زارى كرمانجى – سۆران :
ئەبوبەكر كاروانی، كەسایەتیی سیاسی، لە وتارێكی ڕەخنەیی تونددا وەڵامی لێدوانەكانی ئەم دواییەی مەلا مەزهەر خۆراسانی دەداتەوە و ڕایدەگەیەنێت “ئەو جۆرە تێگەیشتنە بۆ ڕۆڵی ئافرەت و بەشداریی لە بەرگریی نیشتمانیدا، تێگەیشتنێكی تاكەكەسی و سنووردارە، بەشێك نییە لە جەوهەری ئیسلام و مێژووی نەتەوەیی كورد.”
ئەبوبەكر كاروانی ئاماژە بەوە دەكات، لە كاتێكدا كورد پێویستی بە هاوسۆزی نەتەوەیی هەیە، هەندێك كەس بە ئاراستەی دابەشكردنی كۆمەڵگە هەنگاو دەنێن و دەڵێت “شێوازی كۆمیدی و تەهەكومیی مەلا مەزهەر پێچەوانەی كەسێتیی زانای كوردە” و ئەو تانەدانەی لە كچە جەنگاوەرانی كورد دراوە بە ناوی ئیسلامەوە، كارێكی نادروستە.
لەبارەی ئەو لێدوانەی كە دەڵێت “ئەركی ژن تەنیا چای تێكردنە”، كاروانی بە توندی ئەو دیدە ڕەتدەكاتەوە و بە “تێگەیشتنێكی تاڵیبانییانە و داخراو” وەسفی دەكات. ئەو دووپاتی دەكاتەوە، بەپێی بەڵگە مێژووییەكان، لە سەردەمی پێغەمبەر (د.خ) ئافرەتان بە چەكەوە بەشداریی جەنگیان كردووە و فەقیەكان كۆكن لەسەر ئەوەی ئەگەر وڵات بكەوێتە مەترسییەوە، ئەركی ئافرەتانە وەك هێزێكی یەدەگ بەشداریی بەرگری بكەن.
ئەم كەسایەتییە سیاسییە، ئاماژە بە “مەلای گەورەی كۆیە” دەكات كە لە سییەكانی سەدەی ڕابردوودا داوای كردووە ئافرەتان مەشقی سەربازی بكەن بۆ كاتی پێویست. كاروانی دەڵێت، “ئەوەی مەلا مەزهەر دەیڵێت، نوێنەرایەتیی بۆچوونی تاكەكەسی خۆی دەكات نەك خودی ئیسلام”.
لە كۆتایی بابەتەكەیدا، ئەبوبەكر كاروانی هۆشداری لە مەترسییەكانی ئەم جۆرە بیركردنەوەیە دەدات و پێی وایە دەبێتە هۆی گومان خستنە سەر شەرعیەتی كاركردنی هەزاران ئافرەتی موسوڵمان لە داودەزگاكاندا و سەلماندنی ئەو تۆمەتانەی كە ئیسلام بە زیندانیكردنی ژن و بێبایەخكردنی ڕۆڵی لە دەرەوەی ماڵ تۆمەتبار دەكەن. هاوكات دووپاتی دەكاتەوە، ئەم دیدگا دواكەوتووانە دەبێتە هۆی بەدبینكردنی نەوەی نوێ بەرانبەر بە ئاین و دروستكردنی دابڕان لەگەڵ واقیعی سەردەم و ڕەوتی گەشەكردنی مێژوویی كۆمەڵگە.
