لێرە پاڵپشتی لە هونەر و هونەرمەندان ناكرێت

شەهلا رەشید-سۆران:

پرۆگرامی بەهرە لە رادیۆی زاری كرمانجی میوانداری هونەرمەندی دەنگ خۆش نزار سۆزداری كرد، لە بەرنامەكەدا گۆرانیبێژەكە باسی لە دواین كار و بەرهەمەكانی خۆی كرد و گوتی:” نازناوی سۆزدار بۆ من شتێكی زۆر جوانە، بەڵام هیچ شتێك لە پشت ئەو نازناوە نییە. دەشڵێ:” لە كوردستان پاڵپشتی لە هونەر و هونەرمەندان ناكرێت و تۆماركردنی بەرهەمێك پارەیەكی زۆری تێدەچێت، بۆیە هونەرمەندان بۆ كارە هونەرییەكانی خۆیان روو لە دەرەوە دەكەن.
نزار سۆزدار، گوتیشی:” لە ساڵی 2008 هاتمە نێو كاری هونەری و لە رێگەی رادیۆی زاری كرمانجی و چەند رادیۆیەكی دیكەوە دەستم بە گۆرانی گووتن كرد و تا ئێستاش بەردەوامم، هەموو جۆرە گۆرانییەكیش دەڵێم گرنگ ئەوەیە لەسەر دەنگم بێت و بتوانم مافی تەواوی هونەرەكە بدەم، من بە گۆرانیەكانی هەر چوار پارچەی كوردستان سەرسامم، بەڵام لە هەموویان زیاتر گۆرانییەكانی كوردانی باكور بۆ من زۆر سەرنجڕاكێشن و ستایلی گۆرانی گووتنیشم زیاتر لەوان نزیكە، هەروەها پەیوەندییەكی باشم هەیە لەگەڵ گۆرانیبێژەكانی رۆژهەڵات.
لە میانەی قسەكانیدا ئەو هونەرمەندە، زیاتر گووتی:” تا ئێستا دوو ئەلبوومم هەنە، هەردووكیانم لە ئێران تۆمار كردوونە، ئەلبوومێك لە ساڵی 2020 بڵاوكردەوە بەناوی (چوونا تە) پەیڤ و ئاوازەكانی وارهێل هەركی بوون، لە ساڵی 2021 كلیپێكم لە زاخۆ دروست كرد كە پەیڤ و ئاوازەكەی وارهێل هەركی بوو، ساڵی 2022 ئەلبوومێكی دیكەم بەناوی (نامەبەر) بڵاوكردەوە پەیڤ و ئاوازەكانی هی ئاوازدانەر قاسم تابانە كە لە ئێرانە.
هونەرمەند نزار سوزدار، دەشڵێ:” بەشداری كردنم لە بەرنامەیەكی تەلەڤزیۆنی، گۆرانییەكم نزیكەی دوو ملیۆن بینەری هەبوو، لەلایەكەوە دڵخۆش و لەلایەكی دیكەوەش دڵگران بووم، چونكە دەتوانین بڵێین بەرنامەكە پڕ بینەرترین بوو، گۆرانییەك تەنها بە لێدانی سازێك ئەوەندە بینەری هەبێت لە بەرنامەیەكدا زۆرە بۆچی پاڵپشتی ناكرێین لەرووی ئاواز و ئەلبووم و كلیپەوە، دڵگرانیەكەم ئەوە بوو سەرەڕای ئەم هەموو بینەرە، ئەم كەناڵە تەنانەت پەیوەندیشیان پێوە نەكردم، بۆ ئەوەی دەست خۆشیم لێ بكەن، لێرەدا من تەنیا باسی خۆم ناكەم، بەڵكو زۆربەی گەنجانی وەك من بەهرەمەندن و دەنگیان زۆر لە هی من خۆشترە، بەڵام بەداخەوە هانیان نادەن و پاڵشتیان ناكەن، یاخود زۆرجار هەندێك لە هونەرمەندانمان بۆ ماوەیەك لەناو هونەردا بەدیار دەكەون دواتر ون دەبن، هۆكارەكەشی دیارە رۆژانە بە چاوەكانی خۆمان دەبینین هونەرمەندێكی بیانی بانگهێشت دەكرێت بە ملیۆنان دینار بۆیان خەرج دەكرێت، كەچی باشترین گۆرانیبێژمان هەیە لە ماڵەوە كەوتووە و كەس حسابی بۆ ناكات، بۆیە زۆر قورسە هەموو كارە هونەرییەكانت لەسەر ئەركی خۆت بكەیت، چونكە خەرجییەكی زۆری دەوێت.
لە كۆتاییدا نزار سۆزدار، دیاركرد:” راستە لەوانەیە كەسانێكی زۆر گلەیی لە هونەرمەندان بكەن كە بۆ بەرهەمەكانیان زۆرجار سەردانی دەرەوەی كوردستان دەكەن، ئەمە لە كاتێكدایە كوردستان پڕ بووە لە ستۆدیوی جوان و كەسانی هونەرمەند بۆ دانانی ئاواز و كلیپەكان، لە كوردستان هەموو شتێك بۆتە پارە، بۆ بڵاوكردنەوەی یەكێك لە گۆرانیەكانم بۆ چەند ستۆدیوی خۆمان تەلەفونم كرد بەڵام هەموویان بە كەمتر لە هەزار دۆلار رازی نەبوون، كەچی هەموو ئەلبوومەكەم لە ئێران بە هەزار دۆلار تەواو كرد، بۆیە هەموو كەسێك توانای ئەوەی نییە لە كوردستان ئەم خەرجییە بكات، ئەمە لە كاتێكدایە زۆرم پێخۆشە لێرە لە ستۆدیویەكانی خۆمان كارە هونەرییەكانم بەڕێوە ببەم، بەڵام بۆم ناكرێت و خەرجی زۆرە”.