵام گەلی كورد وەك نەتەوەیەكی مرۆڤدۆست و ئازادیخواز، نەك تەنیا بەرگری لە دۆز و كەرامەت و خاك وئیرادەی خۆی كرد، بەڵكو هەموو مرۆڤایەتی لە هەڕەشەی تیرۆریستان پاراست و بە هەزاران شەهید و برینداری بەخشی ، جارێكی تر گەلی كوردیان لە شەنگال و ناوچەكە ئەنفال و كۆمەڵكوژ كرد ، لەهەمانكاتیشدا ویستیان لێكترازان و دووبەرەكی لەنێوان كورد دروست بكەن و لەوێشدا پارچە پارچە مان بكەن
بەڵام گەلی كورد بە ئیرادەیەكی پۆڵاینن و ئامادەبوونی پێشمەرگە ، رابەر و سەرۆك مسعود بارزانی بەخێرایی و لەگەڵ پاڵپشتی چەند وڵاتێك كە دەستیان لە دروستكردنی ئەو ڕێكخراوە تیرۆریستەیە نەبوو یانیش ناچار بوون ، ئەو ڕێكخراوە تیرۆریستیە لەسەردەستی هێزی پێشمەرگەی كوردستان تێكشكێنرا ، كوشتنی ئەبوو بەكربەغدادی ، وەك خەلیفەی داعش و چەندین سەركردەی دیكەی ئەو ڕێكخراوە تا رادەیەكی زۆر داعشی لاواز كرد , بەڵام تا بە ئەمڕۆش مەترسییەكانی داعش و ئەوانەی لەپشتیانن و هاوكاریانن هەر ماوە ، جەنابی سەرۆك بارزانی بەردەوام هۆشداری لە سەرهەڵدانەوە و مەترسییەكانی بۆ سەر هەموو ناوچەكە داوە ؛ بۆیە ئەوانەی ئەمرۆ پشتیوانی و ڕێگەی خۆشكەرن بۆ تێكشكاندنی گرتووخانەی داعش و حكوومەتی ئەحمەد شەرعی داعشی دەكەن وەك دەوڵەتێكی فەرمی ، باش دەزانن ئەمانە پاشماوەی ئەو ڕێكخراوە تیرۆریستیانە و سیناریۆ و پلانی ئاغاكانیان لە ناوچەكە دا جێبەجێ دەكەن
بەتایبەتی ئێستا ناوچەكە لەسەروبەندی گۆڕینی نەخشەی سیاسییدایە ، زڵهێزان و ئەوانەی لەپشت ئەو گۆڕانكارییانەدا ، لەجیاتی هێزی زەمینی ،ئەو گروپ و میلیشیا تیرۆریستیانە بەكار دێنن ؛ رۆژئاوای كوردستان وێرای ئەوەی لەماوەی رابردوو هەوڵێكی زۆریاندا بۆ ئاسایش و سەقامگیری سووریا و ڕێگریكردن لەگەڕانەوەی داعش بۆ زۆرێك لە ناوچەكەكانی ئەو وڵاتە و بەتایبەتی پارێزگاریكردن لە گرتووخانەكە ، بەڵام وڵاتانی ناوچەكە بەهۆی ترسیان لە گۆڕانكارییەكان بەتایبەتی توركیا و سووریا و چەند وڵاتێكی دیكەی عەرەبی ، ئەوا پێش ڕووداوەكان كەوتوون و دەیانەوێت بە هێرش وپەڵاماردانی گەلی كورد لە رۆژئاوای كوردستان و كوشتن و جینۆسایدكردنی گوایە پێش بەم گۆڕانكارییانە بگڕن
ئەوەی لە ئێستای حكومەتەكەی شەرع دەبینرێت ، نەك تەنیا حكوومڕانییەكی شارستانی نییە، بەڵكو بە پۆشینی جلوبەرگی مەدەنی و كراواتەوە، تەنیا وەك ئەكتەرێك رۆڵ دەبینێت لە نێو سیناریۆی ئاغاكانی، لە هەمانكاتیشدا بە كۆمەڵێك دروشمی ئاینی و مەزهەبی و كوشتن و بڕین هەوڵی سەپاندنی ئیرادە و دروستكردنی حوكمڕانییەكی پیس و دیكتاتۆری دەدات، هەموو قسەكانی لە چوارچێوەی بەیاننامەیە و باوەری بە كورد و كوردستان و دۆزە رەواكەی نییە، تەنها دەیەوێت ئەوەی لەپشت دەرگە داخراوەكانەوە پێی گوتراوە جێبەجێیان بكات و ڕێگە نەدات گەلی كورد خاوەنی بەرێوەبردنی خۆی بێت ، لەكاتێكدا كورد لەسەر خاك ونیشتیمانی خۆیەتی و خاك و نیشتیمانی عەرەب و تورك و فارسی داگیر نەكردووە
ئەوەی ئێستە دەگوزرێت، حكوومەتێكی نوێیە بەتامی شەرع و داعش دژ بە گەلی كورد دەجەنگێ ، هەندێك وڵاتی وەك توركیا و عەرەبی پشتیوانی ئەو هێرش و پەڵاماردانانە بۆ سەر گەلی كورد دەكەن ؛ وەك چۆن لە رابردوو پشتیوانی داعشیان دەكرد , ئەمڕۆ بۆ هەموو دونیا روون بووتەوە ، دەوڵەتی ئێستا نەك هەر داعشە بەڵكو فۆرمی یاسایی وەرگرتووە ، ئەوەش مەترسییە بۆ سەر داهاتووی هەموو ناوچەكە و جیهان، ئەوەی راستییەكان دەزانێت گەلی كوردە، هەر بۆیە بەهەموو توانایەكەوە بە سیناریۆی چەواشەكارانە و درۆ شەڕی كورد و كوردستان دەكرێت ؛ بەڵام گڕی ئەو ئاگرە نەك تەنیا ناوچەكە بەڵكو هەموو وڵاتانی دونیا دەسووتێنێت .